Jan Mau Let Mat, Madang Hte, Atsam Marai ( Youth Program )

Ramma Nkau mi a myit hta, jan mau let mat hta, tinang madu hkum a, atsam marai ngu ai, ndai lahkawng hpe shingdaw sawn yu dat yang, gara wa gaw, grau ahkrak nga ai hpe,gin hka na yak wa nga ai. Bungli madu ni a,bungli shaga ndau laika pa ni hta mung, yawm dik, jan mau lu da ai wa rai ra nga ngu ai lawm wa nga ai re. Dai majaw ndai lamang hta gaw, jan mau nlu ai ramma ni hte, bai jawng kaja kaw na jan mau nlu ai ramma ni a matu yaw shada let gam garan ya mayu nngai law..

Ndai jan mau let mat gaw, tinang a matu, kaja wa madi shadaw ai kun? ngu ai hta, kaja wa sha mung, bungli lu na matu, kaja wa hkrak madi shadaw ya nga ai. Masha law malawng myit ai gaw, sak kan bau lam a matu, jan mau let mat kaja lu madu da yang, ngai gaw hpring tsup sai ngu myit kau da chye nga ga ai re. dai hku mung nrai shi nga ai. jan mau let mat lu da ai gaw, kaja nga ai. jan mau lu da ai wa hte, n-lu da ai wa gaw, bungli shang lu na lam hta, grai nan shai wa nga ai. raitimung, lahta de tsun lai wa sai hte maren, jan mau let mat ngu ai gaw, bungli lu na matu akyu nga nga ai, raitimung, bungli hta awng dang na matu, akyu nrawng nga ai, asan tsun ga nga yang, dakkasu jawng yu ai shaloi, lu da ai amrak masat ni pyi, bungli hta awng dang na matu, akyu nrawng nga ai re. Dai hta madang ntsaw  ai ramma ni hpe n-gun jaw mayu ai gaw, san poi ni hta, madang tsaw na gaw yak ai lam nrai nga ai. shani ting laika dung hti nna, lu hti matsing da sai hpe, hkrak jaw ai hku lu ka da yang, teng sha madang tsaw wa lu na rai nga ai. Bai langai mi gaw, ma ni, ramma ni malawng maga myit kaji chye ai gaw, ya sha tsun lai wa ai masat ya ai madang garan ai lam ni a majaw rai nga ai,ndai lam ni hpe bai yu ga nga yang, laika sharin gawk langai hta jawng ma 40 nga ai ngu saga,bai ndai jawng gawk na ramma ni yawng gaw shakut ai ni hkrai, yawng gaw byim ai ni chyu hkrai, A madang lu ai hkrai ngu ga, deng yang san poi langai htai shagu, dai jawng ma marai 40 kaw na langai gaw jahtum madang lu na sha rai nga ai, hpa majaw nga yang, masat da ai hkrang gaw nga chyalu rai nga ai, masat lu shadang 1 kaw na ru dat yang yawm dik lu ai wa gaw, jahtum madang rai wa na rai nga ai. dai hpe yu yu yang, madang jahtum lu dat shagu dai jawng ma wa gaw anya sai wa byim mat ai kun?Anhte kanu kawa ni mung, tinang a kasha jawng kawk kata hta, madang 1 nan 1 lu ra ai ngu ai kanu kawa ni mung, loi gaw myit yu mai nga ai lam yan ni rai nga ai. tsun mayu ai gaw, jan mau let mat lu nna, bungli lu wa sai, raitimung, tinang bai kahtap nna, shakut yang she, awng dang rawt jat kalu kaba wa na rai nga ai, kaja wa kung kyang ai lam nnga ai, nshakut ai nga yang gaw, bungli hta, shuk ai lam ni law wa na sha n-ga, bungli shapru katut ai madang hte hkrum wa chye nga ai re.

Atsam marai ngu ai hpe tsun sang lang yang,htum wa na nrai nga ai, chye na ai hku tsun ga nga yang, bungli hpe kung kyang tsawm htap ai hku awng dang ai hku lu galaw yang dai gaw, atsam marai nan rai ng ai, bai bungli hpe kung kyang nna, ngut kre hkra galaw lu na matu ( Skills ) ni ra nga ai, ndai skill ni lu na matu hkaja shkut shaja ai Practice ngu ai ra nan ra nga ai. Kaja wa shakut lu na matu, shakut mayu ai myit nan rawng na ra nga ai. Ndai zawn shakut shaja mayu ai myit rawng nrawng gaw, dai masha wa hta she mdaung rai nga ai. Dai majaw Project Management ni kaw e, madung da myit ma ai gaw, masha hpe sha rai nga ai.

Tsawra ai ramma kanau kasha ni, jawng lung nga ai ten ni na, amark ni hta, nang hpa ni lu galaw dan lu ai ngu ai hpe sha madung da mat na rai nga ai. dai majaw jan mau let mat lu na matu hkrai nmyit ai sha, kaja wa chye na hkra, hka ja shakut u, dam lada ai hku myit sawn u, bungli a ntsa shawang myit tawn u, lahta na masha kaba ni a, kam hpa gring ai masha byim hkra, shakut u, bai myit san seng u, dai rai yang awng dang ai lam ni hpe teng sha, lu na rai nga ai ngu, tinang hkum tinang gaw sharawt la lu let, awng dang lu wa mu ga ngu yaw shada let, laika ka sara Nay Thit gam garan da ai hpe hti garan let, lamang hpe ndai kaw jahkring sai law..

#youth

#rvckachinservice