Hpt. Patrick Lasum Rip hte Jan Mary Htingbrai Htu Hkawng Hkrum Shaga Lam

Ndai sak prat galai shai wa ai ten, myit hta gara hku hkam sha wa ai kun?

Ndai sak prat du wa ai ten, num ma ni gaw, hkum sai shan galai wa ai ten mung rai ai majaw, myit kaji garen ai lam ni hkam sha ai, Kashu kasha ni ming myit su na nsu na tsang ai sak prat ladaw mung rai nga ai hte, shanhte a matu shani shagu akyu hpyi shakut ya nga ai.

Kashu kasha ni ga shaga madat mara lam nnga nna, kanu kawa ni hte tsan mat wa ai ten ni hta gara hku hkam sha ai kun?

Kasha (7) Kaw Na Num –(6) La Kasha – (1), Dai La kasha ma wa, Tsang ( 9 ) hta jawng lung nkam mat ai majaw, kanu langai hku nna, grai hkam sha ai hte, myit kaji myit daw ai, shi a matu, rosary hti akyu hpyi ya ai hte maren, myen laika myit nlawm ai majaw, shi myit shang sha ai Miwa laika de sharin hkam la lam madun lu ai majaw Karai Kasang hpe chyeju dum nga ai

Asak aprat ram lai wa ai ten hte, ya na asak prat du ai ten, hta, hkam sha lai wa ai ningmu ni, shapri shanem let, gara hku nga sa wa ai kun?

Ya na kashu kasha ni gaw, ga ja shaga yang nra ma ai, shanhte a prat masa hta hkan nna, shanhte myit lawm ai hpe madi shadaw ya yang she kaja ai lam de yawng wa ai , moi na ten ladaw hte ya na ladaw gaw ram ram shai mat ai hte jahtum shapri shanem hkawm sa ra ai gaw law law rai nga ai anhte Kanu Kawa ni hkum nan mung, ding ding man man nga sa woi awn katsi madun let, nga nga ai hku re,

Sak ram ai kashu kasha ni hpe, hkristan dinghku de sa wa  tim shanhte hpe gara hku mu mada ai hte ya du hkra, gara hku madi shadaw ya nga ai kun?

Hkristan dinghku de matim, kanu kawa ni a myi hta gaw ma naw rai nga ai majaw, shanhte a matu, akyu hpyi ya ding yang hte, shanhte a rawt jat, galu kaba, kan bau lam kaw na hkawt, n gun nlu ai lam ni hta, kanu kawa ni hkum nan shang lawm sharin achyin matsun ya nga ding yang rai nga ai hte, Myit galu kaba ai hte bau maka ding yang rai nga ai.

Kanu kawa tai nga ninglum e, kaji kawoi tai wa nga ai shaloi myit hta gara hku hkam sha nga ai kun?

Sak prat ladaw du wa sai hte rau, tinang a sai daw sai chyen kashu ni law wa ai majaw kabu myit dik nga ai, karai kasang a lak san shaman chye ju re hpe mung hkam sha nngai hte shanhte a sak prat myit su galu kaba ai, kung kyang ai, karai kasang hpe hkrit hkungga tsawra, nawku hpung a matu, mungdan a matu,kam hpa gring ai kashu kasha ni byim tai wa lu mu ga, akyu hpyi ap nawng ya ai hte, lam matsun ya nga nngai re.

Ndai sak prat hte, kashu kasha ni a ntsa gara hku sharin achyin ya mai hte, kanu kawa tai nga ai myit su wa hku nna gara hku hpaji jaw mayu ai kun?

Kanu Kawa tai nga ai ni gaw, akyu hpyi ai sha n ga, akyu hpyi htinglu htinglai ya ai sha nrai, tatut bungli bungsi ni mung, ma ni a matu, akyu sha hpyi tim tatut nlawm yang gaw, Awng Dang ai lam nnga ai re majaw, akyu mung hpyi ya tatut magam bungli ni woi galaw ai hte sharin achyin chye ra ai re.

Kashu kasha ni a prat hkrun lam a matu, prat madang hta hkan nna ra ai bungli bungsi mung tam madun ra ai, hpaji hparat hta mung shanhte myit lawm ai ningmu maga de e, lam shading sharai jaw ra ai hte makam masham lam hta mung lama matsun madun n gun jaw ya ra ai

Hkristan dinghku langai hta ma ni law yang gaw, myit su ai ni lawm ai zawn, myit nsu ai ni mung lawm na sha rai nga ai, dai ten myit kalu kaba ai hte, myit ndaw ai sha karai kasang kaw akyu hpyi ya nna, ma ni hpe tsawra let, sharin achyin sa ai rai yang, hkritsan dinghku ngu hta grau nna kalu kaba sa wa lu na re ngu kam ai,

San : Nnye Seng Tu

Htai : Hpt Patrick Lasum Rip ( Shatapru Ma Yesu Lawk )

          Jan Mary Htingbrai Htu Hkawng