Hparan Lajang Aii Lam Hte Ningbaw Ai Lam ( Youth Program )

Ya anhte du taw nga ai prat mabyim masa hta lam shagu hta, n-gun ja ai hte galai shai rawt jat wa nga ga ai re. Nhtoi nnan shagu hta n-nan n-nan re ai ni hte hpring chyat nga taw ai re. Prat ni kade galai galai, rawt jat nga taw tim, anhte ni a prat hta, htawm hpang prat dingsa du hkra, hparan lajang ai lam hte, woi awn ai lam hpe, hpang hkrat taw sai ngu na, nmai ngam da ai lam teng sha rai taw nga ai. Hpa majaw nga yang,  galai shai rawt jat wa nga sai hte maren, shani shagu anhte a prat hta, hparan lajang ai lam ni, woi awn nga ai lam ni hpe galaw ra nga ga ai.Dai majaw ndai lam yan hpe hka ja shakut na matu ra kadawn nga ga ai law. Masha law malawng gaw ndai hparan lajang ai lam ngu ai hpe, Manager langai kaw sha nga ra ai, ningbaw wa kaw nnga ra ai ngu,bai woi awn ai atsam ngu ai mung, ningbaw ni kaw sha nga ra ai, manager ni kaw nra ai ngu ndai lam yan lahkawng hpe san san chye na da ai ni law nga ai. Tatut prat madang hku nna, ningbaw langai hta, nkau shara ni hta, mai kaja ai hku, hparan lajang lu ai atsam nga ra ai zawn, manager langai hta mung, nkau shara ni hta, maikaja ai hku woi awn ningbaw lu ai atsam ni nga na ra nga ai hpe, ninghkap nmai nga sai re.

Na a bungli, nta masha, na a sak prat hta, nang ndum dat nga tim, tinang hkum nan hparan lajang ai lam ni law law nga nga ai re.Hparan lajang ai lam hte seng nna,hpan amyu myu nga tim, nang hkum nan, magam gun langai hku nna mung, shing nrai dinghkrai sut masa langai hku nna mung, shang tsap lu na matu, ra kadawn nga ai, hparan lajang lam hpan ni hpe hka ja da ra na matu ra nga ai. Na a magam hta, awng dang ai masha langai hku lu tsap lu na matu hka ja da ra na ra nga ai.Ndai hta san hpa langai nga ai gaw, hparan lajang ai lam n-gun yawm yang hpa ni byim wa na rai nga ai, dai hta, bungli ni masa hte hkrak nlu ai sai rai nga ai ngu nsa lam mai tsun nga ai. Ratimung ndai hta grau kaba ai hkrat sum lam ni law law rai nga ai. Mu mada ai hku tsun ga nga yang, makau grup yin hta,  hparan lajang lam kaja ai wa hte, n-gun yawm ai wa dai lahkawng hpe shing daw yu yang, lai ladat hte hkrak nga ai, tinang hta nga ai ningja ni hpe, hkrak tup akyu jai lang chye ai, magam gun shada da shing nrai laga wuhpung ni a, hkungga ai lam ni, magam bungli a pan dung du lu ai lam ni hta shai mat wa na hpe adan sha mu wa lu na rai nga ai

Ningbaw ai lam ngu tsun dat yang, anhte ni galoi mung jai lang nga ai Ning Baw wa ngu ai ga si hpe shingran mu na rai nga ai. Yawng a shawng kaw na woi awn let, ra kadawn nga ai pan dung de du hkra woi sa ai hpa ji rai nga ai. Na a prat hta, nang hkum nan woi awn ra ai mabyim ni law law nga na re. Kun dinghku kata ningbaw ai lam ni, hkrun lam langai hkawm na matu ning baw ai lam ni, zawn re ai ni rai nga ai. Tatut hta gaw, Ningbaw ningla majat hpaji hte seng ai sharin dabang ni law law nga nga sai re. yawng ngu na daram mung lung nga ma ai. Raitimung, kaja wa ningbaw langai zawn myit sawn nga sa na matu gaw yak ai lam langai kaw lawm nga ai. Laika ka sara nkau ni gaw, Mungkan Hta, Ningbaw wa mung, hpang hkan nang ai ni mung, yawng ahkyak nga ai, ningbaw kaja ni ra kadawn nga ai zawn, hkan nang masha kaja ni  nga wa na mung ra nga ai. Hpang hkan nang ai ni nkaja yang, Ning baw kaja nlu nga ai, dai majaw ningbaw ni ngu ai mung, hkan nang kaja ni kaw na paw pru wa ai ni rai nga ai ma ai.

Yak hkak ai masa lam kata hta masha ni hpe ningbaw na ngu ai lam yan ni mung lawm nga  ai. Dai hta grau yak ai gaw, kaja ai hku woi awn na matu gaw grau yak nna, yak ai lam gaw, teng man jaw jaw ningbaw na lam rai nga ai. Dai majaw nang hku na, ta tut hta, woi awn taw nga ai wa rai kun? La ma  nbyim shi ai nga yang  mung, kaja ai hkan nang masha langai byim na matu ahkrak la nga ai.

Tatut ningbaw nbyim shi nga tim, ningbaw kaja ai wa a hpang hkan nang lu ai mung, lu la yak ai ahkaw ahkang langai mi rai nga ai. Dai ningbaw kaja wa kaw na, ning baw langai hta nga gring ai atsam marai ni, ningbaw hkrang ni, hka ja lu na rai nga ai. Tatut hta, woi awn kaja hte nhkrum shi ai nga yang mung, myit hkum daw, Mungkan Ninabaw ningla ni a lam, woi awn lam yan ni hpe hka ja u. Ningbaw ngu ai gaw, Shawng ningnan npawt hku  nna, katsi kaja langai byim na gaw ra nga ai. Dai majaw na bungli hta, katsi kaja byim hkra galaw ai hku, ningbaw langai a atsam marai ni hte nnan hpang gaw sharawt mai nga ai. Na a prat hta, hkrum katut wa na ning htoi n-nan ni a matu, Hparan lajang ai lam hte, ningbaw ai lam ni hte seng ai ni hpe hka ja nga let, mahkrum madup la rai nna, sak hkrung nga ai rai yang, Ten ladaw langai mi hta, Hparan lajang kaja ai wa ( Sh ) Ningbaw kaja byim lu nga ai. Dai hpang, Ningbaw ningla kaja law law hpe mung shalat shapan lu na rai nga ai ngu .

#youth

#rvakachinservice