Hkungran Kun Dinghku De Ai Ladaw Hpe Laidi Ai Lam

        Tsawra  ai hkungga ai nu wa hpu nau ni kun dinghku mayaw htinggaw de na matu hkyen lajang  nga ai ni hpe madung da nna  gam garan ya na nngai.Anhte gaw  kun dinghku nde shi yang gaw langai a lata hpe langai jawm tek let prat htum hkra rau jawm pawng nga ga i?,shi myit hte tinang a myit ai lam nbung ai ten hta raitim shada bawngban jahkrup la ga,shi ra ai lam hte tinang ra ai lam rap ra hkra galaw ga.

         Bai ahkyak gaw  lahkawng maga na dum nta masha ni hpe mung shi kanu kawa tinang a kanu kawa ni hpe mung yawng gaw tinang akanu kawa zawn masat nna hkungga galaw jaw na re.Shinggyim prat a ninghpawt lit magam ni hpe mung rau gun hpai ga.Hpa mi byin byin myit nhtum ai sha ngwi pyaw ai kun dinghku byin hkra nga sa ga nga myit mada daw dan ai ni hkrai rai na ga ai.

         Anhte kun dinghku hta e langai hte langai myit htum ai lam gaw dinghku de ai na ai hpang sha nre.Dinghku de ai laning mi pyi nhpring shi yang langai hte langai myit htum mat nna hten run mat ai dinghku ni mung nga nga ai re.Dinghku htak ai majaw,ntsen ai dam hpe nhkam lu ai majaw,kagu kamoi,kani katsa,kaning kahkau ni hte nram ai majaw ja gumhpraw lit nla ya ai majaw nga ai zawn re ai lam ni hte hka bra mat ni mung nga nga ai.

         Hkungran ladaw ngu ai gaw madu jan madu wa lahkawng yan a matu grai ahkyak ai aten ladaw ngu nna mung mai tsun nga ai.Ahkyak ai aten ladaw ngu ai hta shinggyim lam,sut masa lam ni sha  n ga lam shagu hpe nga ai,mu ai hpe mu ai nga ai hku nna mu chye ai ten ladaw,myit shingran pyaw ai sumtsaw sumra ten ni htum mat nna kaja wa nan tatut prat hte hkrum wa ai ten rai nga ai.

         Tinang nchye da ai shi hpe a kajawng sha mu dat ai zawn shi nchye da ai tinang hpe mung shi kaw nna akajawng sha mu dat ai zawn byin chye nga ai.Dai hta n ga tinang a myit shingran hta nnga ai n kaja ai lam ni,nhprinem ai lam ni hpe mung tinang kaw nna hkap la ra nga ga ai re.Tsawra ai nu wa ni anhte gaw kun dinghku de hkungran sai nga jang gaw hka  ntsa nga taw ai hkali langai hta rau jawm dung dat ai hte bung ai zawn hkali langai hta jawm dung let hkali shap let wawm hkawm ai ni hte bung nga ai.

         Anhte kun dinghku hkali ntsa hta num mi rai rai,la mi rai rai langai ngai gaw hkali hkang ai shara hpe la ra nga ai.Madu jan mada wa lahkawng yan rau sha  hkrum hkrum ra ra li shap ai ten nga ai zawn hka hpungla hte rau wawm yawng ra ai ten mung nga nga ai.Bai nna hka hpungla hpe marai atsam hte lai lung ra ai ten mung nga chye nga ai.

        Shi hkring mayu ai shara hta tinang gaw nmai hkring gring ai ngu myit yang madu jan madu wa lahkawng jahkrum bawngban ra ai ten ni mung nga nga na ga ai.Anhte kun dinghku hkali mung ngwi pyaw simsa nna pyaw pyaw hte li shap lu na matu nga jang gaw ahkyak ai lam law law nga nga ai.Dai lam ni hpe anhte kaw nna atsawm sha ahkyak la nga sa ai rai yang manghkang kaba nnga ai zawn,hkrum kadup wa na nhprinem ai lam hte mayak mahkak lam ni hpe mung hparan la lu na rai nga ai.

       Anhte galoi ten mung tinang a sumtsaw wa kaw nna myit ra hkan ya ai,lahku lanu kanawn mazum ai lam hpe ra sharawng ai nga yang sumtsaw sumra ten hpe hkum shangut kau u,hkungran dinghku de ai ngu ai gaw sumtsaw sumra ten hpe shangut kau ai hte bung ai nga ai ga mung nga nga ai.

        Lachyum gaw sumtsaw sumra ten hta gaw num kasha ni gaw sumtsaw la wa a nga ma nga yawng hta grau ahkyak shatai let tsawra lanu lahku ai hpe hpring hkra lu la nga ai,Raitim mung kun dinghku de ai prat du jang gaw gau ngwi ngwi hte tsawra myit hte lanu lahku ai lam ni yawm wa nga ai.

         Hpang jahtum gaw kanoi sumri zawn rai mat na rai nga ai.Kanoi sumri ngu ai gaw nnan gyit  hkang hkyen ai shaloi gaw grai ngang hkak ai raitim, aten na wa jang gaw grau ngwi ngwi kaw raw mat chye ai lam rai nga ai.Dai re majaw anhte mayaw htinggaw gaw de na nga jang gaw shada da chye na makawp maga garum shingtau hkai lu ai kun dinghku byin tai wa lu hkra hkyen lajang gaw de sa wa ga law.

By; Mung Hkrang