Hkum hpe nhting hkang ai sha Myit masin hpe sha htinghkang ga!

Tsawra ai nu wa ni anhte gaw sumtsaw sumra prat hta mi rai rai,dinghku prat hta mi rai rai tinang a tsawra nja ni a ntsa hta kaja wa tsawra ai shaloi tawn kau da na hpe grai myit tsang ai myit rawng ai ni hkrai rai nga ai. Ndai myit tsang ai lam gaw anhte num la lahkawng yan hta rawng nga ai re.

Dai zawn myit tsang ai majaw tinang hpe tawn kau da na kun ngu ai myit tsang ai lam ni a majaw nra ai ntawn gring ai myit tsang lam hte tinang tsawra nja,ningrum hpe hkang zing na matu shakut chye ga ai. Dai zawn tinang tsawra ai wa,ningrum kaw nna tinang hpe n kabai kau da hkra hting hkang mayu ai myit hte  gyit hkang ai lam ni galaw chye ga ai.

Kaja wa myit yu ga nga yang tinang a tsawra nja,ningrum gaw ngai hpe kau da na kun myit sawn myit lu ai ni gaw tinang hkum tinang kam hpa shamyet shanat ai lam n gun yawm ai majaw rai nga ai re ngu mu mada ai.

Lam mi hku bai yu ga nga jang lam amyu myu a majaw tinang a ningrum wa hpe myit kam ai lam n gun yawm ai shaloi mung shi sadi run yang ngu ai n tsen ai myit ni shang wa chye nga ai. Dai zawn myit ni shang wa ai hte shi hpe ntsen ai hte yu ai,ntsen ai hte tsun shaga ai lam ni rau kanawn mazum chye wa nga ai.

Anhte kadai mung tinang hpe ntsen ai hku yu hkrum wa ai ten nkam hkam ai myit hte masin pawt ai myit ni rawng byin wa chye nga ai. Dai ten ni hta tinang maga na mung myit tsang ai myit hte tsap pu let myit pawt mayu nga ai rai yang, ga law ninggyet hkat na lam gaw byin wa chye nga ai.

Dai zawn sha hpa nre ai lam ni hte ga law ninggyet hkat ai,ndai zawn ga law ninggyet hkat ai lam ni gaw langai hte langai grau grau nna tsan gang wa shangun ai hpe anhte myit dum sadi ra na ga ai.

Anhte masha shagu gaw tinang hpe myit pyaw myit dik lam jaw lu ai masha a makau kaw sha nga mayu ai ni re ai zawn tinang hpe mara tam ntsen ai myi ni hte yu chye ai,tinang hpe nkam hkam hkra tsun shaga kanawn mazum chye ai ni a makau kaw n kam nga ai ni hkrai rai nga ai.

Dai majaw tsawra ai myit hte myit tsam pu ai lam mung tinang hte ningrum hte grau nna tsan gang shangun chye nga ai.Ningrum hpe tinang a makau kaw nna pru mat wa shangun chye ai ngu ai hpe anhte myit dum sadi chye na ahkyak nga ai.

Dai hta n ga tinang hpe mara shagun tsun shaga ai hpe kadai mung nra sharawng ai zawn tinang hpe shagrit shanem tsun shaga ai hpe mung kadai mung nhkam sharang lu ga ai.

Kalang marang hta tinang kaw nna shi hpe tsun dat ai shaloi shi hpang maga kaw nna kalang ta ginhtang ai lam nnga ai majaw shi hpa nhkam sha ai ngu anhte nmai myit sawn la ai.Anhte nkau masha ni gaw ga hkum mi a lachyum hpe bai myit sumru hkam sha ai myit hte  matsing da chye nga ai.Tinang a ningrum wa kaw nna tinang a ntsa mangut tawn da nna myit nkrem ai lam ni nga chye nga ai.

Dai re majaw tinang tsawra ai wa hpe dang la mayu ai majaw mi rai rai ga law ninggyet hkat ai ten dang mayu ai myit a majaw mi rai rai tinang a ningrum hpe asung arung shagrit tsun shaga  kanawn mazum ai lam hpe gaw anhte koi gam ra nga ai.

Dai zawn sha ningrum hpe tinang kaw nna gara maga de nmai sa ai,kadai wa hte nmai pawng ai,dum nta de gara ten hta du hkra wa u,ya kadai hte rau rai nga ai,dai hku hkum galaw waw ra hku hkum galaw ngu ai lam zawn re gyit hkang ai lam ni hpe n galaw gring nga ai re.

Kaja wa myitsu zen ai ni gaw tinang tsawra ai ningrum hpe tinang a makau kaw galoi mung nga shangun mayu ai nga jang ningrum a myit hpe hkra machyi shangun ai lam ni hpe galoi mung n galaw ai zawn ningrum hpe shadut shadang gyit hkang ai lam hpe byin shangun chye ai lam ni tsun shaga ai lai kyang ni hpe n galaw chye ma ai.

Shanhte gaw ningrum a myit hpe sha htinghkang nna masha hpe htinghkang na matu galoi mung n shakut ma ai re.Dai zawn re lam ni hte shanhte a ningrum ni shanhte hpe galoi mung tsawra let makau kaw galoi mung nga na matu galaw lu ai atsam nga ma ai re.

Dai re majaw anhte kun dinghku lam sumtsaw sumra lam ni hta tinang tsawra ai wa hte n tsan gang mayu ai nga jang gaw masha hpe n gyit hkang ai sha myit hpe sha htinghkang lu hkra shakut nga sa wa ga law.

By: Mung Hkrang