Hkristan Ramma ni Myanmar mungdan kata COVID -19 Tsin-Yam Makawp ai hta Ap Nawng Shang lawm nga ma ai. Summary Kap Chyam bra ana shamyit magam hta Ramma ni shanhte a aten hte n gun atsam ni hpe nawng jau na matu lahpawt lam nnga ai sha shawng lam

Nawku Hpung shagu na Hkristan Ramma ni Myanmar mungdan kata asuya hkam ja dap ni, quarantine shara ni hte mare buga shara shagu hta Asuya hkam ja dap magam gun ni hte rau ap nawng shang lawm nga ma ai. Yangon, Okkalapa Dingda maga na Asuya tsi rung hta May 10 shani kawn volunteers hku shang lawm ap nawng nga ma ai hpe chye lu ai.

Tara shang Hkam ja dap ni hte makawp maga hpung ni tsi rung tsi gawk ni hte kaga lam ni hta sham lawm na matu garum hpyi wa ai shaloi jang jang Kap Chyam bra ana shamyit magam hta Ramma ni shanhte a aten hte n gun atsam ni hpe nawng jau na matu lahpawt lam nnga ai sha shawng lam de rawt sa ma ai.

Hkristan Nawku hpung shagu na ramma ni mungdan kata  Kap Chyambra nga ai COVID – 19 hpe ninghkap shamyit ai magam ni hta Nawku Hpung a malai ta masat htu shang lawm nga ma ai.

Si chye shangun ai Ana kap wa na tsang ra ai majaw masha law malawng ana kap ai ni hpe yu lakawn ai shara ni hte Quaritine shara ni hta bungli galaw na matu n gwi ma ai ten, Hkristan masha ni law law dai zawn re shara kaw ra mara lam hta garum ya na matu saw shaga hkrum ai majaw kabu gara let hkap la ma ai.

April 27 ya shani hta Myanmar Mungdan Hkristan ni a Council (MCC) kawn COVIC -19 Tsin-Yam hta na makawp maga na hte tsi tsi lajang ai ni hta shang lawm garum na ap nawng hpung hpe gaw de hpaw hpang da sai.

Nawku Hpung ningbaw ningla ni gaw dai zawn ap nawng ai ni a kanu kawa ni hte hpung woi lit hkam ni a madi shadaw laika hpe la nna, hkam ja dap kawn jahkrat da ai hkang da tara ni hpe hkan sa na ahkak na re lam tsun da nga ai.

Tsi rung tsi gawk ni hte quarantine shara ni hta ap nawng na ramma ni hpe hkam ja lam hte seng ai lam ni hpe tau nau hkyen lajang ai sharing hpawng ni hta sharing hkam la na gaw grai ahkyak ai rai nga ai.

Apnawng magam hta daw jau ai lam

Apnawng masha law law ra nga ai tsi rung tsi gawk ni hte quarantine sha ra ni hta ap nawng bungli galaw na matu ra nga ai; bai mare/ lawk hkan nga ai ni hpe Covid – 19 machye machang jaw na hte ra gadawn ai ni hpe garum ning shingtau la na matu ra nga ai.

Ramma 39 daram gaw Phaunggyi kaw nga ai tsi rung hta ap nawng na matu sa dat sai. Kaga ramma 12 daram hpe mung Okkalapa Dingda maga nga ai Asuya tsi rung kaba de sa dat sai hpe chye lu ai. Dai zawn sha Myanmar mungdan kata Hkristan Ramma law law COVID -19 machye machang jaw na matu, makawp maga na matu, garum jaw garum ya na matu hte kaga lam amyu amyu ni hta shang lawm nga ma ai hpe n gun lu ai hte n gun mung jaw nngai.

Ramma law law wa dai zawn ap nawng na matu jingjing rai nga ma ai hpe mung na lu ai. May 19 ya shani COVID -19  hte seng ai tsi rung (center) daju kaw Kahtawlik ramma ni mung kaga Hpunau Hpung na ramma ni hte arau shang lawm ap nawng nga ma ai.

Shawng na lang MCC kawn lajang galaw woi ai ap nawng hpung hta kahtawlik ramma marai mali lawm ma ai rai nna, bai shaga wa ai ap nawng sharing hpawng ni hta law law shang lawm ga ngu Kahtawlik Ramma Commission ningbaw kawn saw shaga da nga ai. Laika hpaji sharing jawng ni, Ram shalat jawng ni hte quarantine center ni hta Hkristan Ramma ni ap nawng shang lawm na matu mung n gun jaw da nga ai.

Cardinal Charles Maung Bo kawn woi awn nga ai CBCM kawn mung Myanmar mung kata Kahtawlik Saradaw ni a Hpawng kaba mung Alu atan jaw bang ai hta apnawng ni hpe saw shaga ai hta, shanhte hte akyu hpyi ai lam ni hta Mungdan Asuya ni kawn matsun ai hte maren shanhte hte arau jawm galaw sa wa na matu n gun jaw lam woi matsun  madun nga ai.

Yangon, Mandalay, Pyay, Bamaw, Myitkyina Saradaw Sasana ni hta Jau tai jawng shara ni, nawku jawng shara ni hte Hkristan ni a shara kaga ni hta tsi tsi hkam la na Center shara ni masat na matu tau nau hkyen lajang da ai hte ta tut shara la galaw nga masai.

Myanmar Mungdan Hkam Ja Dap hte Ginsup Dap Hkringmang Rung kawn dai Mungdaw ni hta machyi masha 10,000 jan shang ai tsi rung ni hpe gap da sai rai nna, dai shara ni hta tsi lajang ai ni hte jep sagawn hkam la ai ni 61,883 nga ai lam Hkam Ja Dap kawn tsun ndau da nga ai.

Tsawra Myit a Kumla Kaba

COVID – 19 tsin-yam kawn makaw maga na matu lit la woi awn nga ai komiti daju kawn shawng de tara jahkrat ndau shana da ai lam lai wa sai May 15 kawn May 31 de bai sharen da sai re. Hkristan Nawku Hpung shagu mung Asuya tara hpe hkan sa na matu tinang Nawku Hpung masha ni hpe aten shagu lam matsun taw nga ai hte nawku dawjau lamang ni hpe OSC hte RVA Services online ni kawn woi awn ya nga ai.

Myanmar mungdan kata Saradaw Sasana shagu hta nga ai Karuna (Caritas) ni kawn hpyen yen shara ni hta hpyen yen masha ni hpe myi man magap chye na matu, ta gashin chye na matu zawn re ai makap maga lam hte seng ai machye machyang ni hpe ta tut woi galaw sharing ya ai. Dai zawn galaw na matu ra ai arung arai ni hte shat lusha yak ai ni hpe malu masha arai ni garum ya ai lam ni mung galaw nga ma ai.

Myanmar mung kata hta Chyam bra nga ai corunavirus ana zingli kawm makawp maga lam hta ap nawng hpung hpe April 27 hta Awng San Su Kyi kawn hpaw hpang da ya sai rai nga ai.

 Myanmar mungdan hta Coronavirus ana kanu kap masha March 23 kawn jep mu hpang wa ai rai nna, Ya dai ni ana kanu kap masha marai 206, si ai masha marai 6 rai wa sai rai nga ai. Quarantine shang masha mung mungdaw shagu hta law law nga nga ai. Mung masha ni yawng sadi maja na nga taw ra ai rai nna, bungli mung galaw sha nmai ai daram rai nga ai majaw yak hkak hkrum taw nga ai masha law she law jat magang rai nga ai. Dai zawn yak hkak hkrum ai ni hpe garum ya lu na matu myanmar mung masha hta na dai ni na ramma ni a shakut ap nawng lawm nga ai hpe mu lu ai majaw mungdan Asuya ningbaw ningla ni hte Makam masham ningbaw ningla ni yawng n gun lu n gun jaw shagrau ya nga ai hta Hkristan masha ni mung lawm nga ma ai re. COVID -19 ana hkoi mat mat hkra Hkristan Ramma ni matut na shang lawm ap nawng nga ga ngu n gun jaw let

Wa Jau Patrick Gawmaw Hkawng Yae