Galai Shai Sa Wa Saga ( Youth Program )

Tsawra ai ramma kanau kasha ni, Anhte shinggyim masha, yawng ngu na daram, galai shai ai ngu ai masa lam hpe, ra sharawng ai ni hkrai rai nga ai. Dai majaw grai hkyem sa ai hku, grau loi na hku, grau rawt jat wa na matu, myit mang galaw sa let, dai ni na prat, ndai madang du wa nga sai rai nga ai.Dai hta n-ga tsawra ai ramma kanau kasha ni, tinang a myu sha, tinang a mungdan hpe, tsawra ai myit hte, rawt jat wa na,ra sharawng ai ni hkrai rai nga ai.Dai hta, nsim sa ai mungdan ni gaw, simsa na hpe ra sharawng nga ai, bai simsa sai mungdan ni gaw,rawt jat galu kaba wa na lam hpe, ra nga ai.

Bai, rawt jat kalu kaba nga sai mungdan ni gaw, grau grau kaja ai, rawt kalu kaba wa na lam hpe, gin shalat chye ai ningbaw ningla ni hpe,Myit mada nga ai.Galai shai ai lam hpe ra nga ai.Dai majaw Barack Obama gaw, yawng hpe galai shai dat na, nga ai hte, ndau dat ai a majaw, 44 ngu na, American Gumsan Magam shara hta, lung mat wa ai lam, mu lu nga ai. Bai tsawra ai ramma ni,anhte a mungdan ni hta mung,galai shai gin sai ngu ai nsen ni, na lu nga sai rai nga ai.Dai sha n-ga, shawa n-gun hte rau, Mung shawa ni ra kadawn nga ai, ningbaw ningla kaja hte, woi awn ra na ten nan rai nga sai.Mung shawa ni myit mada da ai zawn, rawt jat kalu kaba wa sai kun? 100% tup, n-awng dang nga ai gaw,asan sha rai nga ai. Nkau mi gaw, n-gun nlu ai hte, yung hkyi hpe pyi, daw kau mayu ai ngu ai nsen ni mung, na lu nga ga ai.Tinang ra sharawng ai, Tinang madi shadaw dat ai, ningbaw hpe, myit ra ai hku lata dat ai shaloi, tsi kap ai yungnu hpe sharawt let,arawng la ai ni mung shan hte sha rai nga ai. Bai yungnu hta tsi kap sai ngu ai hte, magam bungli ngut sai shadu ai ni mung rai nga ai.Tsawra ai ramma ni, mungdan langai, rawt jat kalu kaba wa na matu, ning baw kaja ra na gaw, teng sha rai nga ai.Anhte myu sha ni a , gawng kya ai gaw, ningbaw wa hpe kam lai ai lam, hkungga lai ai lam rai nga ai.ndai lam gaw, moi ten kaw na, ya dai ni du hkra naw rai nga ai. Ya dai ni na prat hta gaw,Dai hku nmai rai nga sai. San seng tsawm htap ai mungdan byim na matu, ningbaw ni maza hta ai lam, madun yang, mungdan ting ngu na daram, maza hta ma ai. Raitim nhtoi kadun laman sha rai nga ai.Masa lam hte hkrak, kabai ra na lam, zing ra na, ngu ai machye machyang du hkra, n-rawt jat wa ai a majaw, shata kaba pat matsut taw nga ai, hka hkawng ni, maza hte, pum taw nga ai, shingdu lam ni hpe, sa gahkin ya timung, shata mi nna ai sha, mi na raw, maza ni pum dingyang, hka hkawng ni pat dingyang rai nga ai.

Dai hta: galai shai ai lam hpe, ra sharawng ai ni gaw, tinang hkum tinang, galai shai na matu malap chye nga ga ai.Ningbaw wa hpe sha, galai shai shangun mayu nna,Tinang hkum galai na matu, myit ntsang, nmyit ma ai.Sai kahtet loi, sai rawt loi ai daram, sai katsi ai ni rai nga ai.Dai majaw galai shai ai lam hpe, ra kadawn ai daram,n-galai shai ai masa hte, mi na raw, hkrum sha nga ai ni rai nga ai.Myit sawn dingsa, galaw lai ladat dingsa ni hpe, galai shai gin nga sai rai nga ai,Myit sawn lam galai shai sai hte, prat mung galai shai na jin jin rai nga ai. Prat magam galai shai na matu, Myit sawn ai lam, galaw lai masa nnan hte maren, hkrang shpraw lu na matu sha, ra ahkrak nga ai. Dai hta ahkying aten, shadawn shadang sha, Shai mat na rai timung, awng dang na gaw teng sha rai nga ai.

Makau Grupyin hpe maram yu ga nga yang, Myit sawn lam galai shai ai ni, mu mada lam galai shai ai ni, tsun shaga ai lam hta, shawoi na hte nbung ai lam hpe mu lu na rai nga ai. Bai Bungli magam, hkrum lam kata, lu la ai lam ni mung, galai shai wa na hpe mu lu na rai nga ai.Dai hta tsawra ai ramma ni, galai shai ai lam hpe e, ra kadawn ai wa, ningmu kaja hte mu chye ai wa gaw, shut ai lam langai hte hkrum wa ai ten, tinang a majaw ngu myit la let, lit la mayu ai myit ni hte rau, galaw shakut ai hta, mayak lam ni hpe, hpang kalang lung na , lakang ngu hkam la let, Mahtai tam nga ai.Woi awn nlu ai wa, hpang hkan nang nkam ai ni mung, ten langai mi hta e, shut shai wa ai mabyim ni hpe, labau galam let, kade a majaw ngu, mying shakap let, lachyum n-nga dai ni du hkra, dai lam hpe e, jai lang taw ding yang naw rai nga ai hpe mung mu lu nga ai. Ndai zawn jahten hkrum da ai myit  masa ni a majaw ngu ai ga ni mung, na ga na sha rai nga ai.Dai myit masa ni hpe e, nshading nsharai sana kun? Nmai galai shai sana kun? Ngu na mung san mayu ai. Lama na n-galai shai sana nga yang, si ai ten du hkra raitim, ra nga ai galai shai lam masa tara hpe, nlu hkam sha sana ngu ai, jaw ai lam yan rai nga sai re. Dai majaw tsawra ai ramma ni, galai shai gring sai, galai shai mayu sai ngu, jahtau marawn taw na malai, tinang hkum a myit masa dingsa, myit sawn lam dingsa ni hpe, galai shai kau lu na matu sha, n-gun jaw mayu ai, dai rai yang chyu sha, rawt jat kalu kaba wa na, Democracy mungdan hku, mungkan madang hta, dan dawng wa na rai nga ai ngu n-gun jaw mayu nngai law.

#youth

#rvakachinservice