Ga law Ninggyet Hkat Ai Lam A Kaja Ai Akyu Hte Nkaja Ai Akyu

google photo

Tsawra ai nu wa hpu nau kun dinghku kanu kawa ni anhte kun dinghku hta madu jan madu wa shada da kalang marang ga law ninggyet hkat ai ngu ai gaw kaja ai kanawn mazum lam langai ngai nga ai majaw rai nga ai.Madu jan madu wa shinglet hte wa ngu ai ga nga ai zawn madu jan madu wa ni gaw kalang marang gaw nhkrum nra ga law ninggyet hkat ai lam ni nga na rai ngai.

Anhte jasam lahkawng jawm pawng da nna kun dinhku langai gaw de da ai re majaw myit jasat hkam la ai lam ni gaw galoi mung bung taw nga lu na gaw nrai nga ai.Kalang marang hta tinggyeng myit jasat ni baw ja taw nga ai majaw atsawm akawm  bawngban jahkrup nlu jang gaw ga law ninggyet hkat ai lam ni de du wa ai rai nga ai.Anhte ga law ninggyet hkat ai ngu ai gaw nkaja ai lam san san sha re ngu masat kau nmai nga ai.Nhkru nkaja ai maga de mung nga ai zawn kaja ai maga de mung naw nga nga ai.Anhte madu jan madu wa lahkawng langai hte langai myit htum mat wa sai nga jang gaw ga law ninggyet hkat ai lam mung nnga shada da ga tsun shaga hkat ai lam mung nnga mat let zim mat chye nga ai.

Tsawra ai nu wa hpu nau kun dinghku kanu kawa ni anhte madu jan madu wa kalang marang ga law ninggyet hkat ai lam mung kaja ai akyu ni hpe lu la shangun nga ai.Kalang marang ga law ninggyet hkat ai a akyu ni hpe gaw masin pawt nna ga law hkat dat ai majaw shaning law law myit masin hta mahkawng tawn da ai myit nkrem myit ndik ai lam ni hkam sha lam ni hpe jahkoi kau ya lu nga ai.

Myit  ndik ai lam ni,hkam sha ai lam ni gaw law wa jang  madu jan madu wa langai hte langai nkam mu nkam shaga hkat myit htum mat ai lam ni byin mat chye nga ai.Anhte madu jan madu wa kalang marang ga law ninggyet hkat dat ai majaw myit masin hta matsing da ai hte nkaja ai hkam sha lam ni mat wa nna langai a ntsa langai ding ding man man byin wa shangun chye nga ai.

Bai nna langai nra ai kyan lai len shamu shamawt lam hpe langai wa chye mat sai majaw grau nna sadi sa hka la lu ai rai nga ai.Anhte ndum shami galaw hkrum ai lai kyang ni hpe mung grau nna dum sadi wa lu na rai nga ai.Bai nna madu jan madu wa langai hte langai grau nna chye na hkat wa lu nga ai.Tinang a ningrum gaw hpabaw hpan hpe ra ai kaning re ai hpe gaw nra ai ngu ai hpe atsawm sha chye ginhka la lu mat na rai nga ai.

Madu jan madu wa shada da langai a hkam sha lam hpe langai chye na wa lu na rai nga ai.Bai nna kalang marang ga law ai hkat ai gaw kun dinghku hkabra na masa lam kaw nna laidi lu  chyalu mung rai nga ai.

Bai nna kun dinghku kata ga law ninggyet hkat ai majaw nkaja ai akyu lam ni hpe mung bai gam garan mayu nngai.Anhte masin pawt sindawng ai majaw sai rawt ai lam hte salum gumhtawn lawan ai manghkang ni byin hkrum chye ai.Bai nna ga law ninggyet hkat ninggun law wa ai nga jang langai hte langai lagaw lata du adum gayet ai lam ni byin hkrum wa chye nga ai.

Bai nna madu jan madu wa shada ga law ninggyet hkat ai lam ni a majaw langai hte langai ga si ni a majaw grai nan nju ndawng myit machyi mat wa chye nga ai.Bai anhte kanu yan kawa kashu kasha ni  shawnbg hta ga law ninggyet hkat ai majaw kashu kasha ni hta myit ningma ni hkam wa chye nga ai.Bai nna ga law ninggyet hkat ai lam ni a majaw madu jan madu wa  langai hte langai n shaga hkat ai lam byin wa chye nna kun dinghku dum nta a ngwi pyaw simsa lam ni gaw anhte a dum nta kaw nna hprawng wa chye nga ai.

Bai anhte ga law hkat ai kun dinghku a majaw makau grup yin hpe mung dingbai dingna jaw chye nga ai.Bai nna gaw ja gumhpraw ni majoi htum shama kau ra ai lam ni mung byin shangun chye nga ai.Anhte madu jan madu wa lahkawng ga law ninggyet hkat ai lam ni hta nta mashya ni lawm wa jang gaw kun dinghku manghkang kaba de byin pru wa shangun chye nga ai.Dai re majaw tsawra hkungga ai kun dinghku kanu kawa ni e anhte madu jan madu wa ga law ninggyet hkat ai lam ni gaw kaja ai akyu hta nkaja ai lam hpe grau nna byin shangun chye ai majaw kun dinghku ngwi pyaw na matu shada da bawngban jahkrup let anhte a kun dinghku hpe gaw de sa wa ga law

Add new comment

6 + 4 =