Dinghku Lamang (Family Program) 24 May 2020

Nanghpam Malu Masha Hte Kun Dinghku Daw ( I )

Tsawra hkungga kun dinghku kanu kawa ni e ndai Nanghpam tsi mawan malu masha  hpe koi gam na lam gaw anhte kashu kasha lu ai kanu kawa shagu a ahkyak ai lam kaba langai rai nga ai.Anhte Myanmar mungdan hta Nanghpam malu masha hpe jai lang lu sha nga ai ni gaw asak kaji kaba nlata grau grau tsaw jat wa ai hpe mu lu nga ga ai re.Tsawra  ai kun dinghku kanu kawa ni tsun ga nga yang anhte mungdaw hta kun dinghku htinggaw 10 hta nanghpam lu sha jai lang nga ai kun dinghku htinggaw gaw 7-8 daram gaw nga taw nga ai hpe anhte mu lu ga ai. Dai ni na ten hta anhte tinggaw shagu hta tsi tawng njung nlu sha ai nga tim tsa chyaru lu sha jung ai lam ni gaw law law nga na ga ai.Ndai hpe shayawm shatsai kau lu na matu,hkang zing lu na matu mung kanu kawa ni hku nna hpa nlu galaw ai ngu myit hte nhpang shangun mayu ai.Anhte Kanu Kawa ni dang lu ai made shawng hpang galaw sa ga ngu tsun mayu ai.Anhte Kanu Kawa ni yawng mung manang ni a majaw mung,myit ru ai majaw mung shingrai pyaw ai majaw mung kalang sha gaw tsa chyaru lu sha ga ai ni hkrai rai na re.Raitim nkau gaw galoi mung lu sha taw nga ai ni lawm na ga.Tsawra ai kun dinghku kanu kawa ni e anhte a shawnglam prat ban rai nga ai kashu kasha ni a prat hta mung anhte kanu kawa ni zawn sha Nanghpam malu masha ni hta jung nga ai prat,asak aprat hpe majoi nga shalai kau na hpe gaw kanu kawa shagu gaw nra na ga ai.Rai yang kashu kasha ni a shawng ningnan na lam madun woi awn sara ni rai nga ai kanu kawa ni hkum nan Nanghpam lu sha hta jung nga ai rai yang anhte kashu kasha ni mu la sharin la ai lam mung dai hku sha rai wa na rai nga ai.Anhte Jinghpaw Ga Malai hta pyi Kawa bawhkaw hkaw yang kasha mung bawhkaw hkaw ai,kanu shing kyit kyit yang kasha mung shing kyit kyit na ngu ai ga malai nga ai hte maren anhte kanu kawa ngu na ni galaw ai hpe kashu kasha ni gaw yu la hkan galaw na sha rai nga ai.Anhte kanu kawa ni  hkum nan Nanghpam tsa chyaru lu sha nna tinang a kashu kasha ni hpe sharin shaga ai rai yang gara kashu kasha mung tsa ya ka ni ya kawa kanu a ga hpe madat kam na nre ai zawn tsawra hkungga hkan sa na mung nrai nga ai.Dai zawn sha Kawa tsa chyaru ka ni  lu sha ai hpe kanu ahkang jaw ai rai yang kashu kasha ni a myit hta Nu pyi tsa chyaru ka ni lu ai hpe ahkang jaw ai mi ngu ai ningmu hte shanhte a prat ningrum manang hpe lata ai ten hta mung tsa chyaru sha lu gaw hpa nra ai ngu ai ningmu ni anhte kashu kasha ni a myit hta rawng wa sawn lam mat na anhte tsang ra nga ga ai.Dai majaw anhte a prat ai shawnglam myit mada shara prat ban nnan ni rai nga ai kashu kasha ni a prat tsawm htap nga pyaw ai prat lu la na matu gaw anhte kanu kawa ni hkum nan n gup aga hte sha nre sha kaja ai magam bungli laikyang  ni hte kasi madu lam madun sharin shaga na grai nan ahkyak nga mali ai re.Bai nna anhte a kashu kasha ni a makau grup yin hta tsa chyaru lu sha ai hpe hkap la n gun jaw ai makau grup yin ni nbyin ai,Nanghpam langai ngai hpe maju jung lu sha ai hpe hkap la ai makau grup yin ni nbyin hkra kanu kawa ni atsawm sha thing kang pawnba sa na grai ahkyak nga mali ai.Anhte akashu kasha ni a makau grupyin hta tsa chyaru lu sha ai,Ka ni nanghpam lu sha ai masha langai ngai du wa shang wa ai hte tinang a kashu kasha ni hpe nkaja ai lam lailen ni hpe sharin ya na langai byin shangun chye wa nna kashu kasha ni a matu Nanghpam malu masha jai lang na matu grai loi wa na hpe anhte myit dum ra nga ga ai. Dai majaw tsawra kun dinghku kanu kawa ni e simani myitsu zet let hpaji kung kyang ai kanu kawa jinghku jingyu hte amyu sha ni a kamhpa kam gring ai ningbaw ningla kaja ni byin tai shangun mayu ai rai yang anhte hkum nan kaja laikyang kasi madu let lam woi ra nga ga ai.