Dinghku Kata Manghkang Byin Wa Yang

Tsawra ai nu wa hpu nau ni anhte gaw manghkang lam mi rai rai,mayak mahkak ruk yak jam jau lam ni hta mi rai rai tinang galaw ai nre ai sha tinang mung hkam sha hkrum jang kadai raitim pawt sindawng mayu ai ni hkrai rai na ga ai.Dai shinggyim shingra tara nan rai nga ai.

Raitim kun dinghku dum nta kata hta gaw dai zawn rai pat sindawng mayu ai myit ni hpe byin mai ai daram htinghkang let hparan lu yang she kun dinghku gaw ngwi pyaw lu na rai nga ai.Kun dinghku hkrun lam galu hta shi a majaw mi rai rai,tinang a majaw mi rai rai ja gumhpraw sum ai lam,arung arai ni sum ai lam nga chye ga ai.

Dai zawn langai ngai a majaw langai ngai hkra sum machyi wa jang shut ai hpe ningrum ningtau kaw nna myit htum nna hpa mung nkam galaw mat na daram shadip shama tsun ga ai alm hpe mung anhte mu yu na yu na ga ai.Nang hpa mung nchye ai,hpa mung nchye na ai wa galaw dat ai hte ya yawng sumsai nrai i?Ngai galaw ai hpe dung jai shama sha taw nga ai,nta kaw sha zim rai nga u ala ga num/la ngu nna asung arung nga tsun chye ai ni mung nga chye ga ai.

Bai Nang dai daram sha pyi nchye ai i?anya ai wa,nang zawn rai anya ai la/num nnga na sai ngu ai ga si ni hte  myit htum myit machyi mat hkra tsun ai ni hpe mung anhte na yu mu yu na ga ai.Kaja wa nga yang tinang a ningrum ningtau hpe mara shagun ai gaw tinang hkum tinang mara shagun ai zawn sha rai nga ai.Hpa majaw nga yang shi hpe tinang sha lata la ai rai nga ai.

Shi n ningtawn ai nga yang tinang mung anya ai amajaw  rai nga ai.Nningtawn ai masha hpe ra ai gaw tinang mung anya ai majaw rai nga ai.Ndai masa lam hpe hkap yin la nna shi hte tinang hte gara manghkang mayak lam ni hpe raitim rau sha hparan na ngu ai hpe madung da myit ra nga ga ai.Kalang marang hta tinang hte ningrum hte hpa manghkang nnga ai.

Raitim shi kahpu kanau kana kanu kawa ni hta rai rai mayak manghkang nga ai rai yang tinang kaw nna mung nchye masu nga nmai nga ai.Tinang hte nseng ai zawn rai nga mung nmai nga  nmai sawn la nga ai.Kun dinghku mayaw htinggaw de nna kun dinghku dum nta langai rai sai nga jang gaw dum nta masha ni hta na langai ngai a shut ai lam gaw ngam nga ai dum nta masha ni hta mung hkra nga ai.

Ngut nna dai langai a shut ai lam hpe kaga ngam ai dum nta masha ni mung lit la hparan garum ra nga ai.Hpa majaw nga jang dum nta masha rai nga ai majaw rai nga ai.Dai hpe kun dinghku dum nta hte seng nna lit la ai ngu tsun rai nga ai.Anhte kun dinghku dum nta hta manghkang langai ngai byin ai shaloi shanhte na shanhte hkrai hparan na ra ai,nang hkum lawm zim rai nga ngu tsun chye ai madu jan madu wa ni nga chye na ga ai.

Na hpu ni na kanau ni gaw gwi wa re,shanhte manghkang hpe tinang manghkang nmai shabyin ai asan sha nga yaw ngu tsun chye ai ni mung nga chye nga ai.Shanhte gaw kun dinghku dum nta hte seng ai lit chye ai hte lit la ai lam hpe nnga nchye ai tinggyeng myit rawng ai ni rai nga ai.Shanhte a lit ngu ai gaw  tinang a ningrum,tinang a kashu kasha ni a ntsa hta sha nga ai ngu hkam sawn la nga ai.

Dai shut ai myit jasat sawn hkam ai lam ni a majaw shanhte galaw ai lai len ni gaw shut  wa nna shut myit jasan ni a majaw gyip gyeng ai shinggyim uhpung ni byin pru wa chye nga ai.Dai zawn nsawn nmyit la ai sha shi hte ngai shada da a seng ai lam ni a matu shi a manghkang shi a mayak gaw tinang a mayak re,shi a dum nta masha ni a manghkang gaw tinang a manghkang re ngu chye na ra nga ga ai.

 Anhte manghkang langai byin wa jang dai manghkang gaw hpa majaw gara kaw na byin wa ai ngu ai hpe atsawm shawng myit yu mai nga ai.Ngut jang she gara kaw nna gara hku garum hparan la lu mai ai lam hpe myit mai nga ai. Manghkang byin ai masa lam hta gara masa gaw gara dum nta hte seng ai.

Gara gaw tinang hte seng ai ngu ai hpe atsawm sha yu nna myit ra nga ga ai.Tinang hte seng ai lam hte tinang kaw nna gram la mai ai,shanhte hte seng ai lam nga jang gaw shanhte gram mayu wa hkra hpaji jaw tsun shadut ra nga ai.Anhte nkau gaw manghkang langai ngai byin sai nga jang manghkang shabyin ai wa hpe hkrai jawm mara shagun chye ga ai.

Dai gaw Manghkang lam hpe hparan ai hta kaja awng dang ai lai masa gaw nrai nga ai.Ndai nkau gaw dum nta manghkang  hta nnga lu ai majaw shanglawm ai ningrum hpe mara shagun chye ga ai.Lit la chye ai wa hpe tsun mara shangun let shi a lit la chye ai myit hpe mung jahpoi ai zawn byin chye nga ai.Anhte nkau rai jang gaw tinang a ningrum wa gaw kaja ai,raitim shi amyu ni nkaja ai majaw tinang mung hkam sha lawm ai nga aput angui nga chye nga ai.

Tinang a ningrum hte seng ai gaw tinang hte seng ai mung rai nga ai.Hpa majaw nga jang gaw tinang gaw shi hte la hkat ai majaw rai nga ai.Ningrum kaw na kaja ai hpe sha la na nkaja ai hpe gaw nla lu ai nga jang rap ra sana nrai nga ai.Anhte Madu Jan madu wa ngu ai ni gaw kaja ai nkaja ai lam ni hpe rau sha hkam sha ra ai ni rai nga ai.

Dai majaw madu jan madu wa  prat hta jinghku jingyu ngu ai gaw nkam tim shanhte hte seng nga ra ai lam ngu ai hpe chye na ra nga ga ai.Dai majaw kade a majaw kaning re ai manghkang ni nga u ga,kaja wa manghkang hpe hparan sa wa ai ten mara tam ai,mara shagun ai lam hta grau kaja ai gaw ndai manghkang hpe hparan na matu n gun jaw garum shingtau ai lam rai nga ai.

Tinang garum dat nna mi rai rai ndai manghkang hpe hprinem mat wa ai ten hpang de ndai zawn nshut na matu manghkang galaw ai wa hkum nan atsawm sha chye na hkra hpaji jaw ai lam gaw grau nna kaja nga ai.