Dinghku Hta Jet Tsawra Shawang Myit Hte Kanawn Mazum Ga

google photo

Anhte kun dinghku prat hta langai hte langai myit gang tsawra grin nga lu na matu hkum gawng shingyan tsawm htap ai lam,ja sutgan,arawng aya,num la kanawn mazum lam ndai ni gaw jahkring sha hkang da lu na rai nga ai.Tinang tsawra ai ningrum hpe prat tup tinang hpe tsawra nga lu na matu tinang a makau kaw nga lu na matu gang da lu ai lam ladat nga ai.Dai gaw jet tsawra shawang myit majing hte tsawra ai lam rai nga ai.

Tsawra ai kaw nna jet tsawra shawang myit de galai shai na matu gaw loi na zawn rai nna yak la nga ai re.Tsawra ai lam san san sha nre.Anhte kun dinghku madu jan madu wa ni gaw langai hte langai tsawra hkat ai gaw law nga ai.Tsawra ai ngu ai gaw tinang a matu ra taw nga ai majaw shi hpe tsawra nga ai lam rai nga ai.Shi a makau kaw nga jang pyaw ai,shi hpe tsawra ai majaw nrai nga ai,Tinang a ra rawng ai lam a majaw shi hpe nga shangun mayu ai rai nga ai.Tinang gaw shi hpe nga shangun mayu tim shi nsa jang gaw pawt chye ai.

Ningrum nta wa hpang hkrat jang pawt chye ai.Hpa majaw nga yang tinang gaw la nga ra ai majaw rai nna ningrum hte tinang a lapran a kanawn mazum lam hta mung tinang maga kaw nna ntsa hta nga lu yang she myit krem chye nna,tinang maga kaw nna chyena  hkan sa ya ai,hkam sharang ya ai ngu sawn la ai ten ni hta myit kadun nju ndawng myit yawn ai hte tsampu ai lam ni law wa nga ai.Jet ai tsawra shawang myit gaw dai zawn nrai nga ai tinang ra rawng ai lam a majaw shi hpe tsawra ai nre.tinang a matu nre ai sha shi a matu tsawra lu yang she tsawra shawang myit jet ai rai nga ai.

Ningrum gara hku mi nga nga tsawra nga ai,shi hpe myit simsa myit pyaw shangun mayu ai,shi ra ai hpe jahpring shazup ya mayu ai.Dai she kaja wa jet tsawra shawang myit majing rai nga ai.Jet ai tsawra shawang myit hta bai lu mayu ai ngu ai nnga nga ai,shi a ntsa kaja mayu ai tsawra shawang myit hpring ai,kanu kawa hte kashu kasha tsawra shawang myit hte bung chye nga ai.Tsawra shawang myit gaw tsampu kahtet ai lam nnga ai.Shi hpe tsawra ai myit kaw nna jet ai tsawra shawang myit de galai nna tsawra lu sai nga jang tinang a ningrum a matu shi a ntsa shi a kanu kawa ngut jang tinang gaw shi a ntsa hta tsawra shawang myit tawn da lu dik ningrum hku nna byin wa na rai nga ai.

Jet ai tsawra shawang myit hte tsawra sai nga jang gaw tinang maga kaw nna galai shai wa ai lam ni nga wa na rai nga ai.Ga shadawn tsun ga nga jang shi tsun ai lam ni hpe kaja wa nan myit lawm hkum lawm hte madat ya lu wa ai.Anhte madat ai atsam gaw kun dinghku langai hta nga wa jang gaw tinang a ningrum hte ga law ninggyet hkat ai lam ni yawm wa na sha rai nga ai.

Anhte nkau tsun chye ga ai madat ya ai le shi she hpa mung ntsun ai mi nga tsun chye ga ai.Shi tsun wa hkra tinang kaw nna galaw ya ai kun?ngu bai san yu ga.Shi tsun lai wa sai ten mara shagun yu sai kun?shi tsun ai shaloi nchye na ya nna pawt ai lam hte ginhtang yu sai kun?sumla hkrung yu nna madat ai kun?phone lang let madat ya ai kun? Kaja wa nan madat ya ai gaw mi sha tsun lai wa sai zawn madu jan madu wa shada ga law hkat ai lam hpe shayawm ya lu ai sha n ga grau nna kam ai lam hpe mung law jat wa shangun nga ai.

Ahte kun dinghku myit hpaji hta  sumtsaw sumra prat ten hta sumtsaw wa kaw nna tinang ra ai lam hpe sha ahkyak shatai chye ga ai.Raitim kun dinghku de wa ai shaloi gaw shi kaw nna tinang nra ai lam ni hpe sha mu tam chye ahkyak la chye nga ga ai.Anhte kun dinghku kata hta kaja ai lam hpe ahkyak nla ai sha n kaja ai lam hpe sha myit maju jung nga taw ai rai yang nau nna jang kun dinghku hta mung manghkang kaba ni byin chye nga ai.

Ndai lam ni hpe hparan lu na ladat langai gaw tinang a ningrum a kaja ai lam ni,tinang ra ai lam ni hpe atsawm sadi let myit maju jang ra nga ai.Tinang a ningrum a ntsa tinang ra ai lam ni law law nga na ga ai.Dai re majaw dai lam ni hpe myit kraw kata jung jung matsing da gring nga ai.Tinang kaja wa nan tsawra myit majing hte tsawra sai nga jang gaw shi hpe na kahtet hkra galaw mayu ai lam ni mung nnga sai.Put angoi dang sha mayu ai myit ni mung nnga sai re.Ngut nna mara tam hkrup ai,shi a n kaja ai lam ni hpe aput apai nga ai,dinglun ai hte shi hpe jahkring hkring jahkrit ai lam ni mung n galaw sai rai nga ai.

Dai zawn tsawra ai tinggyeng myit hte galaw dat ai shara ni hta n gun jaw ai,shadut ai,kam ya ai,hkungga ai hte shai ai lam ni hpe bawngban jahkrup chye wa ai.Dai zawn kanawn mazum lam ni galai shai wa ai majaw simsa wa ai sha n ga kun dinghku lam hta mung grau nna ngwi pyaw simsa wa na rai nga ai.

Dai zawn kanawn mazum lam hpe anhte nkau ni sawn la chye ai gaw ningrum ni hpe shayawm hkam sharang nga ra na i? ngu ai ningmu hte mu chye ga ai.Jet ai tsawra shawang myit hte kanawn mazum ai lam hte dawn jan ai lam ni n tsa kaw nna nga lu ai lam shagrit shanem ai lam ni nnga ai.Tsawra shawang myit hte kanawn mazum ai lam hta tsawra shawang myit hpe jaw yang tsawra shawang myit sha bai lu na rai nga ai.

Tsawra shawang myit jaw nga ninglen bai nlu ai nga tim mung myit nmai kaji myit nmai htum ai.Hpa mi byin tim tsawra shawang myit hte kanawn mazum ai lam gaw sum ai lam nnga ai.Dai tsawra shawang myit sha tinang  ningrum tinang makau kaw na npru hkawm mat hkra hkang da lu nga ai.Dai majaw anhte madu jan madu wa shada rau galoi mung ni htep nga let jet ai tsawra shawang myit hte kanawn mazum nna anhte a kun dinghku hpe ngwi pyaw simsa ai dinghku byin tai wa lu hkra gawgap la ga law..

 

 

 

Add new comment

2 + 0 =