Tsawra hkungga ai nu wa hpu nau ni anhte nkau kaji ten hta sawn la chye na ga ai.Asak kaji nna tsawm htap num kasha ai ni gaw sumtsaw sumra lam hta mung dinghku lam hta mung shanhte tsawm htap lam hte asak ram ai lam ni a majaw gam kaja na re ngu sawn la chye sawn la yu na ga ai.

Raitim dai lam ni gaw n jaw ai lam anhte asak kaba kun dinghku prat kachyi mi na sai ni gaw dai hpe shut ai lam chye na wa na re.Kaja wa nga yang anhte nkau ni shadu da ai zawn num kasha langai a tsawm htap ai lam ni,ningtawn ai lam ni gaw kun dinghku hpe ngwi pyaw ngang gring hkra galaw lu ai lam ni nrai nga ai.

Ngai tsawm ai ,ngai ningtawn ai,dai majaw shi gaw ngai hpe shayawm ya ra ai,shi gaw ngai hpe ningshawng jaw ra ai.Shi gaw ngai hpe tsawra ra ai nga ai lam gaw kaga ga myit tsaw myit htap ai lam tinggyeng myit rawng ai lam ni gaw tinang tsawra myit hte kun dinghku lam hpe hkra machyi shangun ai lam ni she rai taw chye nga ai.

Anhte num langai a myit tsaw myit htap lam hte nchye na ya lu ai lam ni gaw anhte kun dinghku hpe hkra machyi shangun ya lu ai zawn,la langai a tinggyen myit masa lam ni mung kun dinghku hpe hkra machyi shangun lu nga ai.Langai hte langai n shayawm hkat ai sha tinggyeng myit,myit tsaw myit htap lam ni gaw matut nna prat galu ta gindun lu na masa lam ni nnga ai de du mat nna hkam sharang lu ai lam mung nnga ai majaw hka mat ai de du mat chye nga ai.

Dai hta n ga langai hte langai mara shagun hkat ai lam ni hpe mung mu lu nga ai.Shi hpe la ai majaw dai nrai yang gaw ngu tsun ai lam ni hte tinang a ningrum a ntsa shatan shahpyak ai lam ni tsun chye nga ai.Shi kaw nna mung nhkam sharang lu nna bai tsun jang ningrum hte tinang a lapran hta myit machyi hpa ga ni nga wa chye ai.Shi kaw nna tinang a ntsa myit nkrem ai lam ni tsaw wa nna shi gaw tinang hpe shayawm ya nna bai tsawra ya na ngu nkam shakut mat sai.

Dai zawn shi hpang maga mung hprinem hkra nkam shakut ai zawn tinang maga mung nkam shayawm sai nga jang gaw  dai kun dinghku prat gaw hkamja lam nnga ai nhprinem ai dinghku she byin wa na rai nga ai.Mabyin lam shagu hta bawngban nlu ai,manghkang ni hpe mung lahkawng rau sha hparan na yak wa nga ai,ga li ga law ai lam ni law wa jang shi mung tinang mung myit pu ba wa nna hka mat jang kaja na kun? Nga myit wa chye nga ai.

Anhte madu jan madu wa lapran hta nhprinem ai lam ni myit ningmu ni shut shai wa ai lam ni gaw byin wa chyalu rai nga ai.Dai ten ni hta masin jasat dawdan na nga jang madu jan madu wa hka mat ai madang de du mat chye nga ai.Kade mi tsawm tsawm,kade mi ningtawn ai num raitim ndai madang hpe nlu tawt lai jang awng dang ngoi pyaw ai prat hpe nlu du nga ai.

Anhte sumtsaw sumra ten hta gaw matut rau run na nmai byin jang langai hte hka mat nna hpang langai hte bai matut ai gaw prat hpe grai nan nhten run shangun raitim dinghku  prat hta gaw dai hku langai hte nhprinem ai majaw hpang langai hte bai galai mat jang gaw prat gaw hkrang nsam hten,ntsawm ai hkang hkang chye nga ai.

Anhte la ni hku nna mung tinang tsawra nna la da ai num langai hpe hka mat mayu ai shani gaw nga nga chye nga ai.Dai shani hta hka mat na matu shadut n gun jaw chye ai lam ni hte hkrum wa nna jahkring hkring hkrum sha wa jang gaw hka mat na gaw teng wa chye nga ai.Nkau nga jang masha num shaw la shaw ai lam hpa nnga ai sha hpa nre ai lam hta sha ga law hkat ai majaw langai hte langai nju wa nna hka mat ai lam byin wa ai gaw dai lam ni a majaw rai nga ai.

Anhte shut ai lam mahkra hpe tsawra myit gaw ka up ya lu ai nga ai ga mung nga ai nrai i?Tsawra taw nga yang hpa mi byin byin hkam sharang lu nga ai.Kaja wa nan nkam sharang lu sai myi man pyi nkam yu nmu kam mat sai ngu tsun ai hte sha kaja nan nmai sawn la ai.Kaja wa myi man nmu ai shara hta nga yu ai shaloi she shi nga ai shara gaw tinang matu kade daram machyi hkrum ai lam hpe mu lu na rai nga ai.

Bai nna kun dinghku dum nta masha prat ngu ai gaw shi hte tinang lahkawng hte nngut mat nga ai.Kashu kasha nga jang hka mat na ngu ai lam gaw shanhte a myit ra lam ni mung ahkyak madung rai nga ai.Ma re majaw dawdan na ahkang hpe njaw ai ngu jang mung tinang gaw ntara ai wa tai mat na sha rai nga ai.Kanu yan kawa hka mat ai daram kaba ai lam gaw shanhte a prat hta nnga sai.Ndai lam ni hta shanhte hpe dawdan ahkang njaw ai gaw shanhte a ntsa ntara ai lam hpe tawt lai ai lam rai nga ai.Ma ni a myit ningma gaw si ai ten du hkra lawm mat na sha rai nga ai.

Anhte kashu kasha ni hpe kaja wa nan daw tau ya ai rai yang kanu hte kawa gaw kun dinghku hpe hkra machyi shangun ai lam hpe hpe ntawt lai hkra sadi ra nga ai.Madu wa shut ai majaw madu jan hkan shut ai  nga jang gaw lahkawng yan shut ai lam rai nga ai.Grau nna dai dam ni hpe ma ni hkam sha hkrum ai nga jang gaw grau nna shut ai lam rai nga ai.Ndai masa nga ai n awng dang ai kun dinghku nga taw yang gaw shinggyim prat hta ngwi pyaw hkra awng dang rawt jat hkra gara hku nga lu na nrai nga ai.

Ndai kun dinghku hka garan mat ai madang de ndu hkra ahkyak ai lam nkau hpe tsun garan ya na nngai.Shawng nnan gaw kun dinghku hte seng nna hkam sharang ga,dai rai yang shi kade mi nkaja tim hkam sharang ra na i?nga nna san mayu ai ni gaw nga na re.Anhte ntara ai lam hpe gaw hkam sharang nra ai,dang sha roi sha ai hpe mung hkam sharang nra ai,raitim tinang shut ai,tinang gawng kya ai lam ni a majaw nga yang gaw hkam sharang ra nga ai.

Bai nna aten masa hta hkan nna chye na ya n gun jaw ya ra nga ai.Anhte nhprinem ai ten  ni hte yak hkak ai ten ni hkrum wa ai yang tinang hkum nan mung ningrum hpe mung chye na ya ai lam ra ahkyak nga ai.Masha ni hpe chye na ya na ngu ai gaw yak hkak nna tinggyeng myit ni lawm ai lam rai nga ai.Dai hpe galaw lu sai nga jang gaw tinang a kun dinghku sha n ga tinang a prat awng dang lam hpe mung galaw ya lu nga ai.

Bai langai gaw myit hkam sha lam hpe hkang lu ai lam rai nga ai.Anhte gaw tinang a masin pawt ai lam hpe loi loi hte npru hkra hkang ya ra nga ai.Shi hpe loi loi hte mara n shagun hkrup hkra sa di ra ai. Galaw saw ai wa hpe ga law ai ladat hte n ginhtang hkrup hkra sadi ra ai.Langai ngai a majaw myit ndik myit nkrem ai lam ni nga ai raitim tinang myit nkrem ai zawn kalang ta n ginhtang ai sha myit sim  mat ai masa du hkra lat nna tsun shaga hparan sanglang yang grau kaja nga ai.

Anhte ndai lam ni hpe atsawm sha chye na nna hkan sa ai rai yang kun dinghku gaw hkam kaja lam grau kaja wa nna simsa ngwi pyaw wa na rai nga ai.Bai nna prat ting a matu ahkyak ai gaw shi a shut ai lam hpe mara dat ya chye na hte myit masin macyi lam ni hpe mung malap kau chye na matu mung ra nga ai law.

By: Munghkrang