Bungli Tam Ya Rit ( Youth Program )

Ya prat na ramma law malawng hte, hkrum ai shaloi mi rai rai, jahkring hkring na na re ai ga langai tsun rit nga yang “ Bungli Tam Ya Rit ’’ ngu ai lam yan rai nga ai. Bungli galaw taw nga sai manang ni kaw mi rai rai, hku hkau ai bungli madu ni kaw mi rai rai, bungli shara mi ram garaum hpyi chye nga ga ai.Kaja wa nga yang dai ga tsun ai hpe, ngai hkum nan mung nau gaw nra sharawng ai. Ramma ni ngu ai gaw myit mada lam kaba hte yup mang shingran kaba mang ra na asak prat nan rai nga ai majaw rai nga ai.

Tinang hpa gawlaw na, tinang a pan dung gaw, hpa rai nga ai hpe,atsawm hkrak chye na sak prat mung rai nga ai. Laga masha wa hpe bungli tam shangun taw na daw, bungli mahkrun, ahkaw ahkang ni law wa sai, ya na ahkying aten hta, tinang maga na sha ra kadawn ai ni hpe jahpring shatsup da ra na rai nga ai. Tau nau lajang da ai nga yang, bungli mahkrum ahkaw ahakng ni gaw, tinang hpe sa du akawk na teng sha rai nga ai hpe n-gun jaw mayu nngai law.

Bungli galaw sana ngu ai asak prat gaw, shi mali manga gaw nrai na sai,shi 8 ning hpring sai  sak ram ramma ni rai taw nga sana re.Tinang hkum tinang kam hpa let, tinang a ayaw shada lam ni hpe hkrang shapraw sa wa ra na ahkying aten nan rai nga taw sai re. Dai hta nkau ni hpe mu lu ai lam gaw, bungli sa shawk ai ten nta na, kanu, kamoi ni hpe shaga sa wa ai zawn re ai ni… ndai sak prat du hkra tinang lagaw tinang nlu tsap lu shi ai, kanu kawa myit su ni hpe naw kam hpa mayu ai myit ni naw rawng taw ai ngu ai gaw, gara hku mung nmai byim ai lam yan kaw lawm nga ai re.

Dai zawn nre ai sha, tinang hkum nan gaw,  bungli sa shawk ai te,myit su kanu kwa ni hpe shaga sa wa na nmyit ai, kanu kawa ni hkum nan, tsang nna, hkan sa wa ai lam ni mung nga chye nga ai. Dai hku rai yang chyawm gaw, kanu kawa ni a lit bai rai wa nga ai. Tinang a kashu kasha ni hpe, tinang lagaw, tinang tsap jan lu na matu, bai tinang hkum tinang kam hpa lam grau law wa na matu gaw, kaji ai ten kaw na, kanu kawa ni, sharin achyin ya ra ai lam yan kaw ahkak ai hku lawm nga ai re.kanu kawa ni hkum nan, asak 18 ning jan du hkra, kanu kawa shawun npu kaw na ndat mayu shi ai nga yang, tinang a kashu, kasha a, kraw dung atsam marai, kam hpa lam ni, tinang hkum tinang kam hpa myit ni hpe, shamat , jahten kau ya ai hte bung taw nga ai re majaw sadi maja shangun mayu ai.

Ramma ni, tinang hkum tinang kam hpa lam yawm ai ten, Bungli tam ya rit..bungli tam ya rit.. ngu na dat ai shagu, myit npyaw ai lam ni, byim pru shangun nga ai. Kalang lang, byim mai ai bungli langai ram nga yang tsun rit, ngu ai ga ni mung na ga ai, mai byim ai bungli, tinang hkum nan gaw, tinang hte htap htuk ai bunlgi langai hpe tsawm hkrak, nchye shi ai rai yang, bungli gaw tinang a matu lu na yak nga ai mabyim langai hku naw rai taw na sha rai nga ai.

Ya nga yang, seng ang ai hpaji hpan hta hkan nna, sawk hka ja sharin la na, sharin hpan law law nga taw sai rai nga ai, tinang hkum nan sha, kaja ai lam yan masa hpe tsawm chye lata nna, hka ja shakut na sha ahkrak madung rai nga ai. Sak prat hta, byim mayu ai lam langai ram nnga ai i.. myit yu shangun mayua i. Ngai hpa byim mayu ai, ngai hpa hpe myit shang sha ai, ngai gaw kaning zawn re ai bungli ni galaw yang, myit pyaw lam lu na, Bungli tam ya rit ngu tsun taw ai ramma ni hpe ya na zawn ga san ni hpe, aten la nna, myit yu shangun mayu nngai.

Pan dung nnga na gaw, kade mi sa sa, pan dung lu du na nrai nga ai. Kalang ram sha gaw, tianang hkum a matu, sung sung myit yu let, myit sawn shangun mayu ai, Tinng hpa byim mayu ai ngu ai dai mahtai hpe, chye sai nga yang, tinang a pan dung gaw, ka-ang hkup du taw sai rai nga ai, tinang galaw mayu ai magam bungli a matu, ra kadawn ai atsam marai ningja ni gaw, hpa ni rai na, hpa ni matut hka ja shakut ra na, ra kadawn ai, hpji madang ni, hpring tsup ai nhtoi shani gaw, dai ra kadawn nga ai Magam bungli ngu ai gaw, nang hpe shaga na matu la taw sanu… dai majaw ngai hpe bungli tam ya rit, ngu tsun na malai, ngai gaw, ndai hpaji magam ni hte hpring tsup ai,ndai bungli hpe galaw mayu ai ngu ai, gwi gwi tsun lu ai shani, lawan lu du mu ga ngu, n-gun jaw dat let…..