Bungli Mahkrun Hta Tawn Da Gring Ai Hkam La Lam Ni

Tsawra ai ramma ni, bungli galaw ai lam hta, ngut kre hkra galaw ra ai. Lai ladat hte hkrak galaw ra ai. Masha, ahkying aten, ja gumhpraw, arung arai lahpawt lama nrai hkra, galaw ra nga ai. Dai hta ahkyak ai gaw,  shawang myit kaba tawn da let, magam bungli ni hpe galaw ra nga ai. Bai nna tsawra ai ramma ni, Myit malang ai lam ( Honestly ) nga ra ai.

Tinang a bungli, tinang a manaw manang ni a ntsa, myit malang ai myit,nga nan nga ra ai. Dai myit nrawng yang, nang sa ai lam shagu hta, galaw hkrup dat ai shingna ni gaw, nang kaw galoi mung hkan nang na sha rai nga ai. Bai Madat mara chye ai ngu ai hpe yu yu yang, nang hku na gara shara, hpa bungli hpe mi galaw galaw, madat mara ai lam, hkungga la ra ai lam,  lit magam tau chye ya ai lam ni nga na, ahkyak nga ai.Tinang hta grau chye ai, grau kung kyang ai ni, asak kaba sai mi rai rai, bung ai mi rai rai, kaji ai mi rai rai, hkungga chye ra ai, madat mara chye ra ai, hkang sa chye na mung ra hkyak nga ai. Tinang gaw ladat hpaji langai hpe, nsharin hkam la shi yang, dai ladat hpaji hpe chye ai zawn zawn, nchye ai zawn zawn, madat mara lam n-nga, hkam la lam n-nga ai rai yang,  galoi mung, nang chye la lu na nrai nga ai. Tinang gaw, wuhpung wuhpwng langai hta, bungli langai galaw sana nga yang, tinang hta grau kung kyang ai ni sharin ya ai lam ni hpe, hkap la hkan sa galaw na ra nga ai. Bai ahkrak ai langai gaw, Teamwork ngu ai wuhpung wuhpawng rai nga ai. Tinang gaw wuhpung wuhpawng langai hte, jawm pawng galaw sana nga yang ( Good Teamwork ) ngu ai kaja ai, bungpre rap ra ai, wuhpung wuhpawng langai hku ngang ngang tsap lu hkra, shakut na ra nga ai. Bungli langai hpe, mang hkang langai hpe, marai langai hkrai mahtai tam hparan na hta, yawng myit hkrum myit ra, jawm pawng galaw sa ai hku, mahtai tam yang, magam bungli langai awng dang ai hte, galaw lu na rai nga ai.

Ndai teamwork n-nga ai wuhpung wuhpawng langai a magam bungli gaw awng dang na loi yak na re. Kun dinghku kata hta mung, kahpu kanau shada da, Family Teamwork , kung dinghku nta masha teamwork ngu nga ra ai. Tinang gaw, wuhpung wuhpawng langai hta, ningbaw taw nga ai rai yang, tinang a majaw, teamwork ndai n-hten shangun ai sha, grau ngang kang wa hkra, matut shakut na matu, n-gun jaw mayu ai. Bai Sadi Dung Ai Lam ngu ai hpe bai yuyu yang, tinang gaw, hpa bungli hpe mi galaw galaw, tinang galaw ai bungli a ntsa, sadi dung na mung ra nga ai. Dai bungli a ntsa sadi dung ai zawn, tinang hpe bungli jaw da ai bungli madu hpe mung, sadi dung tau chye ya ai lam ni nga ra ai. Dai sha n-ga, tinang a manaw manang wa a ntsa hta mung, dai zawn re myit tawn da ra ai. Sadi dung ai ni gaw, tinang a sari sadang hpe manu shadan chye ai ni mung rai nga ai. Bai sumnung shingdi ra ai lam, ndai hta gaw, tinang gaw, gara shara, gara wuhpung wuhpawng, hpa bungli hpe mi galaw galaw, shinggym kanawn mazum lam yan hta, sum nung shingdi chye ra nga ai. Laga wa kaw na mani sumsai hpe ra ai rai yang, tinang gaw shawng nnan, manang wa hpe mani sumsai hte, mani dan dat u, bai tianang hku nna, galoi mung mani sumsai hte nga chye hkra mung shakut sa wa ga.Tianng a mani sum sai re ai a majaw, pawt sindawng  nga taw ai wa hpe pyi, mani sumsai nsam hte, pawt sindawng ai lam hpe, zim mat shangun chye nga ai.Dai majaw tsawra ai ramma ni mung, dai ni kaw na, mai byim ai daram, mani u, manang wa hpe mani sumsai hte tsun shaga ga ngu, ga saw dat mayu nngai law.

Bai chye chyang kung kyang ai lam ngu hpe bai yu yu yang, tinang gaw, gara shara de mi, hpa bungli mi galaw galaw, tinang kaja wa nan, kan bau magam bungli hte galaw mayu ai bungli hpe, madung da nna, chye na kung kyang hkra galaw shakut u, bungli masa, machye machyang hpaji ni hpe, hka ja shakut da na gaw, madung re. galoi ten mi rai rai, ladat hpaji gaw, hka ja htum mat ai baw nrai nga ai majaw, Asak hkrung nga ding yang, hka ja shakut let, tatut hkrang shapraw galaw sa wa lu yang she,kaja ai magam bungli hta, kung kyang ai lam ngu ai hpe, akyu hkam sha lu na rai nga ai law.Bai kaja ai ningmu ngu ai hpe bai yu ga nga yang, tinang maga hku, tinang a makau grup yin a ntsa, kaja  ai ningmu hte, mu lu ai myit, madung da lu na ahkrak nga ai. Kun dinghku kata mi rai rai, wuhpung hta mi rai rai, byim pru wa ai kaja ai / nkaja ai ngu ai hta madung da nna, galoi mung kaja ai ningmu hte, mu chye ai, myit sawn lam nga na ra nga ai. Manaw manang ni a ntsa mung, kaja ai ningmu hte,mu mada nna, shawang myit hpring tsup ra nga ai. Masha shagu gaw, shut chye ai lam hte hkrum wa chye ai ni hkrai rai nna, masha langai hpe, nkaja ai ningmu hte, nhtuk ai lam yan ni hte tam na gaw loi nga ai. Kaja ai ningmu hte nmu chye ai masha langai gaw, wuhpung wuhpawng hte jawm pawng galaw na gaw yak ai lam rai nga ai. Bai jahtum hta ( Now ) ngu ai ya na ahkying aten ngu ai hpe bai yu yu ga, tinang gaw, hpa magam bungli hpe mi galaw galaw, ya na aten ngu ai gaw,ahkyak dik rai nga ai. Nang galoi ten kaw na, nhpang shi ai magam bungli langai hpe, Ya ten kaw na galaw hpang sana nga yang, nang hpang hkrat ai masha nrai shi nga ai. Nang hku na, ya ten kaw na, n-nan hpang ngalaw ai sha, hpang hkrat ai lam rai nga ai. Madung ahkyak ai gaw nang n-nan lahkam na lahkam n-nan rai nga ai. Dai ni awng dang nga taw ai masha shagu gaw, gum tsat nna, awng dang ai pan dung hpe du wa ai ni nrai nga ai. Nang hku na ya ten ngu ai lagaw lahkam hpang ai ngu ai ni a majaw sha, byim tai wa ai awng dang lam rai nga ai ngu gam garan ya let.

#youth

#rvakachinservice

#myitkyinaawngnan