Bungli Gara Hku Tam Na ( Youth Program )

Bungli magam tam taw nga ai nkau ramma ni, jahkring hkring na chye  nga ai gaw, bungli tam yak nga ai lam rai nga ai.Bungli ni mung shaga nga ding yang rai nga, raitim bungli nlu nga ai. Ndai lapran ni a shai hkat ai lam ni gaw hpa rai nga ai kun? ra kadawn ai lam ni gaw hpa rai? nang gaw bungli tam nga ai masha rai nga ai ngu ga, ndai lam ni hpe san jep dinglun yu nna, bungli gara hku tam na ngu ai mahtia hpe mu mada lu wa na ngu kam ai. Dai hta shang nnan lang Masat shadang lam ni a majaw kun? ngu ai hpe bai yu yu yang, tinang a bungli shawk shawn pa langai gaw, bungli madu hpe, masha shada nhkrum shi yang, myit shang sha hkra, shawng nnan lang hku, ginrat  ai lam mung sadi dum ra ai lam rai nga ai. Dai majaw CV form hpe atsawm hkrak hkyen lajang ra ai ngu n-gun jaw mayu ai. Masha ni hte nbung ai, lak lai ai tinang a CV Form a majaw, bungli lu na matu, shawng nnan lang lahkam rai nga ai, hkrak n-lajang da ai CV form ni hta, aten la nna, hkyen lajang ai CV Form gaw, bungli madu ni hku nna, aten jaw hti ya na rai nga ai law. dai zawn rai yang, num daw lahkawng ngu na lahkam bungli interview galaw ai lam de lung wa lu na rai nga ai law.

Bai Network maden la ai, jat la ai ngu ai hta e, bungli langai tam nga ai ten ni hta, tinang a jinghku, manaw manang ni hpe, bungli tam taw nga ai lam, shanhte hte ni nawn ai bungli shaga ai lam nga ai rai yang,  tsun shana ya na matu, tsun da chye ai lam mung, masan sa ai lam yan langai kaw shang lawm nga ai re. Ya na ten ni hta nga yang, grau grau loi wa ai lam gaw, Online kaw na  bungli tam ai lam yan langai rai nga ai, Tinang hta phone langai nga ai hte, internet jai lang chye ai hte, bungli langai  lu na nyak nga sai re. Magam bungli ni madun ya nga ai journal ni, Agency ni mung, online kaw na sha magam bungli ni hpe, tang madun nga wa ma sai rai nga ai, magam bungli ni madun ya ai laika man ni, wuhpung wuhpawnag ni hte, matut da ai hte, shani shagu magam bungli nnan ni hpe chye wa lu na mung rai nga ai, dai kaw na she kalang bai, tinang hte htap htuk ai, tinang galaw mayu ai magam bungli ni tam bram shawk lu mai sai mung rai nga ai re.

Lahkam kaji kaw na galaw hpang u, Tinang gaw jan mau langai ngai lu da ai, magam bungli mahkrum madup gaw nnga shi ai, bai atsam marai ni mung nhpring tsup shi ai, laga ga hpan lam ni hta mung, gawng kya shi ai nga yang, aya kaba ni hpe gaw jahkring naw malap kau da u, bai shata shabrai law law lu ai lam ni hpe mung, malap da shi u, tinang hta ra kadawn nga ai mahkrum madup ni, career development ni nga wa na matu, npawt magam bungli kaw na galaw hpang shakut na ra kadawn nga ai re, tinang hta magam bungli mahkrum madup ni, kung kyang ai kan bau lam ni hte seng nna, hpring tsup sai nga yang gaw, aya ni, shata shabrai ni ngu ai gaw, tinang hta shi chyu shi tsaw wa lu wa na, rai nga ai. awng dang ai lagaw lahkam shagu gaw,   nnan lahkam ai lahkawm kaw na hpang wa ai rai nga ai, tinang galaw hpang ai lahkam sha  jaw taw na ra ahkyak ai, lani mi hta, awng dang ai magam gun langai, awng dang ai bugli madu langai byim wa na gaw teng sha rai nga ai law.

Laika Hti U... Tsawra ai ramma kanau sha ni, bungli tam ai hte laika hti ai gaw, hpa seng ai rai ngu  sawn la na ni mung lawm na re, sak prat a matu, laika kja ni hti hka ja sum hting na ra nga ai zawn, bungli tam ai ten ni hta mung, laika law law hti na ra nga ai, tinang shawk na company a lam tam sawk  hti da ra nga ai, kata lam nchye di pyi, ntsa lam gaw chye da ra na shadu ai. bungli interview ni hta, company a lam kade chye da ai rai nga nna, bung li interview ni hta san jep chye ai hpe mung sadi da shangun mayu ai, dai majaw bungli langai shawk na nga yang, tinang shawk na company a lam tau hkrau hti hka ja da ra na re ngu tsun mayu ai.

Bungli Interview A Matu, Atsawm Hkyen Lajang Ra Ai..Bungli lu na matu, jahtum majan ngu na pi mai tsun ai, masha nan hkrum rai nna, interview a matu, atsawm hkrak lajang ra ai. Magam dap na masha kaba ni gaw, tinang a bu hpun sum raw ai lam ni hpe mung bai kung kyang ai lam ni hpe mung kalang ta, maram yu chye ai lam sadi ra ai, tinang hta, atsam marai ni nga nga ninglen, tinang a bu hpun sumraw ni a majaw, shing nrai, tsun shaga, nga sa lam ni a majaw, bungli nlu ai lam ni chye byim nga ai, bai langai gaw,interview nshang shi ai ten kaw na, tinang a bungli, aya hte, bungpre ai lam yan ni hpe tam sawk hti da ra na shadu ai.Dai majaw bungli langai nshawk shi yang, tinang maga hka ja da ra ai, lawm lam ni hpe tam mahkawng ra ai. interview a matu, mai kaja hkra tau hkrau hkyen lajang da ra ai ngu bungli shawk na lajang nga ai ramma ni hpe n-gun jaw let..

#youth

#rvakachinservice