Awng Dang Lam Hpe, Asum Ni Hte Gaw Sharawt Ai Lam

Marai langai mi, Nang gaw awng dang na matu, asum ni law law hte hkrum katut ra na ngu tsun ai ten, nang gara hku daw dan na, n-awng dang yang rai sanu ga, dai asum ngu hpe nkam hkap la ai, ngu na tsun na kun? dai nrai yang, kaja wa awng dang na nga yang, kaning re asum ni hpe raitim, lu hkra dang manga na ngu nang daw dan gwi nga sai kun?

Ma kaji jawng lung nga ai ten ni kaw na, shut ai lam n’galaw hkrup na matu, Kanu Kawa, Sara ni gaw sharin achying ya nga ai re, dai hta, anhte ni sak prat kaba wa ai hte rau, shut ai lam, hkrat sum ai lam ni law law hte, grau grau hkrum sha wa nga ai, ndai gaw shinggyim  sak prat a hkrang kum la langai mung rai nga ai.

Masha shagu gaw, tinang a sak prat yaw shada lam ni awng dang na matu, shakut ra nga ga ai, dai ten prat a ningdat lam ni hpe man ap hkrum ra nga ga ai re, nnan daw hta gaw, hkrat sum lam, n awng dang  ai lam, sum ai lam ni hpe teng sha wa hkrum sha na rai nga ga ai, dai hkrat sum lam, n awng dang lam ni hte hpang ai asum tara ni gaw, kaja wa nga yang kaman lila nrai mat nga ai, nang a awng dang lam  hpe gaw sharawt na matu, ra kadawn nga ai, sak prat a, ra kadawn ai lam ni rai nga ai.

Asum gaw mahkrum madup kaja langai re... Hkrat sum ai lam gaw, prat a  manu dan dik ai mahkrum madup langai rai nga ai, asum gaw nang hpe hpang de bai nhtang yu shangun nna, shut ai lam ni hpe bai sawn sumru lu shangun nga ai, shut ai lam hpe chye ai lam gaw, hpang de jaw ai lam galaw lu na ra kadawn lam hpe hkrang madun nna, nang hpe mai kaja ai maga de galai shai shangun nga ai. dai majaw asum ngu ai gaw, jahtum hta nang hpe awng dang wa shangun na sharin achyin ya ai sara kaja langai re ngu hpe galoi mung myit hta bang da chye ra ai.

Asum gaw awng dang mayu ai myit hpe shatsaw ya lu nga ai...Kalang marang mayak amyu myu hpe tawt lai nga ai ten, n’awng dang, hkrat sum chye nga ai, dai ten, nang gaw hting nut mat na i, awng dang lam a matu, shawng de sit sa na i ngu hpe lata ra nga ga ai, kaja wa nang a sak prat yaw shada lam ngang gring yang, asum ni gaw, nang hpe matut shakut na matu, shatsam n gun jaw na ra ai, awng damg mayu ai myit hpe katu wa hkra, dai asum ni gaw shatsaw ya na rai nga ai,

Asum gaw, ahkaw ahkang nnan hpe madun ya lu ai. Hkrat sum lam gaw, ahkaw ahkang nnan ( sh ) ladat nnan langai hpe tam na matu, nang hpe shatsam nga nga ai. Asum kaw na lu ai mahkrum madup gaw, n’awng dang shi ai ladat ni dingsa shara ni hta, ladat nnan ( sh ) ahkaw ahkang nnan langai hpe galai shai na matu, shatsam ya nga ai ngu shadum n gun jaw mayu ai.

Hkrat sum lam gaw, nang hpe grau kalu kaba wa shangun nga ai.. Sak prat gaw, nang shadu da ai hku nbyim wa chye ai lam dai shut ai lam ni gaw madi madun nga ai. shut ai lam ni gaw, nang hpe myit masa galai shai lu na matu mung sharin ya nga  ai.dai  majaw hkrat sum ai lam gaw, nang a sak prat bawng ring rawt jat galu kaba wa lu na matu, grai nan ahkyak shang lawm nga ai re.

Shut ai lam ni gaw, masha nnan ni hpe shachyen ya nga ai.Nang gaw shut ai ni a majaw, n’awng dang ai ten, jaw ai lam yan a matu, hpaji jaw ya lu ai masha nnan law law hpe tam lu na matu, garum hkam la ra na re, nang a shawng hta, shut ai law law ni kaw na, lawt lu nna jaw ai ladat ni hpe mu ai wa, bai awng dang ai ni mung law law nga nga ai, dai awng dang ai ni gaw, nang ra kadawn nga ai lam ni hpe jawm garan madi shadaw hpaji jaw ya lu na rai nga ai. Dai majaw awng dang lam a matu, masha nnan ni hte hkrum u ngu hpaji jaw mayu ai.

Shut ai lam gaw, nang madung da ai lam ni hpe galai shai shngun chye ai...Nang gaw hkrat sum lam ( sh ) shut ai lam langai ngai hte hkrum  wa ai shaloi, jahkring hkring la nna, hpa shut ai kun? hpa majaw shut ai kun?, hpa hpe madung da galaw ra na kun? ngu zawn re ni hpe bai sawn dinglik yu chye na ndai shara kaw grai nan ahkyak la nga ai. dai rai yang chyu sha, dai shut ai lam kaw na mahkrum madup la nna, bai sawn dinglik yu ai lam gaw  mai kaja ai akyang langai tai wa lu na hte awng dang lam lu na rai nga ai, n ‘awng dang ai shut ai lam ni gaw, nang a magam bungli ladat hta, gara lam hpe madung da ra na hpe sharin jaw nga ai re.

Nang gaw Superman nrai nga ai.. Sumla hkrung kata na superman gaw, mang hkang lam yawng hpe mau hpa atsam ni hte tawt lai nna, jam jau hkrum nga ai ni  hpe hkye hkrang la lu nga ai, raitim nang gaw dai superman nrai nga ai, dat jaw ai lam ni hpe hkam sha ra na gaw teng sha re. shut ai lam ni gaw, anhte shinggyim masha ni yawng hkrum katut ra na lam langai rai nga ai hte, dai lam ni hpe jut man nnan kaw na mu mada chye lu na matu dai shut ai lam ni gaw sharin ya na re ngu shadum n gun jaw dat lu nngai law

 

#youth

#rvakachinservice

 

Add new comment

4 + 2 =