Awng Dang Lam Gaw Nang Hpe La Nga Ai ( Youth Program )

Awng Dang Lam Gaw Nang Hpe La Nga Ai

          Sak Prat awng dang na lam masha law law tsun chye nga ga ai, raitim, awng dang ningtawn hkra jahtum ten du hkan sa galaw ai ni gaw nlaw nga ai. Nkau gaw awng dang na lamyan ni hpe tam bram nga ma ai, laga wa a awng dang ai ni a galaw sa ai lam ni hpe sak sagawn nga ma ai dai hta, jahtum ten du hkra nhkan sa lu nga ma ai, dai gaw, hkrit tsang ai myit ( sh ) lai sai ten na mabyin ni hta n-awng dang ai hkrat sum lam ni a majaw, myit kra kata hta, hkrit ai myit naw makoi shanu nga nna, htingnut mat nga ai lam rai nga ai.

Awng dang ai ni gaw, hkrat re ai yaw shada lam ban dung ni tawn da let, nhtingnut ai myit hte galaw shakut chye ma ai, ban dung de du lu na matu, shanhte gaw shani shagu shawng de sit sa galaw nga ma ai, Aten, Ja Gumhpraw, Myit N-gun Atsam ni hpe, arang bang let nhprai ai sha shakut galaw sa nga ma ai, awng dang ai ni gaw, tatut galaw sa ai lam nkau hpe mung tsun dan mayu ai.

100% Hpring Lit La Ai Lam.. Anhte yu maya masha ni gaw, mayak lam hkrum wa ai ten hta, laga wa rai nga ai ga shadawn kanu kawa, manaw manang woi awn nga ai ni hpe mara shagun chye nga ma ai, magam dap hta  masan nsa yang, rau galaw ai magam gun manang ni a ra rawng ai lam hpe mu chye nga ga ai, shut ai lam langai a matu, tinang hta lit nga ai wa ngu myit let, galaw daw dan ai lam nnga ma ai. dai hta awng dang ai ni hpe yu yu yang, tinang galaw sa ai lam ni hta, 100 hpring lit la lu ai myit masa tawn da chye ma ai, hkrum katut wa ai shut ai lam ni a matu, myit nhten, hpang de n htingnut nhkrit ntsang shut ai lam ni hta mahkrum madup la nna, shading sharai let, shawng de matut sit sa ma ai, awng dang na hkrun lam hta, hkrum katut wa na mang hkang ningdat lam ni a matu jau shajin da chye nga ma ai hpe mu lu ga ai.

Ra Kadawn Lam Hpe Hpyi Shawng Chye U Ga.... Anhte nang ngai ni hta, tinang hpa  ra kadawn dik htum kun, sak prat hta hpa byim mayu ai kun nga nna, hkrat re ai mahtai nchye nga ma ai, tinang a ra kadawn lam ni hpe ndang di lu yang, sharang nna nga chye ga ai, dang di lu ai ni hpang de tang madun hpyi shawn ai lam ngwi galaw nga ga ai re. ndai hta awng dang ai ni hpe yu yu dat yang, shanhte ni gaw tinang hpa ra kadawn dik, sak prat hta hpa byim ra na ngu ai myit dawdan jahkrat da ai kam ni nga nga ai, ra kadawn yang dang di lu ai ni kaw, sharin jaw lu ai ni kaw garum hpyi chye nga ma ai hpe mung mu lu ai  dai majaw awng dang mayu ai ni gaw, tinang a ra kadawn lam ni hpe gara hku tam bram ra na ngu ai hpe hkrat chye da grin nga ai ngu ndai shara kaw mu mada lu nga ai re.

Chyeju Tara Hpe Jum Tek Da U....... Awng dang ai ni gaw, hpa nrai shi ai ten kaw na chyeju dum chye ai myit ni nga ma ai, jam jau nga ai ten garum lai wa ai ni hpe chyeju dum chye nga ma ai, tinang ra sharawng ai myit sawn yup mang ni hpe hkrang shapraw lu ai ahkaw ahkang, tinang hpe n gun jaw garum ya ai nta masha ni, magam gun manang ni, galaw lu ai aten ladaw ni hta, ja gumhpraw ni hta mung, Karai hpe chyeju dum shakawn let, seng ang ai ni hpe mung chyeju dum chye nga ma ai hpe mu lu ai dai re majaw shanhte a sak prat hta, myit ngwi simsa ai lam, sak prat hpe sharap shara nga chye ai hte, akyu ara ni paw pru wa shangun nga ma ai re, myit masin simsa ai ni hta, galaw lu ai atsam marai ni law htam jat wa lu nga ai lam tsun da nga ma ai.

Kam Maka Hpe Hkrai Kam Shanat Nmai Nga Ai... Sak prat awng dang ai ni gaw, Gam maka bung wa nna, lu su nga ma ai nrai nga ai, shanhte gaw gam maka hte maren nhkam la nga ma ai, tinang a gam maka a matu, tinang sha rai nga ai ngu hpe jum tek da nga ai ni rai nga ai awng dang ai ni gaw pru wa ai ahkaw ahkang ni hpe jum tek da let shakut chye ma ai madu hkum hpe madu kam ai myit hpring hkra rawng nna, atsam marai ma hkra hte galaw shakut chye ai hpe mung mu lu nga ai.

Aten du yang masha law law wa nang a kungkyang ai lam atsam marai ningja ni hpe mu wa nna, nang hpe jai lang wa na rai nga ai, dai ten nkau ni nang kaw hpaji la mayu na ni mung law wa na re shing nrai akyu ara rau jawm galaw mayu ai ni mung paw pru wa na sha rai nga ai dai ten nang gaw awng dang ai lam ban dung de hkawm sa na sha ra ahkyak dak byim tai wa na re hpe n gun jaw shadum mayu nngai law.

Awng dang ai ni gaw, galoi mung galu kaba wa nga ra ai, awng dang mayu ai ni gaw galoi mung hka ja hkam la mayu ai myit nga ra ai sak prat awng dang ai ni gaw, laika hti ai lam, magam bungli hte seng ai hpaji ni hta hka ja hkam la ai lam hpe manu shadan nga ma ai

Myit masa n gun  atsam ni rawt jat wa ra ai.. nang a myit hta yaw shada da ai bangdung galai na nraitim, dai bangdung de hkawm sa ai ten katu ai myit marai ni yawm wa chye nga ai hpe mung dum ra nga ai galaw shakut ai lam yan shagu hta, myit n gun atsam ni hkrat sumwa chye ai, dai zawn shakut nga yang nang yaw shada da ai bandung de ndu wa lu na re hpe mung myit dum sharai nga ga dai majaw galoi mung ngai tsun tsun re ai Katuuu ai myit ni hte sha nang a awng dang lam ni hpe ganawng lu na rai nga ai ngu tsun mayu ai

Tatut Galaw Sa U... Hpa n galaw yang hpa byim wa lu na nrai nga ai awng dang ai lam ngu ai gaw shani shagu na galaw sa ai lam ma hkra hpe gumhpawn nna mahtai pru ai lam rai nga ai dai majaw nang gaw awng dang ai wa byim mayu yang tatut hkrang shapraw hkawm sa ra ai grau ahkyak ai gaw shani shagu na lagaw lahkam ni hpe grau tsaw lawan wa lu hkra galaw shakut na ra nga ga ai dai majaw shawng de nhkrit  ntsang hkawm sa u dai awng dang ai lam gaw nang hpe hkap ala nga ai ngu

#youth

#rvakachinservice