Awng Dang Ai Lam Yan De, Du Hkra Sa Wa Ga. ( Youth Program)

Na a prat hta, awng dang ai lam yan ni hpe lu madu lu mayu ai i.. nga nna marai langai ngai san yang, law malawng maga gaw, She awng dang mayu ai law nga nna sha htai na rai nga ai. Kaja teng sha awng dang mayu ai hkak re ai kun ngu bai kahtap san yang mung loi gaw un mayu ai hku nsen ja ja hte htai na rai nga ai. Dai rai yang tsawra ai ramma ni, anhte nang ngai yawng, prat hta awng dang mayu ai rai yang, tatut hta, anhte a prat hpe awng dang hkra hkrang shapraw nga taw sai kun ngu ai hpe myit yu nga ga. Shawoi galaw ai magam bungli ni galaw sa ai, bungli kaw na nta du yang Facebook kaw sumla mara ai, masha ni mara ai sumla ni hpe tsawm ntsawm yu hkawm taw nga ai kun? Bungli kaw na wa yang manang ni hte hpalap seng, beer seng ni dung let, ten jahtum nga ai kun? Dai rai yang, na a prat awng dang wa hkra hkrang shpraw taw nga ai hta, nang  ra kadawn nga ai awng dang lam hpe, lu madu na loi naw yak nga na re, Ya  na prat hta, awng dang lam ni hpe lu na matu, hkrang shapraw sa na lam hta, akyu nga ai lam yan ni hpe shadum jaw mayu nngai

Ra sharang ai lam

Na a prat hpe awng dang mayu hkrang shapraw sa wa mayu ai nga yang, hkrang shapraw ai ngu ai hte nhkum tsup shi nga ai.Dai hkrang shapraw mayu ai Myit marai tsaw na matu mung ra kadawn nga ai. Langai hku tsun ga nga yang Myit masin n-gun atsam langai nga ra na rai nga ai- gym gasup ai ngu ga, shawng shani gasup da nna hpang shani machyi ai dai zawn hpang shani matut sa ai, hpang shani bai machyi ai dai hpang shani bai gym bai sa shaloi manang wa gaw ram sai law nkam sa sai, grai machyi ai nkam gasup sai nga nna ngam taw ai, nang gaw machyi hkam let man man gasup ai, dai zawn sha shata kru ram na wa yang nang  a hkum hkrang yu tsawm wa ai, dai hpa majaw i nga yang, na a ra kadawn ai myit marai ni tsaw ai majaw nang byim mayu ai lam hpe galaw ai rai nga ai.

Bai Makau grup yin – Sak prat hpe, hkrang shapraw awng dang nga ai ni hpe yu ga nga yang, shanhte a makau grup yin ni mung madung ahkrak shang lawm nga ai hpe mu lu nga ai. Ga shadawn tsun ga nga yang, na a makau grup yin hta, hpa mung nhka ja, pan dung nnga ai sha, kanu kawa ni tam da ai sha dung sha nga ai makau gyup yin ni nga yang shan hte hte kanawn hkrup nna, awng dang ai lam hpe galaw shakut na mat mat wa chye nga ai re. dai majaw, prat magam hpe hkrang shapraw awng dang mayu ai wa a, makau grup yin ngu ai mung, nlaw htum nang zawn hkrang shapraw mayu ai ni nga ai makau grupyin byim na matu ra ai zawn, hkrang shapraw mayu ai myit hte, hkrang shapraw nga ai lam hpe jahten kau chye ai, tsun kau chye ai lam nnga ai makau grup yin rai na mung ahkrak shang lawm nga ai re. Ndai ga shadawn hpe yu yang, nang nga ai buga shara htawt sit na matu nra nga tim, nang a manaw manang, makin jinghku ni hpe galai shai na gaw ra nga ai ngu shadum mayu ai.

Ning Dat hkat ai lam yan ( Sein Call Mu Mya ) – Prat magam hta, awng dang mayu ai nang hku na, awng dang lam a matu, ning dat ai lam ni hpe hkap la chye na mung ra ahkrak nga ai. Nang byim mayu ai lam byim na matu, mayak ni hte hkrum katut wa na, dai mayak ni ngu ai gaw, langai hku tsun ga nga yang ning dat ai lam ni rai nga ai, na a magam bungli hta mi rai rai, kanawn mazum lam ni hta mi rai rai, nang nchye galaw ai lam ni, nkam galaw ai lam ni raitimung, awng dang lam a matu, dai lam ni hpe nang glaw ra na nga yang nang ndai lam ni gaw, kaba la ai ning dat lam ni byim wa na rai nga ai. Dai hpe nang gara hku tawt lai na, hprawng mat na kun? Lama hprawng na rai yang prat tup hprawng na nga yang, awng dang lam hpe hkrat sum na rai nga ai.law malawng hpa majaw nawng dang ai nga yang dai ning dat lam ni hpe hkap la shakut ai lam nnga ai lam dan dawng nga ai, ya prat hta awng dang nga ai ni law law nga nga ai dai ni yawng gaw, ning dat lam ni hpe  shakut sa wa ai a majaw rai nga ai. Dai ning dat lam a mabyim masa lam langai gaw, nang hkrum katut wa ai ten hta, dai ning dat lam ni ngu ai gaw, shawoi na mabyim ning dat lam ni re hpe mu mada lu wa na rai nna, dai mayak langai hpe awng dang hkra hpran dat shagu, na a matu, arawng la hpa langai zawn sak prat ni hpe lu madu na lam rai nga ai.

#youth

#rvakachinservice