Asum Njaw Ai Myit Marai Ni Hte ( Youth Program )

Asum Njaw Ai Myit Marai Ni Hte

          Awng dang lam nlu ai ni gaw, lam hkang e, htingnut asum jaw kau ai ni rai nga ai, awng dang ai ni gaw, mayak lam ni  mu wa hkrum wa tim, asum njaw prat laru a ningdat lam ni hpe nhkrit nkang  hkawm sa nga ma ai re.

Shanhte ni gaw nhtingnut ai sha, n gun atsam marai ma hkra hte majan pa shang na zawn marai ni hte hpring nga ai ni rai nga ai, awng dang lam hpe lu madu na matu, katu nga let lata nsharawt asum njaw ai marai ni nga ma ai hpe mu lu ai awng dang lam bandung ni htep wa ai hpe nchye,lata lahkam mi ram sha ra ai hta, hpang de htingnut mat wa ai ni a matu, yawn hpa rai nga ai, hpa majaw shanhte ni htingnut asum jaw kau wa ai kun?

Anhte shinggyim masha ni gaw mayak nnga prinem ai mabyim masa ni kaw sha shingnu nga chye ga ai, prat a laru ningdat lam ni hte hpring nga ai shinggan na mabyim masa ni hta lak lai nkam nshakut mayu ga ai, kaja nga yang, rawt jat galu kaba wa na lam hta mabyim masa nnan de shakut gin shalat le lu yang she paw pru wa na rai nga ai .Anhte udi kata na, u hkai kasha gaw udi kawp kaw na ga le wa lu yang she, kaba wa ai u kasha zawn galai shai lu nga ai, dai zawn sha anhte shinggyim masha ni mung, prinem taw nga ai udi kawp masa kaw na lu le shamu yang she awng dang ai sak prat hpe gaw de sa lu na rai nga ai.

Kam ai myit hten za ai lam ..... Kam ai myit yawm mat wa ai ni gaw, hpang jahtum hta asum jaw kau nga ma ai, tinang a myit shingran yupmang ni hpe matut hkrang shapraw nkam mat sai  lu na sha na lam mayak ni, pu kan lam a matu mayak lam ni, magam bungli mayak ni gaw, anhte shinggyim masha ni hkrum sha chye ai sak prat a ningdat lam mung rai nga ai raitimung, awng dang lam myit sawn yup mang ni hpe nhtingnut ai sha hkrang shapraw mayu ai ni gaw, kade mayak hkrum tim, aten la nna, atsam ningja ni garang nga ma ai shani shagu garang ai nhtu gaw, dai wa ai hte, awng dang na re ngu ai kam ai myit dai taw ai nhtu zawn shani shagu garang nga let ningtawn nga anhte nang ngai ramma ni ahkyak nga ga ai.

Sum ai lam hpe hkrit ai lam.. awng dang ai ni shagu dai sum ai lam hte hkrum ga ma ai re, raitim, shanhte gaw asum hpe nhkrit, n awng dang nna, kun dinghku, manaw manang ni pat hkum nga tim, hpang de nhtingnut, kade ram mi gritnem mat tim, dai asum hpe nhkrit, sawng dik ai mayak lam mahtai kata shut ai lam hpe mahkrum madup la let, mai kaja dik byim wa hkra myit maju jung let galaw shakut nga ma ai.

Bai jahten chye ai myit masa gaw, awng dang lam hpe sat ai wa rai nga ai nmai byim ai, ngalaw lu ai ngu ai kam ai lam yawm ai ni hta, dai jahten chye ai myit masa lawan ai hku kap bra chye nga ai re. dai hpe dum ra ai, awng dang na lam hta lagat nga ai wa a matu dai jahten chey ai myit gaw, lam maw ntsa na krawk taw ai lam zawn byim nga ai dai majaw awng dang mayu ai wa gaw, dai zawn re ai jahten chye ai myit ni hpe koi gam chye ra nga ga ai bai awng dang ai lam ngu ai hta mu mada ai langai gaw, aten hpe hparan lajang ai hta hprang ai lam rai nga ai hpe mung mu lu ai, n awng dang ani ni gaw, hpa majaw magam bungli hkrat sum ra ai kun ngu san yang, aten nlaw na, matut shakut na aten nnga na ngu tsun chye nga ma ai kaja nga yang, dai aten nlu ai lam gaw nrai nga ai, shanhte ni gaw lu da ai aten ladaw ni hpe tang du hkra njai lang ai lam a majaw rai nga ai, madung aten jaw ra ai lam hte njaw ra ai lam nchye ginhka ai majaw rai nga ai, aten htum ai hpang she madung lam hpe nngut lu ai lam hpe mu lu nga ai dai hta , aten hpe hparan ai lam nnga ai, aten jai lang jahpan hpe masat ai lam hprang ai lam a majaw rai nga ai awng dang ai ni gaw, aten ngu ai hpe manu shadan ngu ai lam hpe jum manat jai lang da nga ma ai re

Bai awng dai ai lam gat shingjawng aihta na, hpang jahtum le pru wa ra ai wa gaw, rip kawp hkan nang ai hta yawm ai wa re hpe mu mada lu ai, lagat ai wa langai gaw, zet let zer tsang ai hte lagan ai lam shamna ra nga ga ai, shi aten, shi rip kawp ni hpe hkrak hkrak hkan sa ra nga ai, rip kawp tara gaw, akyu ara nga na matu, yaw shada let, galaw da ai lam rai nga ai, jawng ma langai hta, yuprawt aten, ginsup ten, laika hti ai ten, lu ai sha ai ten, hkra tup rai shaman ra ai, rip kawp hkan ai jawng ma  gaw awng dang ai lam ahkaw hkawng grau law nga ai re.

Hpa majaw awng dang lam ntsa hta, anhte shinggyim masha ni htingnut asum jaw kau nga ma ai kun ngu gaw lahta de tsun lai wa sai a majaw rai nga ai

Awng dang lam ni gaw asum njaw, hpang de nhtingnut lata nsharawt ai myit marai myit masa shangai shaprat ra ai, asum hpe byimpru shangun ai lam yan ni hpe nhtang dang manga gwi ai atsam marai myit ni shangai shaprat ra ai, sum ai lam hpe nhkrit ai sha dai asum kaw na mahkrum madup la chye ra nga ga ai, awng dang ai lam gaw, kalang pi nshut ai lam hte gumhpawn da ai nrai nga ai shut ai lam langai hta, bai kalang nshut na matu mahkrum madup la let, awng dang lam hpe gumhpawn da ai lam rai nga ai.

 

#youth

#rvakachinservice 

    

Add new comment

2 + 4 =