Asum Ni Hte Hkrum Katut Wa Ai Shaloi

Shyinggyim prat hta, nsum ga ai nnga ga ai, law law sum ai wa hte, kaji sha sum ga ai sha shai nga ai, masha shagu sum ga ai, dai sum ai a nam chyim hpe yawng chye ga ai, raitimung, asum hpe hkap la da nga ai hkrang hte, kadup hkat ai lamsha shai nga ma ai,ndai asum ngu ai hte seng nna, mu mada lu ai hpan masum nga ai lam hpe tsun dan mayu ai.

Langai ngu na hpan gaw, kalang sum ga ai hte,dai asum a nam chyim hpe e hkrit mat nna, shawng de nsit sa mat ai, asum hpe lata sharawat asum jaw kau ai lam ndai gaw, loi loi hte asum jaw kau chye ai wa rai nga ai, dai hpan masha ni hpe gaw, asum ngu ai wa galoi mung dang la kau lu nga ai, hpa majaw nga yang, asum hpe shi gaw, mi kaw na hkrit ai myit ni hte, dang shangun da nga ai majaw rai nga ai.

Lahkawng ngu na hpan gaw, sum dat ai hte, asum a nam chyim hte, dai kaw na lu la ai lam hpe chye mat ai, hkrit mung hkrit mat ai, ratimung, dai hkrit ai madang kaw sha nhkring mat ai, dai asum hpe man – ap hkrum dang manga kau lu na matu, bai rawt jan lu tsap nga ai, dai zawn bai rawt tsap nga let, sum ai lam hpe bai hkrum katut nga ga ai, raitim, shi gaw dai asum hpe gaw dang ra na ngu ai myit hte bai rawt tsap nna, asum hpe dang na matu, naw shakut nga shi nga ai, shi a shakut shaja ai lam gaw, asum hpe masat  nga ma ai, raitimung asum a ningdat lam ni hpe gaw, asum njaw kau nga ai, asum hpe shi mung, dang hkra shakut nga let, asum hpe dang dat, sum dat hte shi hte asum gaw kahti kalai awng dang hkat nga ga ai, ndai zawn re masha gaw loi loi hte sha gaw asum jaw kau na nre lam hpe asum wa gaw chye na da nga ai

Masum ngu na hpan gaw,  asum a namchyim hpe mung chye ai zawn, shi mung asum hpe hkrit ai wa rai nga ai, raitim shi gaw asum hpe shi hkap la dat ai mabyim masa lam hpe tsawm sha matsing da nga ai, kaning re ai aten hte, kaning mabyim masa lam ni hta, asum gaw shi hpe dang kau lu ai ngu ai hpe matsing hka ja nga ai, dai zawn shi gaw, asum hpe dang lu na matu, shakut nga ai Shakut shaja ai shara hta, kalang sum shagu, shi hta matsing da hpa langai ngai lu dat nga ai, shi hta asum hkrai hkap la lu ai lam nrai nga ai, shi jaw dat ai asum hte gingdan ai mahkrum madup langai lu la hkra, shi gaw lu galaw dat nga ai, dai hku hte, asum hte shi mung kahti galai ningdat hkat let, shi gaw, shi a gawng kya ai lam hte, asum a gawng kya ai lam ni hpe gau ngwi ngwi chye na wa ai hte, shi grau nna, kung kyang wa ai, dai hku hte asum hte shi ningdat hkat ai shagu shi gaw asum hpe galoi mung asum njaw ai wa byim wa nga ai dai majaw anhte a makau grupyin hta, dai zawn masha hpan masum nga nga ai, dai hpe tsawm mu chye na ahkyak la nga ai

Langai ngu na masha hpan gaw, anhte a makau grupyin hta law law nga ma ai shan hte ni gaw, sum na hkrit ai myit hte mungkan hta sak hkrung nga ga ai, sum na hkrit nna, ngwi galaw nga ai, dai zawn sha ahkaw hkang lu nga tim ngwi la ma ai’

Lahkawng ngu na hpan gaw,shawng na masha hpan zawn nlaw nga tim, law law nga chye ga ai, shanhte ni mung, sum na hkrit ai raitim asum hpe loi loi hte dang na ah hkang njaw nga ai, n gun nga ai daram, nhtang chye ga ai, gwi ai atsam mung nga ma ai, raitim, asum hpe dang lu ai lam yan hpe gaw nlu tam nga ai, shahte ni gaw n gun atsam hte bai gasat na sha chye ai majaw mung rai nga ai

Masum ngu na hpan gaw, anhte a makau grupyin hta nau gaw nmu lu nga ai, shanhte ni gaw awng dang ai ni hku jan lu tsap sak hkrung nga ma ai, asum hte shanhte hkrum ai shadang  gaw, shawng na langai hte lahkawng na masha hpan hta grau law nga ai, jahkring hkring asum hte gasat dat, bai rawt tsap hta, gadang dat hte dai zawn gasat let, asum hte gasat ai lam hta kung kyang wa ai, shahte gaw, hpaji nga nga man ap hkrum nga ai, kalang sum shagu, mahkrum madup lu la nga ai, hpang dai hku nbyim na matu, galai shai dat ai, dai hpang hpang kalang asum hte kalang bai kadup hkat nga ai, dang ai ten ni hta mung, masat matsing da ai, grau n gun ja wa hkra, gram gring ai ni hpe  bai gram nga ai, sum ai raitim, bai mahkrum madup la let, hpang langai a matu, hkyen lajang nga ai, dai zawn madang byim wa yang gaw, kungkyang lam hte kam ai lam gaw ngang gring mat nga ai

kaja wa nga yang hkrat sum ai lam ngu ai gaw, awng dang ai lam de sa ai lam langai hta,  nhkrum nmai hkrum ra na, man – ap hkrum ra na rai nga ai, nsum ga ai ni gaw nawng dang shi ai ni rai nga ai, kalang pyi nsum ga ai nga yang, shi gaw, n awng dang lu ai ngu nna pi mai tsun nga ai, sum ai lam gaw hkrit hpa nrai nga ai, dai asum ni kaw na hpa nlu la dat na sha tsang ra nga ga ai, ga shadawn, kalang sum ga sai, tinang gaw tinang hkum hpa galai shai ra na, hpa majaw ngu ai hpe nchye dat yang gaw hpang kalang ni hta mung dai zawn masa lam hte sum chye nga ga ai

Dai majaw hpang kalang sum shagu, mahkrum madup lu la hkra shakut gring nga ai, hpang kalang hta, ndai zawn nshut na matu, nsum na matu, tinang gaw hkyen lajang lu yang, dai madang ram hpe tinang gaw tawt lai lu sai rai nga ai sak prat ngu ai hpe majan ngu mu mada ai ni nga ai zawn game ginsup ai zawn hkam la ai ni mung nga ai, ndai madang hta tinang gaw sum taw ai hpe dang yang she, hpang madang langai de lung nna, ginsup ra na rai nga ai, dai majaw mahkrum madup ni hpe mung, jai lang ra na rai nna, ndai hta grau kaja hkram gara hku galaw ra na ngu ai hpe galoi mung myit sawn nga ga ngu n gun jaw dat let,

#youth