Aput Apai Ntsun Ai Sha Ra Ai Hpe Lu Hkra Shangun Ga

Tsawra hkungga ai kun dinghku kanu kawa ni anhte la ni mi rai rai,num ni mi rai rai dinghku kata lam ni hta myit dik ai lam nnga yang nnga ai daram aput apat ngoi put ai lam hpe galaw chye ga ai.

Anhte kade daram aput apai ngoi angwun nga tim na kahtet hkam let nchye ai zawn rai nna nga ai ni mung nga ai zawn,na kahtet nkam hkam ai majaw tsan ai de pru hkawm yen ai ni mung nga nga ai.Dai majaw langai ngai hpe aput angun nga tsun hkyen shagu anhte myit yu ga ngu tsun mayu ai.

Aput angwun nga jawp tsun dat ai rai yang tinang ra ai lam lu mai ai gaw teng ai kun?na kahtet dam n kam hkam ai majaw galaw dat ya ai nga tim tsawra shawang myit hpring hte galaw ya ai lam nmai byin ai re majaw mahtai kaja pru na gaw nmai byin ai hpe mu lu nga ai.

Anhte nkau kanu num ni gaw mara shagun aput angwun nga ngoi nga ai majaw dum nta hta npyaw nna shinggan de pru hkawm let pyaw hpa lam tam ai ni byin wa chye nga ai.Kashu kasha ni nga jang mung kanu aput angwun nau nga ai majaw bai tsun yang mung lai kyang byin nna nhkan sa nhkan galaw ai laikyang ni byin chye wa nga ai.

Dai majaw aput angwun nga tsun ai lam n galaw ai sha tangdu hkra tsun bawngban nna byin mayu ai lam hpe byin hkra galaw la ra  ai ngu mu mada ai.Ningrum ningtau wa hte kashu kasha ni dum nta hta nga pyaw shangun mayu yang shanhte hpe mara shagun aput angwun galaw ai masa lam hte shanghte hpe n galai shai lu nga ai.

N galaw shi ai lam hpe mara shagun ai gaw galaw na wa hpe myitru shangun ai hte tsawra shawang myit hten shangun ai hte bung nna galaw ngut ai lam hte seng nna mara shagun ai hta lahkawng maga myit ru myit daw shangun ai lam sha byin chye nga ai.Dai majaw mara shagun aput angwun tsun ai lam gaw kanawn mazum lam hpe hkra shangun nna kaja ai lam hpe lu na matu nloi nga ai.Dai hta grau kaja ai masa lam hpe tam ga ngu tsun mayu ai.

Ga shadawn ningrum ningtau hpe nta de jau jaw wa shangun mayu jang nta de nwa dingsa phone hte matut mahkai san jep ai lam hpe n galaw ai sha hpang hkrat yang hpa majaw majaw hpang hkrat ai hpe atsawm sha san ga.Ngut nna shi tsun ai hpe atsawm sha masing da ga.Hpang shani nta kaw nna bungli de nsa shi yang myit asan nga ai ten hta dai ni gaw myit tsang ai la nnga hkra chyeju hte jau jau wa rit yaw ngu htet tsun mai nga ai.

Hpang hkrat yang myit tsang ai lam hpe mara shagun ai nsen nlawm ai sha tinang a hkam sha lam hpe dawn jan ai lam nbyin hkra atsawm sha tsun mai nga ai.Dai zawn sha tinang maga kaw nna atsawm sha simani madat pyaw ai nsen ni hte tsun shaga galaw sa ai rai yang shi a laikyang ni mung gau ngwi ngwi galai shai wa na ra ai.Tinang maga kaw nna myit gaw galu ra nga ai.Ningrum a myit hta nta wa hpang hkret jang ningrum jan myit tsang nga na re ngu ai myit chye ai gaw manu dan nga ai.Ningrum hpe nkam ai hta myit tsang ai hpe shi a kraw de shang shangun nga ai re.

Anhte kun dinghku dum nta lam hte seng nna kashu kasha ni hpe mi rai rai,ningrum hpe mi rai rai tinang tsawra ai ni hte seng wa jang tinang a tsawra shawang lawm ai ga hte lai kyang ni hpe law law jai lang ga.Shanhte hpe  shangun ai,darum maga hte gyit hkang ai lam ni nmu shangun ai sha shanhte a garum madi shadaw ai hpe ra nga ai nga jang shanhte a ginhtang ai lam ni gaw grau kasha ai masa ni galaw wa chye nga ai.

Dai hta n ga shanhte hte seng nna nra ai lam ni nga ai raitim tinang a myit hta nra ai hpe tsun ai hta tinang ra ai hpe lata tsun nna shanhte hpe galaw shangun mayu ai lam hpe galaw u ngu ntsun ai sha galaw ya na matu garum hpyi  gaw grau nna kaja ai mahtai lu na rai nga ai.Dai majaw dum nta kata kanawn mazum lam hta aput angwun nga ntsun ai sha ra ai byin shangun mayu ai hpe byin hkra galaw na nga jang shanhte hpe mara shangun ai lam hpe koi gam ga.Shanhte hpe aming matsun njaw ga,shanhte myit sawn lu na aten jaw ga.Shanhte a garum shingtau madi shadaw ai lam hpe masat masa galaw shakawn ga,grau nna ahkyak la lanu lahku ga.Shanhte zawn shanhte hpe garum hpyi nna tinang ra ai lam hpe lu hkra galaw ya grau kaja nga ai.

Bai nna kashu kasha ni hte seng wa jang mung kashu kasha ni a gawk maru marang byin nga ai hpe jasan jaseng shangun mayu jang grai lagawn ai ngu aput angwun ngu mara shagun tsun jang shanhte rawt galaw na raitim hpang kalang mung aput angwun ngu ntsun dingsa gaw shanhte galaw na nrai nga ai.Mara shagun tsun ai lam gaw hpang kalang nbyin na matu nlu makawp maga nga ai.Hpang de dai zawn nbyin hkra gara hku galaw shangun na ngu ai mahtai hpe mahtang myit yu mai nga ai.

Manghkang nbyin,na zim lu jang rai sai nga nna loi ai ladat hte dum nta garum shangun masha hpe shaga nna shanghte a gawk hpe jasan jaseng shangun na i?tinang hkum nan galaw ya na i?Dai nga jang hpang de galoi mung shanhte a gawk shanhte jasan jaseng sana nrai nga ai.Byin gring ai gaw shanhte gawk hpe shanhte chye na ai myit hte galaw jasan shangun mayu ai.Jasan jaseng na matu shanhte hta lit nga ai ngu ai hpe chye na gawk jasan jaseng chye ai laikyang nga hkra galaw ya na gaw grau kaja nga ai.

Dai re majaw dum nta masha yawng hte seng ai shara ni hta maru marang rai nga ai hpe mara shangun nga na hta hpang de nbyin hkra gara hku hparan galaw na ngu ai hpe jawm myit yu ga ngu shadut ai gaw yawng hta lit nga ai ngu hpe ningmu jahpaw ya na gaw grau kaja nga ai.Yawng hpe shaga nna dum nta hta maru marang maza nga ia hpe gara hku galaw yang kaja na hpang de nbyin hkra gara hku jawm galaw na ngu ai hpe hpaji hpyi bawngban la nna yawng lit garan la nna jawm galaw ai gaw grau kaja nga ai.

Anhte gaw tinang galaw shangun mayu ai hpe dai galaw u ngu tsun yang kadai mung myit lawm hkum lawm hte n kam galaw ma ai.Galaw ya gring ai ngu tsun tim nkam galaw ai ni gaw aten lam jahpai chye nga ai.Raitim garum ya ri ngu ai masa hku nna tsun jang gaw myit lawm hkum lawm hte galaw ya na rai nga ai.

Dai re majaw tinang ningrum hpe gara hku nga u ngu ntsun ai sha shi hpe tsawra shawang myit kaba hte tsawra ai lam manu shadan ai lam hpe a gup aga laikyang ni hte madun da ga.Dai gaw kun dinghku dum nta kaja dik ai kanawn mazum lam langai rai nga ai law.