Akyu Hpyi Shakut Ra Ai Lam ( Youth Program )

Tsawra ai ramma kanau kasha ni,phone langai hta, wan sat buu langai gaw, grai nan shai la nga ai. Anhte ni yawng smart phone hpe gaw, shara shagu hta gun sa chye nga ga ai. Bai ten tup ngu na daram jai lang nga ga ai, njai lang ai ten ni hta mung, tinang hte ni htum ai shara da tawn da bang da chye nga ga ai. Wan sat buu hpe gaw, shara shagu hta nkam la sa nga ai, kalang lang gara kaw tawn kau da ai pyi nchye nga ga ai re, nchye tim gaw nra nga ai. hpa majaw nga yang, wan sat buu ngu ai gaw, ahkyak ai ten ni hta she jai lang ra ai hpan rai nga ai majaw re. Wan hkru ai hkan she jai lang ai baw hpan rai nga ai.

Dai zawn sha tsawra ai ramma kanau kasha ni, akyu hpyi ai amu magam hpe, dai wan sat buu zawn, tsan ai shara de tawn kau da chye nga ga ai. ra ahkyak yang she jai lang chye nga ga ai ni hkrai rai nga ai. Grau nna gaw, hkam nkaja ai ten ni, ru yak jam jau hkrum ai ten ni, zawn re ai ni hkan she, akyu hpyi ai amu magam hpe galaw chye nga ai ni anhte ramma ni law law rai nga ga ai re. Kaja wa nga yang tsawra ai ramma kanau kasha ni, phone langi zawn sha, tinang hte ndaw nhka, galoi mung gun hpai taw nga ra ai lam yan langai re sha n-ga ten shagu akyu hpyi manoi manat nga ra na rai nga ga ai ngu ndai shara kaw  n-gun jaw shadum mayu ai.Galoi shagu akyu hpyi ra ai ngu ai hta, tsawra ai ramma kanau sha ni ten tup nawku jawng kaw sha nga, nlu nsha nyup nsha kyu hpyi ra ai ngu ai hpe tsun mayu ai gaw nrai nga ai.Tsun mayu ai gaw, anhte nang ngai yawng a , myit masin kraw lawang kata hta, madu karai kasang hpe hkungga shakawn ai lam rai nga ai. Nang bungli galaw nga ai mi rai rai, sha taw nga ai mi rai rai, yup taw nga tim, Madu karai kasang gaw, nang hte galoi mung rau nga nga ai hpe, chye da, hkap la hkam sha lu na ra ahkyak dik rai nga ai. Myit daw myit hten nga ai ten, karai kasang hpe kam hpa chye ju shakawn ai lam, pawt sindawng mayu wa ai ten, myit masin kata, chyeju hkum sum hpa hpe, hpyi ai lam ni mung, akyu hpyi ai amu magam nan rai nga ai. Anhte ni a, myit sawn lam ni hpe jahten kau chye ai lam ni hpe, n-myit, tinang a tingkyeng a matu hkrai nmyit ai sha, shawa a matu, myit sawn ya ai lam ni mung, myit kraw kata na, akyu hpyi ai lam langai rai nga ai.Tsawra ai ramma kanau kasha ni yawng gaw, tsawra chye nga ga ai. Langai hte langai tsawra hkrup ai ten, anhte a ahkying aten ni law malawng gaw, shi a matu sha rai wa chye nga ai. Tinang a myit sawn lam ni yawng, shi chyu gaup chye nga ga ai. Kalang kalang, n-gun atsam langai zawn byim wa chye nna, kalang lang gaw, myit machyi hpa chye byim nga ai re.

Dai majaw anhte ni, akyu hpyi ai amu magam hta, pyaw mat sai nga yang, dai zawn chye byim mat nga ai. Anhte a ahkying naryi setkan shagu hta, madu karai nga ai hpe hkam sha  lu nga ai. Ndai ten sha nga ai lam hpe, tinang hpe htinghkang hku n-mu mada wa nna, tsawra madu hku nna sha, mu wa chye nga ai, dai zawn sha, sak prat mung, lachyum rawng wa nna, tinang galaw sa ai lam shagu hta, madu karai hte hpang nna, madu karai hte sha,jahtum na rai nga ai. Akyi hpyi ai a lachyum gaw, Madu karai kasang hte, matut mahkai ai lam, ga shaga ai lam rai nga ai. Madu karai kasang gaw, shara shagu hta, nga nga ai. Dai majaw, madu karai kasang hpe, ten shagu ga mai shaga nga ai. Dai madu hta, phone pat ai, matut mahkai nlu ai shara de du nga ai lam nnga nga ai. Madu karai kasang gaw, anhte nang ngai ramma ni hpe galoi mung aten nlata, hkap tau hkalum la nga ai re. Nang yup rawt ai hte,madu karai kasang hpe, ngwi pyaw ai manap rai u ga,  chyeju kaba sai nga nna mai tsun nga ai. Nang shat shadu ai, rai hkrut ai, bungli ten yawng hte, dai madu hte ga mai shaga nga ai re. Shani ting pu ba lam ni hpe, akyu hpyi ai lam hta, hku hkau ai manang zawn mai tsun dan nga ai re. Hpawt de na matu, nang a tsan ai myit ni, bungli magam hta, shut shai na lam ni, shatan katut na lam ni, tinang gaw jaw ai lam yan maga galaw sa nga tim, sawn la shut ai lam ni, shakut ai daran n-awng dang ai lam ni yawng, dai madu hpe tsun dan mai nga ai. Dai mung, man man akyu hpyi nga ia hte bung nga ai re. Dai hku rai yang mara langai ngai hpe, galaw hkrup ai nga yang mung, madu karai kasang hpe, hkrit myit nnga ai sha mu mada chye wa lu na rai nga ai. dai rai yang, madu karai kasang a, mara raw ya ai lam hkrum nna, prat nnan hte gaw sharawt lu na teng sha rai nga ai law. Nawku jawng kata hta she, laphut hput di nna, kyu hpyi yang she, kyu hpyi ai ngu nmai tsun nga ai. tinang a phone zawn sha, galoi mung jai lang nga ra ai. lam shagu a matu, makawp maka ra nga ai. Wan sat buu zawn ra kadawn yang she, tin shapun tam ai baw hpan nrai nag ai.

Tsawra ai ramma ni e, Tsa dan a madung lit gaw, anhte hkristan ni hpe, akyu hpyi ai lam hta, gum lau na matu rai nga ai. akyu nhpyi ai sha, sharin matsing ai lam ni, magam bungli galaw ai lam ni,nawku magam hta shakut ai ni hpe tsa dan gaw kaji mi pyi nhkrit ai wa rai nga ai. anhte a nyan marai hte shakut shaja nga ai hpe tsa dan wa gaw, mani asawng nga ai re. Raitim, anhte akyu hpyi ai magam galaw yang, grai hkrit ai wa rai nga ai. Dai tsa dan wa gaw, anhte hpe bungli langai hpang langai galaw na ahkang jaw nga ai. Akyu hpyi ai magam hta lai na, ngam nga ai ni yawng galaw na matu n-gun jaw ai wa rai nga ai. anhte ni myit lawm hkum lawm akyu hpyi ai magam n-galaw lu na matu, myit bra shangun ai baw hpan law law hpe gin shalat chye ya nga ai. Dai majaw tsawra ai ramma kanau kasha ni, ndai lam yan ni hpe awng dang tawt lai na matu, anhte nang ngai yawng akyu hpyi ai magam hpe grau shakut ra nga ai. galoi mung man man akyu hpyi shakut shaja ai hte, akyang langai byim hkra shakut ra nga ai. Jahtum hku nna, tsun ga nga yang, akyu hpyi ai magam hpe galoi mung galaw shakut ra nga ai , bai nawku jawng kaw sha sa nna, akyu hpyi ai hpe tsun ai sha nrai na, karai kasang kaja nga ai lam hpe hkap la kam sham let, dai madu hpe kam shamyet let, mai byim ai daram, shi kaw manoi let, ga shaga ai lam ni, mayak lam ni hpe hpaw tsun ai hte, hku hku hkau hkau nga ai lam ni gaw, akyu hpyi ai lam yan ni rai nga ai ngu gam gran dat lu nngai law. 

#youth

#rvakachinservice