Masha langai hte langai a kyang lailen ni gaw, nga kaba wa ai ginra masa, sharin achyin hkam la ai lam, kanawn manang ni, shi nan madat mara ai lam hte, shading sharai la ai hta hkan nna, shai hkat nga ai, kyang lailen ngu ai gaw, anhte ndum shami glaw taw ai lam ni re, kyang lailen amyu myu hpe maram yu yang, hpan masum mu lu ai.
- 1.Kaja ai kyang lailen ni: Hkungga la ra chye ai, tau hkrau hkyen lajang chye ai, myit tau ya chye ai.
- 2.Nkaja ai kyang laen ni : Lam shagu hpe nmai byim ai maga hku sha chye mu ai, myit kaji chye ai, mara shagun chye ai..
- 3.Kaja ai mung nrai, n kaja ai ngu mung tsun nmai re ai kyang lailen ni : Shana e hka shin ai, shi laika hti yang, ndau shiga laika man kaw na hti hpang chye ai. Shatmai ntsin nlawm yang shat nchye sha ai..etc....
Anhte akyang lailen ni gaw, anhte hpe mai kaja ai lam ni shabyin ya lu ai zawn, htenza lam de mung shayawng dat lu nga ai. Laika ka Sara Kaba Samuel Smiles tsun ai gaw, * Sawn yu ai lam langai gaw, galaw ai lam langai hpe shabyin ai. *Galaw ai lam langai gaw, kyang lailen langai hpe shabyin ai. * Kyang lailen langai gaw,Laikyang langai hpe shabyim ai. * Lai Kyang langai chyawm gaw, shawng lam langai hpe shabyim ya lu nga ai. “ Kyang lailen” ni a jaw e, anhte a “ shawng lam “ kaja wa lu ai hte maren, hten run wa lu ai hpe, sara smile htawng madun nga ai, Myit mada shara gaw.....Masha gaw kyang lailen ni hpe galai shai kau lu ga ai. Ga shadawn: anhte ni lata hkintum ai ( folding arms ) shaloi, pai lata hpe lahta e tawn ai hpe akyang langai hku galaw man ai rai yang, hkra lata hpe mahtang lahta e tawn ai hku shaman chyam yu ga, Shaman ai nhtoi kade nna yang sha, ta hkintum lai nnan gaw kyang laiken tai wa ai hpe mu lu na re. Dai majaw madu hkum madu jamna kaw yu let, “ Nye kyang lailen ndai hpe nra ai law “ ngu tsun nhtawm grau kaja ai kyang lailen langai hpe, galai lu hkra shakut mai nga ai. N kaja ai kyang lailen ni hpe jashai kau na nloi ai zawn, akyang kaja langai hpe shakap la na matu mung yak mali ai, raitim byim mai ai Asak grau kaji magang, kyang lailen galai shai la grau loi magang re ai hpe kyang lailen hte seng nna chyechyang ai ni sawk sagawn da lu masai. Kaning re kyang lailen ni hpe, Masan sa awng dang ai Ramma ni hta mu lu nga ga ta?
Kyang Lailen 1: Madu hkum madu kam ai hte galaw hpang ai ( Madu a prat hkrun lam hpe madu lit la ai ) – Madu galaw lai wa sai lam ni, galaw nga ai lam ni hpe, lit la chye ai akyang re. lama ma dawdan wa ra ai shaloi, kabrawng ai myit hte, akajawng sha hkam sha lam hte ndawdan ai sha, myit azim sha tawn nhawm, madu a myit jasat hpe mahtang mahta nna, sung sung sawn yu let, dawdan galaw chye ai. Dai majaw, kaga masha hpe mara shagun na lam n nga ai, Madu nlu hkang/ jashai ai lam law law hpe hkan myit tsang/ pawt/ yawn nga na malai, madu hkum hpe madu dang hkra hkang chye ai lam re. Ga shadawn : “ Ngai gaw ndai kanu kawa, dinghku hta shangai wa ai hpe myit npyaw,nra byim taw na malai, nye dinghku masha ni hte prinem hkra, ya na masa hta grau galu kaba hkra galaw na lam tam na gaw, nye lata kaw re “ ngu ai hpe chye na hkam la let, lam tam shakut ai.
Kyang lailen 2 : Bandung tawn nna, galaw hpang chye ai. ( Madu a shawng lam hpe madu nan nhkang jang masha kaga ni mahtang hkang wa na re. Madu sak hkrun lam a bandung masat u ) – Byin mayu ai lam hpe tsang lahkawng hku shabyin la lu ai. Dai tsang ni gaw, myit shingran mu tawn ai tsang hte shingran tawn ai hpe hkrang shapraw ai tsang ni re. Masha ni, kun dinghku ni, wuhpung wuhpawng ni, yawng gaw shawng lam hpe tau shingran mu da nhtawm dai shingran hte maren byim wa, tai wa hkra shakut chye ga ai. Dai myit shingran ni gaw, shanhte hta rawng ai manu shadan ai lam ni, hkan sa ra ai ngu hkam la da ai rip kawp ni, kanawn nga ai masha kaga ni hte mahkri shawn matut mahkai taw ai lam ni mahkra hta e, mahta nna pru wa chye ai rai nga ai. Ga shadawn : “ Du na shaning 20 ning hta ngai gaw jak rung kaba langai hpe hpareng nga na re” ngu myit shingran mu da ai ramma langai gaw madu a shawng lam a bandung hpa baw re hpe asan sha tawn da sai re.
Kyang lailen 3: Ahkyak tawn ra ai hpe shang galaw chye ai. ( Gara grau ahkyak ai hpe dawdan u. Grau ahkyak htum hpe shawng galaw u ) Ahkyak tawn galaw ra ai hpe shawng galaw chye ai gaw, madu myit shingran mu da sai bandung hpe kaja wa byim wa hkra galaw ai ga re. Bandung tawn da sai hte maren, dai kaw du hkra, galaw na ngu nna galoi mung myit hta bang tawn let, dawdan galaw sa wa chye ai. Dai pandung kaw na lam woi yit na lam ni hpe ahkyak ai ngu nsawn sai. Ngalaw sai. Ga shadawn: Manager kaba byim mayu ai ramma wa/ jan gaw shi a aten law law hpe manager byim wa lu ai hpaji hparat sharin achyin la ai hta ahkyak tawn jai lang ra nga ai, shing nrai yang gaw, shi a bandung gaw, “ Nbung kaw nta gap da ai hpa” rai mat na re.
Kyang Lailen 4: Dang-Dang masa hpe tam ai ( Dan –Dang masa tam ai ngu aii gaw, shada da hkungga chye na hkat let, lahkawng maga akyu lu la ai ladat hte, ganawn mazum chye ai lam re )
Ndai masa gaw galoi mung “ Ngai gaw masha wa byin mayu ai hpe sha hkan galaw ya chye ai” ngu ai shagawm kau lai masa nre ai zawn, “ Ngai ra ai hku sha rai ra ai “ ngu ai tingkyeng shanang ai lai masa mung nrai nga ai. Kun dinghku kata e mi rai rai, wuhpung wuhpawng kata e mi rai rai, “ Ngai “ “ Shi “ ngu ai hta, “anhte” ngu ai shada da zinlum shamyet hkat chye ai myit masa hte dawdan galaw ai lai masa nan re,
Ga shadawn: Ramma ni a alu tam lamang langai galaw na ngu ga, Mahkawn chye hkawn ai ramma ni gaw, stage show galaw mayu ai raitim, ka manawt chye ai atsam hte, kaga atsam rang ai ramma ni hpe mung, atsam madun na ahkang jaw ai rai yang, ramma ni a stage show gaw “ Variety Show “ langai hku grau hkum tsup ai hte shawa a ra amyu myu hpe mung jahpring dat ya lu nga ai.
Kyang lailen 5 ; Masha wa hpe chye na hkra shawng shakut nna she, madu hpe kaga ni chye na wa hkra galaw ai ( Masha gaw Na! lahkawng hte, N-gup langai tu ai. Masha kaga ni tsun ai hpe myit lawm hkum lawm madat ya u ). – Madat nga ai shaloi, ngai mung gara hku tsun dat na ngu ai myit hte nre ai sha, kaja wa chye na mayu ai myit majing hte, madat yang sha, shada da matut mahkai lam, chye na hkat ai lam, kanawn mazum lam ni hpe, gaw gap la lu ai. Masha wa hpe chye na hkra shakut ai gaw, Matsan dum lama chye ai myit, kaw na pru wa ai; Madu hpe masha ni chye na wa hkra shakut ai gaw, Nden ja ai myit kaw na pru wa chye ai, Ndai myit masa lahkawng hpe rap shara let, chye tawn ra mali ai, Ga shadawn: Nkau ni gaw, kaga ni tsun mayu ai hpe, htum hkra madat ya, chye na hkra galaw nna she, madu a ningmu, hkam sha lam ni hpe bai tsun dan chye ai, Nkau mi gaw kaga ni tsun taw nga ai garai n ngut shi yang, shi tsun mayu ai hpe shang kajau tsun chye ai.
Add new comment