Madu Hkum Hpe Kam Ai Myit Gaw Sharawt Let Shawng Lam De Sit Sa Ga ( Youth Program )

Tinang hkum tinang kam ai myit ngu ai, atsam ningja langai gaw, awng dang rawtjat mayu ai masha shagu hta, nga gring ai atsam marai langai ngu mu mada lu ai. Dai hku nga yang, madu hkum kam ai lam ngu ai gaw hpa rai? tinang hkum tinang kam hkra gara hku gaw sharawt ra na. Tinang hkum tinang kam ai lam hpe gaw sharawt ai lam gaw, loi ai lam yan nrai nga ai zawn, yak hkak ai lam langai hku mung tsawra ai ramma kanau sha ni hpe nmyit la shangun mayu ai. Bai ndai lam gaw, manang wa sa let, gaw sharawt ya mai ai lam mung nrai nga ai re.

Shawng nnan e anhte a makau grupyin hpe, maram dat yu yang, law malawng maga gaw, madu hkum hpe kam ai lam hta, gawng kya ai lam law nga ai hpe mu mada lu nga ai, hpaji maga hku sha shawng nnan hka ja yu ga nga yang, jawng ma law malawng maga gaw, tinang nchye na ai lam ni hpe san na lam hta pyi, hkrit gaya nga  ai hpe mung mu lu nga ai, dai majaw law malawng maga gaw, jawng lung ram ma prat ten kaw nna, ya na zawn san ai lam, bawng ban ai magam ni hta, hkrit gaya ai lam gaw, masha kaba, bungli shang ai ten ni du hkra, ndai hkrit ai lam ni ga-up wa mat ai rai nga ai. Ndai lam ni a mahtai gaw, tinang nchye na dat ai lam ni hpe, san ai lam, tsun shaga ai lam, bawng ban ai lam akyang ni n-nga mat ai daram rai mat nga ai. Dai ten, tinang a hpaji, magam bungli ni hta, hpaji n-nan hpyi ai ten ni hta, tinang maga shang lawm ai lam ni yawm wa nga ai, ndai lam ni gaw, tinang a prat, rawt jat galu kaba wa na lam ni hta, shinggan da ai zawn byim wa chye nga ai re, dai majaw, tinang hkum kam ai lam hpe gaw sharawt ai lam hta, galaw gring ai lam yan ni hpe, nhkrit ntsang ai hku, man ap hpran ailam, shut ai lam ni hpe mung, tsun gwi, tsun shaga bawng ban lu ai atsam ni hpe gaw sharawt wa chye na matu tsawra ai ramma ni hpe n-gunjaw mayu ai law.Dai hta n-ga, anhte a ya na prat gaw, lam shagu hta asan brang lang, mu mada lu nga ai prat hta, ning tawn nga ai ramma ni yang a matu, ahkaw ahkang ni ngu ai gaw, hkap tau la ding yang she rai nga ai re.  Madung hku nna, anhte ni hpaji sharin hkam lu ai scholars shawk ai lam ni hta mung, tinang hkum kam hpa ai myit nga ai atsam langai gaw, graik nna ahkrak shang lawm nga ai hpe mu lu ai. Tsun mayu ai gaw, kade ningtawn tim, tinang hkum kam ai lam hta n-gun yawm wa yang, tinang hte ging dan taw nga tim, nhkam la lu ai shadang gaw grau law mat chye nga ai re. Dai majaw ya na zawn laika hpaji hte seng ai scholars shawk na matu shakut nga ai ramma ni yawng hpe e, madu hkum kam ai myit hpe nga hkra shakut sa wa ga ngu madi madun n-gun jaw mayu ai.

Bai Tsawra ai ramma ni, magam bungli makau grupyin maga hpe bai yu yu ga nga yang mung, ya sha tsun lai wa ai madu hkum kam hpa ai myit hpe san jep yu shangun mayu ai. Anhte ni bungli shawk ai ten, yawng chye ai hte maren, masha hkum dek hpe interview galaw ai hte, tinang a lawng lam ni ka da ai laika pa ni hpe ka da ra ai mahkrum madup hkrum na sha rai nga ai. ndai shara ni hta, na a madu hkum kam ai myit ni hpe masam maram yu nga ai hpe mung sadi chye da shangun mayu ai. Dai majaw, tau hkrau hkyen lajang da yang she, awng dang ai mahkam de lu hkawm sa lu na rai nga ai. dai hku nre ai sha, bungli pyi nshawk shi ai kaw na, madu hkum hpe kam da ai myit nnga taw nga yang dai zawn interview galaw ai ten ni hta, tinang a mu mada lam yan ni hpe, asan brang ntsun gwi, nsan gwi ai lam ni gaw, nang hpe san jep nga ai wa a matu, nang hpe hkungga kam da ai lam ni yawm wa na gaw teng sha rai nga ai law.

Raitimung, ndai madu hkum kam hpa ai lam gaw sharawt ai hta, tinang a mahkrum madup hku nna mung, myit kaji ai hte, lata sharawt asum jaw kau chye ai zawn, nkau mi bai rai yang, dai mahkrum madup hpe, npawt da let, ngang gring ai kam ai myit ni hpe bai gaw sharawt nga ma ai lam, makau grupyin ni hkan mu lu nga ai. Ga shadawn, Mundan a ningbaw ningla kaja ni hta mung, anhte ni mu mada lu nga ai sha n-ga, tinang a makau grupyin ni hta mung, masha kaba, ramma nlata, mu nga lu nga ai mung, n-gun lu hpa langai rai nga ai. Dai majaw, dai ni hpe yu n-gun lu taw ai hte sha n-ngut mat nna, tinang a makau grupyin ni hta, katsi la mai ai ramma ni byim tai wa hkra shakut sa wa ga. Jahtum hku nna, tsun ga nga yang, madu hkum kam hpa ai lam hpe gaw sharawt ai lam hta, kalang marang tinang a mahrkum madup ni gaw, kam hpa chye ai myit n-gun hpe yawm wa shangun nga tim, tinang a shakut shaja ai atsam marai hte e, bai gaw sharawt ra nga ga ai.dai majaw myit kaji nga taw na malai, tinang galaw lu dat ai, magam bungli lam yan ni hpe, myit sum ru n-gun la let, n-gun ban la chye ra nga ai. Tinang chye tawn da sai rai nga ai, masha hkum ngu shagu tinang a gawng kya ai lam, n-gun lu ai lam ni a majw, tinang a, n-gun lu hpa atsam ni hpe bai sum ru nhtawm, pan dung jahkrat let, madu hkum n-gun jaw chye ra nga ai. Tinang myit lawm ai lam yan magam hpe, hka ja dinglik yu nna, dai magam bungli, dai hpaji hpe, myit lawm hkum lawm ai hte, galaw shakut ai lam gaw, madu hkum hpe kam ai lam yan hpe gaw sharawt ai hta, madi shadaw ya nga ai sha n-ga, grau masan sa ai prat magam hta hkawm sa lu na rai nga ai ngu tsawra ai ramma ni pe n-gun jaw dat let..  

#youth

#rvakachinservice