Myitkyina Saradaw Ginwang A Ndau Shana Ai Lam

Hkristu Madu hta tsaw ra hkungga ai nu, wa, hpu, nau ni yawng hpang de shiga kadun mi shana dat nngai.

Myitkyina Saradaw Ginwang Up, Wa Saradaw Francis Daw Tang, bungli kaw nna hkring sa na matu ahkang hpyi dat ai hpe, Roma mare e nga ai Wa Sarabyin Francis kaw nna hkap la ya sai lam hpe Myanmar Mung Kahtawlik Saradaw ni kaw nna 2020 Ning November Shata (18) Ya shani ndau dat sai.  Dai hta mahta nna, Gloria News Journal (GNJ) lit hkam, Salang Joseph Kung Za Hmung gaw ndai shi a shiga laika hta shi sawk sagawn la lu ai lam hpe Inglik ga, Myen ga ni hku nna ka mara da ai hpe hti la lu na saga ai.  Dai hta n jaw ai hku sawk sagawn, Jau ni hpe mara shagun, ka da ai hpe mu lu ga ai.

Dai majaw, Myitkyina Saradaw Ginwang a Hpaji jaw Jau Salang ni gaw, Salang Joseph Kung Za Hmung  sawk sagawn ka da ai shiga ni shut nga ai lam, Gloria News Journal (GNJ) lit hkam Salang wa shi hkumnan hpe mung, Myitkyina Saradaw Ginwang hpe gan lit la yu reng nga ai (The Apostolic Administrator) Saradaw Kaba Cardinal Charles Bo hte hkring sa sai Wa Saradaw Francis Daw Tang hpe mung, sang lang madi madun mahtai jaw laika hpe shagun ya saga ai.  Shi Salang wa dai zawn galaw ai gaw, Myitkyina Saradaw Ginwang ting a sari hpe ahtu hkra shangun sai majaw, shi a Gloria News Journal (GNJ)  shiga laika shawng na maisau pa man hta (Inglik hte Myen laika hku) ka nna bai tawngban na matu hpyi dat saga ai. 

Shawng, hpang, myit kanau, chye myit ai Wa Saradaw Kaba Cardinal Charles gaw, daini anhte yawng hkrum hkra nga ai hpyen majan, Covid-19 ana zingli ni hte myit ru hkrit tsang lam ni hpe tau nna, shada sharu shayak ai lam ni n nga u ga; shada tawngban-mara dat ya let tsaw ra, simsa, shada garum shingtau hkat let nga ga ngu nna lam madun hpaji jaw ya sai.  Dai majaw, Gloria News Journal (GNJ) Lithkam Joseph Kung Hmung mung, shi sawk sagawn ai lam ni n hkum n tsup ai hte n jaw ai shiga ni majaw, shi shut kau sai lam bai htang shana wa ai.

Ndai hta, shi bai htang ai laika yawng hpe n rai, shi shut sai lam hpe yin la ai daw hpe sha, shawa yawng mu chye la lu na matu lawu e bang dat nngai.   De a lachyum gaw, "Hpaji jaw Jau Salang ni shagun ya ai lawng lam (7) hpe mu hti la lu sai; dai ni gaw, ngai sagawn la lu ai ni hte shai nna, sakse ngang kang ai hte hkum tsup nga ai.  Ngai, masha ni hte hkrum shaga shiga la ai lam n kau mi shut nga ai hpe ngai dum ni ai.  Wa Jau hte Myitkyina Saradaw Ginwang na Hpung masha ni yawng hpe, ngai htinggrum makoi shiga la nna n jaw ai shiga ni hpe jaw kau ni ai majaw tawngban dat nngai," ngu ai re.

"I found a slew of new information in your 7 documents which are strong, resourceful and different from my sources too. As you are the Chancellor of the diocese of Myitkyina, I was convinced from your clarification that some of my written information was wrong which I received from the people whom I interviewed."

"Lastly, not the least, I hereby would like to apologize to you and all people in your diocese for my wrong information which I received from the people whom I secretly interviewed."

May our Lady guide and protect you and your diocese.

With my humble apology,

Joseph Kung Za Hmung @ Win Hlaing Oo

Publisher cum Editor-in-Chief

Ndai shiga ni a majaw, lai wa sai ten hta nu, wa, hpu, nau, ni myit un gang, myit kahtet, n ngwi n pyaw, n ju ndawng,  pawt sindawng ai lam ni nga lai wa na masai; anhte gaw teng man, tara rap ra ai hpe ra ga ai; raitim, shi hkumnan tawngban hpyi nem sai majaw, anhte a Hkye La Madu Yesu a Mying Ningsang hte Joseph Kung Za Hmung (sh) Win Hlaing Oo hpe mara dat ya, shi a matu akyu hpyi ya let, matsan dum lama ai hpe jawm madun ga. 

Ndai lam ni hpe malap kau nna, shawng de jawm sit sa wa ga; Myitkyina Saradaw Ginwang, chyoi pra, san seng, rawt jat galu kaba wa nna, Sasana majen je ai magam hta kabu gara, myit hkrum myit ra rai, jawm n-gun dat shang lawm sa wa ga ngu nna n-gun jaw dat nngai law.

Wa Jau Dr. Joseph Gawlu Yung Wa, S.Th.D.,                                  

Ninggawn Amu Madu

Myitkyina Saradaw Ginwang Rung

Kahtawlik Nawku Hpung