Shinggyim Masha Ni Galaw Lai Wa Ai Jahten Shaza Lam

Shinggyim masha hpe Karai Kasang a Hkrang bung sumla hte Hpan da ai re ngu ai hpe grai ahkyak ai masa hte sumru dinglik ai lam ni galaw nga ga ai masa hta,maga mi de mung hkrung hkrung tu ma tu mahkra hpe hpan da ai lam hta shi hte shi langai hpra a matu Karai Kasang a yaw sing tawn da ai lam hpe mung malap mali di kau nmai nga ai.Gaman li la re hpa manu dan lachyum pru ai lam nnga ai ngu nna tsun kau mai ai hkrung kanu langai mung nnga nga mali ai.

Mungkan pinra ntsa mu mada lu ai hpan da hkrum ai tu ma tu hkrung mahkrung mahkra gaw Shinggyim masha a ntsa Karai Kasang tawn da ai shadawn ndang ai tsawra myit hpe madun shaleng ndau ya nga ai.Nam maling bum marawn hka shi hka nu mahkra gaw Karai Kasang a tsawra myit hpe madun shadan shaleng ya nga ai.Anhte shinggyim masha kadai raitim mung tinang a matu laklai ai lam shabyin ya lai wa ai shara buga ni hpe jahkring hkring myit dum myit du ai lam ni nga nga chye ga ai hte dai zawn tinang a prat a matu laklai ai laksan shara ni hpe myit dum sumru ai lam galaw ai lam ni mung grai nan akyu jaw ai lam ni mung tai nga lu ai.

Karai Kasang a hpung shingkang lam hte seng nna tsun madi madun ai lam shagu hta Hpan da hkrung mahkrung ni hpe garan ginhka da nlu nga ai dam lada tsawm htap ai nam maling,tsingdu pa,bum marawn mahkra kaw nna kaji dik htum ai hkrung kanu kasha langai du hkra hkrung mahkrung tu ma tu mahkra gaw hpan da matu Karai Kasang a lam sharin ya nga ai.

Dai re majaw hpan da hkrum ai hkrung mahkrung lam ni hte seng nna sumru dik lu yu ai lam ni galaw ai gaw   dai hkrung mahkrung langai hpra hku nna anhte hpe Karai Kasang shadum sharin ya mayu ai lam hpe bai mu tam la shangun nga ai.Kam sham ai hpung masha ni hku nna hpan da hkrum ai hkrung mahkrung ni a lam hte seng nna sumru dinglu yu ai lam galaw ai lam gaw Kabu gara ai shiga hpe madat hkam la lu ai lam tai nga ai zawn sung htum ai mau hpa mungsung langai a lam simsa ai nsen langai a nsen hpe madat hkam la nga ai masa zawn mung rai nga ai.