Zang Yaw Mare Hta Galaw Ai Hkristmas Poi, Shaning N'nan hte Jau Nta Ding Shawn Shang Poi

Myitkyina Sasana, Putao Jau Ginwang, Zang Yaw Mare hta 2021 December 31 ya shani Hkristmas Poi galaw nna, 1 January 2022 ya shani Jau nta n'nan hpaw poi hte shaning n'nan Misa hpe galaw lai wa sai rai nga ai.

Poi lamang de Wa Jau Peter Zang Yaw Hpung woi awn let St.Francis Xavier Mama hpung kaw na Mama Rose Angeline Maran Nang Doi, St.Joseph Mama hpung kaw na Mama Maria Munglen Ja Ra,

La Salette Mama hpung kaw na Mama Maria Gumling Ja Hkawng hte Reparation Mama hpung kaw na Mama Martha Hkawng Yang ni hte rau RVA Kachin, Lisu, Rawang kaw na magam gun nkau ni, Myitkyina, Putao kaw na ramma ni sa du shang lawm lu sai.

Zang Yaw Mare gaw Putao kawn Cycle (Shnr) Mawdaw hte 2 ya, Lagaw lam hku 2 ya hkawm jang she du ai shara rai nga ai.

Ndai shara de Kahtawlik Sasana shang ai shaning 38 ning du wa sai rai nna, lai wa sai ten Sasana galaw hpang ai Sara ni lagaw lam hku n'htoi 14 ya ram hkawm let shakut shaja lai wa sai lam chye lu ai.

Ya dai ni Zang Yaw Sara Gaiwang hta hpung masha htinggaw 99 tup nga sai hte dai ginra na hpung masha ni a Wenyi makam masham lam ngang kang galu kaba wa na matu hte sasana chyam bra jat wa lu na matu Jau Ginwang hpaw lu hkra shakut nga ma ai.

Zang Yaw Sasana hkrun lam awng dang lu hkra madi shadaw garum la ai chyeju madu ni law law nga ai hpe chye lu ai.

#rvakachin #zangyaw #localnews