Yangon Cardinal Hte Manial Cardinal Yan Bangladesh Mungdan Na Tsin Yam Dabang Ni De Sa Du Gawan Lam Galaw Lai Wa 

Myanmar Mungdan na Cardinal Charles Maung Bo hte Philippines Mungdan Manila na Cardinal Luis Antonio Tagle yan ndai July shata 29 ya shani Bangledesh Mungdan Cox’s Bazar na Rohingya tsinyam dabang ni de 2 ya aten la nna sa du gawan lai wa ma ai.

Cardinal Luis Antonio Tagle gaw Caritas International uhpung a ningbaw rai nga nna Cardinal Chrles Maung Bo gaw FABC ngu ai Asia dan Saradaw uhpung rapdaw a ningbaw rai nga ai.

Ndai tsinyam dabang de garai nsa yang shawng shani hta, Cardinal yan kaw nna ndai tsinyam dabang ni hte seng ai asuya lit hkam ningbaw Muhammad Abul Kalam hte mung hkrum shaga bawng ban ai lam ni galaw lai wa ma.

Ndai shara hta shanu shingbyi nga ai tsinyam hkrum masha ni malawng maga gaw 2016 ning hte 2017 ning laman Myanmar Mungdan Rakhine Mungdaw hta byin lai wa ai mang hkang lam ni a majaw Bangladesh Mungdan de hprawng htaw pru wa ai ni rai ma ai .

“Ya na zawn Cardinal yan sa du gawan lam galaw ya ai majaw kabu ai lam tsun let tsinyam dabang hte seng ai mabyin mayak mang hkang lam ni hpe mung Muhammad Abul Kalam kaw nna Cardinal yan hpe tsun sang lang dan ai lam galaw let, Nawku Hpung kaw nna matut garum ya na matu mung tsun lajin dat ai”, nga nna Muhammad Abul kaw nna Ucan shiga dap de tsun tsun shana dat nga ai. Cardinal yan a hkrun lam lahkawng ya tup hta Bangladesh Mungdan Cardinal Patrick D’Rozario mung rau hkawm sa lawm lai wa ai.

Lai wa sai shaning December hta mung Cardinal Tagle hku nna ndai tsinyam dabang de sa du gawan lai wa yu sai majaw ndai gaw shi a matu lahkawng alang ng una sa du gawan ai lam rai nga ai.

Cadinal Chalres Bo a matu chyawm gaw nam bat langai lang ngu na sa du gawan ai lam re, Cardinal yan kaw nna tsinyam dabang nam bat 4 hte nam bat 17 de du gawan lai wa ma ai, tsinyam dabang nam bat 17 gaw Kutupalong ngu ai dabang rai nna, dai hta tsinyma hkrum masha sen 4 jan shanu nga ai tsinyam dabang kaba rai nga ai, nga nna Ucan shiga dap kaw nna shana dat nga ma ai.       

Source:Vatican News