Wunpawng Mungdan Shang Lawt Asuya A Tsang (10) San Poi Htai Hpang

Wunpawng Mungdan Shang Lawt Asuya Ginra de na tsang (10) San Poi hpe March shata 12 ya shani kaw nna htai hpang nga sai lam chye lu ai.

2018-2019 Hpaji Ladaw, Wunpawng Mungdan Shanglawt Asuya Tsang (10) San Poi shang htai Jawng ma yawng 703 nga ai rai nna, shinggan hku htai ai 33 re ai lam, Tsang (10) san poi htai ai ginra ni gaw, Laiza Lahta Tsang Jawng, Mai Ja Yang Lahta Tsang Jawng, ALen Bum Lahta tsang Jawng, Mung Myit Sinli Lahta Tsang Jawng , N-gum La Lahta Tsang Jawng hte Nba Pa Lahta tsang Jawng ni re ai lam chye lu ai.

Awng Lawt Lahta Tsang Jawng gaw majam a majaw dai ning na hpaji ladaw hta n hpaw byin mat ai re lam chye lu ai.Laiza Lahta Tsang Jawng kaw Jawngma marai 125 nga ai kaw nna, Jawng ma marai langai gaw, lam amyu myu a majaw n lu htai lawm mat ai lam Tsang (10) San Poi San Htai ningbaw lit gun hpai nga ai Sara Nhkum Ja La tsun dan ai .

March shata 12 ya shani Jinghpaw Laika hpe shawng htai na rai nna, 13 ya shani kawn 19  ya shani du hkra Myanmar, Physic, English, Chemistry, Economic hte Mathematic Subject ni hpe matut manoi htai mat wa na re ai lam, awng pru ai jahpan hpe 2019 May shata 10 ya kaw nna 25 ya lapran n dau shana ya na re lam chye lu ai.

Shang Lawt Asuya Tsang (10) San Poi hpe 2017-2018 Hpaji Ladaw hta Lahta Tsang Jawng 6 kaw na  Jawng ma marai 755 shang htai ai hta, marai 379 awng la lu sai lam chye lu ai.

Source : Laiza FM,Simsa Kasa