Wunpawng Amyusha Ni A Gawng Malai Mungmasa Lam Hta Shamu Shamawt Lu Na Matu KPICT Ngu Ai Wuhpung Hpaw Ninghtan Da

Ya byin nga ai Mungmasa Manghkang ni hta hkan nna, Pranwan aten hta Wunpawng Amyusha ni a gawng malai, ra ang ai wuhpung ni hpe matut mahkai bawngban sa wa na matu "Wunpawng Amyusha Mungmasa Ginrat Hpung" (Kachin Political Interim Coordination Team: KPICT) hpe hpaw shabawn dat sai lam chye lu ga ai.

2021 ning March shata 9-11 ya laman Wunpawng amyusha wuhpung wuhpawng ni rai nga WMR, Mung Myit Sinli, SMJH, WKC, Dat Kasa 100 ngu ai dawdap wuhpung ni jawm hpawng ai zuphpawng kaba hta Wunpawng Amyusha yawng a gawng malai Mungmasa ginrat sa wa lu na matu yaw shada let, ya na zawn KPICT) hpe hpaw shabawn dat ai re lam chye lu ai.

Ndai KPICT hpe Mungdan kata/shinggan nga Wunpawng myitsu salang marai (15) hte hpaw shabawn tawn da ai re lam, Madung yaw shada ai lam gaw,

1. Myamar Mungdan kata byin nga ai sat lawat hta hkan nna Wunpawng anyu hte Mungchying sha ni a mungshawa hta shadip jahpang ai ahkang aya hpe gawgap la lu na matu.
2. Gum shen ai Asuya hpe gasat shamyit kau nna jet ai Federal Munghpawm Mungdan gawgap la lu na matu.
3. Yaw shatawng shada lam bung ai Mungdan kata/shinggan na wuhpung wubpawng ni hte matut mahkai bawngban jahkrup nna ta gindun galaw sa wa lu lu na matu re nga nna KPICT kawn ndau shapraw da ai laika hta lawm nga ai.

Ya aten gaw grai lawan ai hku dawdan hparan ra ai aten re majaw, wuhpung mandate lu ai Ningbaw Ningla ni woi awn gaw de hpang wa ai re lam, Yawng a ningmu hpe bunghkup lu hkra, hkut hkut nai nai bawng ban let mai byin dik htum, byin gying dik htum, sum machyi lam yawm dik htum hpe lata la ai Wunpawng ni a Mungmasa hkrun lam rai nga ai lam KPICT kaw shang lawm ai Esther Ze Naw shi a facebook laika man hta tsun da ai hte maren chye lu ai.

Ref: KPICT, Ester Zenaw

Thomas