Wuhan Corona Virus Kap Bra Ana Hte Seng Nna, Makawp Maga Lu Na Matu Ndau Laika Shapraw

Wuhan Corona Virus Ana Zinli Kap Bra Ana Hte Seng Nna, Ana makawp maga lu na matu Mungdan Hkam Ja Dap Kawn Ndau Laika Shapraw Dat Ai Shiga

Wuhan Corona Virus Ana Zinli Kap Bra Ana Hte Seng Nna, Ana zinli hpe tau hkrau makawp maga lu na matu hkan sa ra ai lam ni hpe Shang Lawt Uphkang Rung, Mungdan Hkam Ja Dap kawn January 26, laban shani ndau laika shapraw dat ma ai.

Ndau laika hta, Miwa Gumsan Mungdan Wuhan Mare Kaba kaw nna byin hpang wa ai Corona Virus ana gaw, shara shagu de lawan dik ai hku chyamm bra wa nga sai hte maren, ndai ana gaw hpa baw virus amyu hpan re ai hpe tup hkrak n chye lu ai raitim, nsa sa lam hku kap bra ai rai nna lai wa sai ten byin ai SARS ana MARS ana ni byin shangun ai Virus ana hte amyu hpan bung ai lam tsi hpaji ninghking ni ndau da ai lam nga ai.

Anhte Mungdan gaw, Miwa Mungdan hte lamu ga jarik re majaw, virus nga ding yang gaw galoi tim anhte buga masha ni hta kap wa chye ai hte dai hpe makawp maga lu na matu Mungdan Hkamja Dap kaw nna,  lawu na zawn ndau laika hte tsun shadum da nga ai.

1. Hkam kahtet jahkru gahti byin ai hte tsi rung de lawan sa madun ra na.
2. Hkum kahteht machye ai, jahkru ai, gahti ai nsa sa lam ana kumla byin ai masha ni hte grai ni kahtep ai hku kanawn mazun ai lam hpe koi gam ra na
3. Masha law, masha htat ai shara ni de hkawm sa ai lam hpe koi gam ra na
4. N-gun rawng ai malu masha ni hpe sha ya ra na
5. Jahkru, gahti ai shaloi hpajet, Tissue, sumpan jai lang let n-gup hpe magap nna jahkru gahti na
6. N-gup magap (Mark) shakap nna hkawm sa ra na.
7. Makawp maga arung arai n lawm ai sha dusat ni hpe jum shum ai lam n galaw na
8. Dusat (Shnr) machyi masha ni hpe jum hkra ngut shagu lata hpe san seng hkra kashin kau na
9. Hkum dingdek san seng hkamja lam hpe tup hkrak hkan sa ra na.
10. Hkawm sa hkawm wa pru shang masha ni hpe hkam ja lam jep chyoi lam galaw ra na

ngu ai lam ni rai nga ai.

Ndai Wuhan Virus ngu ai Novel Corona Virus gaw, Miwa mung, Wuhan Mare hta 2019 December 31 ya shani kawn byin hpang wa ai rai nna, dai ni January 28 ya shani du hkra,  Miwa Mungdan hta ana zinli kap ai masha  hkying mali jan (4428) rai nga sai hte  virus a majaw asak si hkrum ai masha 100 jan sai lam, Taiwan, Hongkong, Macao hte Thai, Singapore, Malaysia, Vietnam, America, Germany, Pin Thit hte Australia Mungdan  ni hta mung ana zinli kap ai masha ni mu ai lam chye lu ga ai.

Anhte Myanmar Mungdan hta gaw dai ni du hkra ndai nna zinli kap ai masha tup hkrap n mu shi ai raitim, tau nau makawp maga hkyen lajang ai lam, hpaji jaw ai lam, jep chyam yu ai lam ni hpe Mungdan hkamja dap kawn galaw nga ma ai lam chye lu ga ai.

Thomas