Waimaw San Joseph Kahtawlik Nawku Jawng Wang Na Wa Jau Ni A Dum Nta Kajawng Kaja Wan Hkru Mat

Myitkyina Saradaw Sasana, Waimaw Muklum lawk ( 2 ) hta nga ai San Joseph Kahtawlik nawku jawng wang na Wa Jau ni a dum nta gaw ( 28.2.2023 ) ya shana ( 11:00 Pm ) grup yin aten kajawng kaja wan hkru mat ai lam chye lu ai.

Wan hkru wa ai ten gaw yawng yup taw sai re majaw wan n lu je la mat ai hte hpa arung arai mung nlu shaw la ai lam ginwang up hte ningtau jau yan tsun ai kaw na chye lu ai.

Wan hkru hpang ai mabyin gaw shat gawk kata na wan sumri kaw nna hkru hpang wa ai rai nga ai.  Waimaw jau ginwang na ni nawn ai hpung masha ni gaw jahpawt n'htoi htoi ai hpang wan hkru mat ai jau nta na maza ni hpe sa du san seng lam galaw ya ai, Myitkyina kaw nga ai Wa jau ni mung sa du nna n gun jaw ga tsun ai, akyu hpyi shaman ai lam ni galaw ya ma ai.

Bai shiga na chye lu sai hpung masha n-kau mi, Myitkyina Karuna ( KMSS ), Waimaw Ginwang Hkalup Hpung Ginjaw ( WBA ) hte alu madu ni mung sa du n gun jaw let garum la ai hpe mu lu ai. Waimaw jau ginwang na nawku hpung hte seng ai jahpan chyarang ni, matsing sumhting laika ni mung yawng hkru lawm mat ai lam wa jau yan tsun dan ai. Ginwang up jau gaw arung arai n kau lu shapraw hkra shakut yu ai raitim wan grai ja wa ai majaw nta ntsa kaw na gumhtawn yu mat ra ai. Karai Kasang gaw arung arai hpe law hpa myit n rawng shangun ai rai sam ai nga nna shi hkam la ai. Yawng hkru lawm mat sai re majaw Karai Kasang a lata hta sha ap da sai, hpung masha ni nga ai re majaw mai byin wa re ngu myit mada ai lam tsun dan ai. 

Ningtau jau mung yup pyaw nga ai ten byin wa ai re majaw, kajawng kaja rai, dum wa ai hte wan sat shakut yu tim nlu je mat ai, shi gawk kata de mung wan hkut hkrai hpring rai mat nna bai n mai shang mat sai majaw nta pinra kaw nna mai byin ai hku masha lawt hkra sha yu mat ai re lam tsun dan ai. Npu de du ai shaloi gari kawa byin mat ai hte mau dung mat wa ai lam shi a mahkrum madup hpe tsun dan ai. Ra ahkyak dik hpe tsun ga nga yang wa jau yan shingbyi shara atsawm rai galaw la lu na, ya byin mat wa ai mang hkang ni hpe atsawm rai mang hkang kaba n pru ai sha, a lawan hparan la lu na matu gaw bungli kaba rai nga ai. Yup na shara, sha na matu ni gaw gara hku raitim mai byin wa na re. Grai mung myit n pyaw byin ai, hpung masha ni yawng mung akyu hpyi garum ya marit nga nna shi a mahkrum madup hte hkam sha lam hpe tsun shapraw dan nga ai.

Hkru mat wa ai jau ni a nta gaw nawku jawng hte grai ni kahtep ai, nawku jawng hte jau nta lapran hpri tsut matut da ai re. Nawku jawng de wan n hkru kap shi ai laman wan sat mawdaw hte lu jet kau ai majaw nawku jawng wan n hkru lawm mat ai rai nga ai.

Shiga - Julia Ja Ing 

 

Add new comment

4 + 4 =