Wa Saradaw Stephen TJephe a Labau Kadun (August 1, 1955 – December 16, 2020)

Wa Saradaw a Ma Prat: Wa Saradaw hpe, lai wa sai 1955 ning, August shata praw (1) ya shani, Bago ning htawn, Htantabin  Ginwang, Zayat, Shwe Tha Saung Mare kaw, Kawa Slg. Plureh hte Kanu Jan Thu Myar yen kaw nna, shangai chyinghkai wa ai rai nga ai. Shannau ni yawng marai (6) nga ai hta na, Shi gaw, No (3) ngu na shadang sha rai nga ai.

Wa Saradaw ni gaw, 1958 ning hta, Shwe Da Zaung mare kawn, Kayah Mungdan, Demoso Ginwang, Saung Du, Donoku Mare Nnan de htawt nawt nga lai wa ai.

Wa Saradaw gaw, 1955 ning, September shata praw (4) ya shani Kashin Kamun Sacramentu hpe Shwe Tha Zaung mare hta hkam la ai. Bai N-gun Shaja Sacramentu hpe gaw, 1963 ning, February shata praw (4) ya shani, Donoku Mare Nnan kaw hkam la ai rai nga ai.

Jawngma Prat: Wa Saradaw gaw, lawu tsang hpaji hpe, Donoku Lawu tsang hpaji jawng hta sharin hkam la lai wa sai. Bai lapran tsang hpaji hpe gaw, Deemoso Lapran tsang jawng hta sharin la ai. Lahta tsang hpaji hpe gaw, Taung Gyi Masat (7) Lahta Tsang jawng hta sharin la nna, lahta tsang san poi hpe 1975 ning awng la lu sai rai nga ai.

Jau Tai Jawngma Prat: Wa Saradaw gaw, 1970 ning hta Taung Gyi, San Teresa Jau Tai Jawng Kaji de shang hpang wa ai. 1978 ning kawn 1984 ning du hkra Myit Sawn Hpaji (Philosophy) hpe sharin hkaja la ngut ai hpang Yangon mare kaba na, San Joseph Jau Tai Dakkasu hta Karai Hpaji (Theology) hpaji ni hpe sharin hkaja lai wa sai rai nga ai.

1983 ning, December shata praw (3) ya shani hta gaw, Yangon Sasana Saguremwa Wa Saradaw Kaba Mahn Gabriel a lata hta, San Mary Nawku Htingnu hta e, Deacon aya hpe hkam la lu sai. Dai hpang 1984 ning, March shata (28) ya shani hta gaw, Donoko Mare nnan kaw, Taung Gyi Sasana Saguremwa Wa Saradaw Kaba Giovanni Battista Gobbato a lata hta e, Jau Tai aya hpe hkam la lai wa sai rai nga ai.

Jau Prat hte Sasana Magam Lam ni: Dai hpang, Wa Saradaw gaw, 1984 ning kawn 1987 ning du hkra, Hpruso hte Phekhon jau ginwang ni hta, ning tau Jau lit magam hpe gun hpai lai wa ai. 1987-88 ning hta gaw, Deemoso Jau ginwang a Ginwang up lit magam gun hpai lai wa sai.

Dai zawn rai (4) ning Sasana magam gun ngut ai hpang, 1988 ning kawn 1991 ning du hkra, America Mungdan, New York Mare Kaba na, San Joseph Major Seminary hta Dogma hpaji hpe M.A (Th) madang hte sharin lai wa sai.

Dai hpang, 1991 ning kawn 1999 ning du hkra (8) ning tup Yangon Mare kaba na, San Joseph Jau Tai Dakkasu hta Laika Sharin Jau lit magam gun hpai lai wa ai.

Dai hpang 1999 ning kawn 2002 ning du hkra gaw, Deemoso Jau Ginwang a Ginwang Up Jau lit magam hpe gun hpai lai wa ai.

2002 ning hte 2003 ning hta gaw, Counselling & Spiritual Direction hpaji hpe Philippines Mungdan kaw sa du sharin lai wa sai.

Dai hpang, 2003 ning kawn 2006 ning du hkra gaw, Yangon Mare Kaba na, Loikaw Sasana Nta hta lit hkam Jau hku nna mung, 2006 ning kawn 2009 ning du hkra gaw, Dognekhu Jau Ginwang hta Ginwang Up Jau lit magam hpe gun hpai lai wa sai.

Saradaw Prat hte Sasana Magam Lam ni: 2009 ning, June shata (19) ya shani gaw, Wa Sarabyin Benedict (XVI) kaw nna, Loikaw Sasana a matu Ningtau Saradaw hku nna lata dat let, dai shaning November shata (21) ya shani gaw, Wa Sarabyin a Dakkasa His Grace Salvatore Pennacchio a lata hta Saradaw aya hpe hkam la sai rai nga ai.

2014 ning, April shata (26) ya shani hta Wa Saradaw Kaba Sotero Phamo gaw, Sagurem lit magam kawn hkring sa mat ai majaw, dai shaning November shata (15) ya shani hta Wa Sarabyin Francis kawn Wa Saradaw hpe, Loikaw Sasana a Ginwangup Saradaw Kaba lit hpe shatsam ya sai rai nga ai.

2015 ning, January shata (12) ya shani hta gaw, Wa Sarabyin a Dakkasa His Grace Paul Tschang In-Nam a lata hta, Tara Shang Saradaw lit magam ahkang aya hpe ap jaw ya ai hte hkring sa mat wa sai rai nga ai, Wa Saradaw Kaba Sotero Phamo a lata kaw nna, Loikaw Saradaw Ginwang a lit magam, ahkaw ahkang hpe mung galai jaw ya ai hpe hkam la lai wa sai rai nga ai.

Dai shani kaw nna, Loikaw Sasana hpe woi awn lam woi ning shawng tai ya nga ai gaw, Wa Saradaw, shi a hpang jahtum asak htum ai shani du hkra rai nga ai.

Wa Saradaw a Wenyi, Karai Kasang Wa a Ngwi Pyaw Simsa ai Ja Mungdan hta Ning-ngai nga lu u ga law.

Laika Gale ai – Sister Rose Angeline Maran Nang Doi (SFX)

                            RVA-Kachin Service (Myitkyina)