Wa Saradaw Kaba Cardinal Charles Bo, Sumprabum Hpung Masha Ni Hpe Sa Du Kawan

Wa Saradaw Kaba Cardinal Charles Bo gaw  28 April 2022 ya shani Putoa kaw galaw ai Wa Jau Peter Zang Yaw Hpung a Karai magam gun jau prat ( 25 ) ning hpring Jubali poi sa lawm let bai n htang yu wa ai hkrun lam hta  Sumprabum mare na St. Patrick nawku jawng kaw shani shat sha hkring let  hpung masha ni hpe shang kawan hkrum shaga ai lam galaw lai wa sai. 

Cardinal kawn Sumprabum na  hpung masha ni hpe n gun jaw ai mungga hta 

Anhte a buga, Jinghpaw Mungdan hte Myanmar ting simsa wa na matu akyu hpyi ra ai.

Akyu hpyi ai lam hta myit n daw n hten ai sha, asum n jaw ai sha, Christian ngu ai gaw, Catholic ngu ai gaw awng dang ai masha ni re majaw grau grau awng dang na matu akyu hpyi ga.

Bai nna Myitkyina Saradaw ginwang gaw  saradaw ningnan lu na matu shakut taw ai ten re majaw Saradaw ningnan lawan lu hkra mung akyu hpyi ga nga nna tsun shatsam lai wa sai.

Wa Saradaw kaba Cardinal Charles Bo  gaw Putao kaw na yu wa ai hkrun lam hta February shata hta majan laja lana byin lai wa ai majaw hpyen koi yen hprawng hkawm nna mare buga de bai du wa nga ai Sumpyi Yang hte Lung Yang Sha mare na buga masha ni hpe mung shang kawan shakram ai, n gun jaw ga tsun ai hte  akyu hpyi shaman da ai lam ni galaw lai wa sai.

Hpyen yen ni hpe n gun jaw mungga tsun ai hta ya aten gaw ndai mare buga kaw sha n re, Myanmar Mungdan  ting , majan byin nga ai, yak hkak jam jau nga ai ten re majaw akyu hpyi shakut ga nga nna n gun jaw mungga tsun ai lam chye lu ai.

Cardinal Charles Bo gaw Putoa de 27 April 2022 ya shani  Yanggon kaw na nbungli hte lung wa ai rai nna bai wa ai hkrum lam hta gaw mawdaw mayan na hpung masha ni hpe kawan hkrum shaga, akyu hpyi shaman  da ya mayu ai majaw mawdaw lam hku nna n htang yu wa ai rai nga ai.

 

Shiga - Julia Ja Ing

 

Add new comment

5 + 3 =