Wa Sarabyin: Vatican Ginhtawng Dabang Lung Ai Sasana Ma Ni Hpe Hkrum

Sasana ma ni a matu, Vatican hta, 2022 shaning, (summer camp) ginhtawng dabang hpaw sharin hpawng hta sa lung ai sasana ma ni hpe Wa Sarabyin Francis, August 3, bat masum ya shani, hkrum shaga ai lam galaw ai lam chye lu ai.

Wa Sarabyin Francis gaw, Vatican hta wenyi lam woi ya nga ai Salesian Jau, Fr. Franco Fontana, woi awn galaw ai hpe kabu lawm ai lam, shi a shakawn shagrau ga hte rau, bat masum ya shani, hpung shawa masha ni hte hkrum shaga ai, Paulu VI hkaw hta,  tsun ai.

Ginhtawng dabang hta myit sumru, akyu hpyi lam ni mung galaw woi ai lam chye lu ai. Ginhtawng dabang hta, myit simsa ai hte galaw lu ai lamang ni hte ginsup lamang ni mung shalawm ai lam chye lu ai.

Sasana ma ni a lapran, shada tsun jahta, ginsup let mung rau nga chye ai, Wa Jau Franco gaw bat masum ya shani na Wa Sarabyin a hpung shawa masha ni hkrum hkrum shaga ai lamang hta, laksan saw shaga hkrum ai majaw kabu mung kabu, myit mung tsang ai zawn hkam sha ai, nga nna hkam sha lam tsun da nga ai.

Lai wa sai masum ning aten kaw, Wa Sarabyin gaw, Vatican hta, kap bra ana tsin-yam ladaw hta, ramma kaji ni hte seng ai lamang langai ngai galaw na matu Salesian Jau hpe tsun lai wa yu ai lam mung chye lu ai.

Ndai lamang, Wa Sarabyin ra sharawng ai lamang, hpe ya sha hkrang shapraw galaw lu ai re lam, ndai zawn hkrang shapraw galaw lu na matu, yak hkak ai lam law law lapran, tau nau shajing ra ai lam ni grai law ai lam, ya gaw kaja wa sha hkrang shapraw lahkam hkam sa lu sai lam, Wa Jau Franco sakse hkam tsun dan da ai.

Shawng na shaning hta gaw 150 lung ma ai rai nna, ndai shaning na dabang hta gaw 230 sa lung ma ai lam chye lu ai. Ginhtawng dabang hpe bat manga (5) aten la galaw na re lam chye lu ai.

Dabang lung masha ni hpe nsam mying hte wuhpung karan da ai rai nna, ginsup ten hte akyu hpyi ten ni hta wuphung hte wuhpung rai nna lit la galaw sa wa ai lam chye lu ai. Akyu hpyi ai ten hta gaw, Karai mungga hte akyu hpyi nawku daw jau ai lam, Missa Hkungga nawng jau ai lam, mara raw shakramentu hkam la ai lam ni hpe, bat hte bat rai nna kahti galai galaw sa wa ai lam chye lu ai.

Shangwi shapraw lamang hpe mung shalawm da ai lam chye lu ai.

Shanhte kaw nna myit mada lam law law nga nga ai. Nkau Sasana ma ni gaw kun dinghku kata yak hkak jam jau nga ai lapran kaw nna dabang sa lung ai, yak hkak ai kun dinghku masha ni hkum nan sa ap sa shalun ya ai ni lawm ma ai lam mung chye lu ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-greets-children-attending-vatican-summer-camp.html