Wa Sarabyin: Tsawm Htap Ai, Teng Man Ai Hpe Shatsaw Sharawt Na Matu Shingni Hpaji Ninghkring Ni Hpe N-gun Jaw

September 1, bat mali ya shani, shingni hpaji ninghkring ni, sumla hkrung hpaji hte seng ai ninghkring ni, shiga dap na shihtawn hpaji ninghkring ni, yungwi hpaji hte seng ai ninghkring ni hte Vatican hta hkrum shaga ai shaloi, Wa sarabyin Francis, Karai Kasang a Kabu Gara Shiga hpe hkaw tsun ai hta tsawm htap ai, teng man ai hpe hkrang shala madun dan sa wa mu, nga nna n-gun jaw da nga ai.

Ndai hkrum zup ai lamang hpe Vatican, Casina Pio IV hta lahkawng ya tup galaw ma ai lam chye lu ai.

Vatican's Casina Pio IV gaw, 1561 shaning hta gaw gap shangut da ai, Sarabyin Pius IV, ginhtawng ta hta nga lai wa ai, Vatcan mare kaw nga ai rai nna, nta ni gaw gap da ai wang kaba rai nga ai.

Ya ten hta gaw Pontifical Academy of Sciences, the Pontifical Academy of Social Sciences hte the Pontifical Academy of St. Thomas Aquinas jawng ni hpaw da ai shara rai nga ai.

Wa Sarabyin gaw shingni hpaji ninghkring ni hpe hkrum shaga ai lam galaw let shanhte hpe "preachers of beauty" "tsawm htap lam hpe hkaw tsun ai ni tai nga na matu n-gun jaw da ai.

Wa Sarabyin tsun ai, "Tsawm htap lam gaw anhte a matu kaja ai; tsawm htap lam gaw shamai shatsai ya lu ai, anhte shawng lam de hkawm sa ai hta mung garum ya ai majaw "tsawm htap lam hkaw tsun ai ni tai nga mu."

Shanhte chye chyang kung hpan ai hpaji ni jai lang nna, Karai Kasang a Kabu Gara Shiga, mungkan masha ni, grau nna sak ram ramma ni kaw du lu hkra matut mahkai shachyam shabra ya na matu Wa Sarabyin Francis n-gun jaw da ai rai nga ai.

Wa Sarabyin Francis gaw, shingni hte seng ai hkan sa tara lam seng nna tsun let shingni hpaji hte salum chyinghka hpaw, salum hta jung hkra ya nna shawng lam de hkawm sa lu mu ga matu garum ya mu, nga nna n-gun jaw saw shaga da ai.

Shingni gaw "shinggyim masha ni hpe hkungga manu shadan ai" ngu ai hpe su hprang shangun ai; shanhte dai shingni hpe mari la mu ga, ngu na hta shanhte a shawng lam de gara hku hkawm sa lu na hpe madung da ra ai, nga nna mung shadum n-gun jaw da ai.

Shingni gaw salum hta masen ai ju hte achyaw hkra ya ai zawn hkam sha nna prat hpe sung sung myit aru ai lam shabyin ya ai; sung sung myit aru ai lam gaw anhte a shawng lam hta gara hku hkawm sa ra ai hpe lam madun ya ai, nga nna mung Wa Sarabyin Francis hpaji ga hte n-gun jaw da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-vitae-summit-vatican-artists.html