Wa Sarabyin: Tara Rapra Lam N Nga Jang, Simsa Lam Mung N Nga Ai

Pope Francis

February 25, bat kru ya shani, Vatican Mare Kaba a Tara Sara wuhpung (Tribunal of the Vatican City State) gaw de ai (94) lang ngu na Vatican Judicial Year hpaw hpang ai lamang galaw ai ten, Wa Sarabyin Francis, tara rapra lam n nga jang, simsa lam mung n nga ai, ngu tsun da ai.Simsa lam lu na matu gaw tara ai hku nga sa ra ai; tara rap ra ai hte matsan dum lama ai gaw galoi mung rau rai nga ai; Tara rapra lam n nga ai simsa lam gaw teng man simsa lam n re, shawng lam a matu ngang gring ai wa hpang gaw de ai n re, nga nna Wa Sarabyin sang lang da ai.

Hpaw hpang lamang hta Italy Tara Jawng na hkringmang Carlo Nordio, hkringmang daju a amu madu Alfredo Mantovano yan hte Italy mungdan a mung daw law law kaw na tara jawng dat kasa ni mung sa du shang lawm ma ai lam chye lu ai.Wa Sarabyin Francis a mungga a shawng daw hpe gaw tara rapra lam hte simsa lam a nihtep matut manoi nga ai lam hpe madung tsun da ai.

Kap bra ana zingli tsin-yan hkrum ai hpang Ukraine majan hte mungdan nkau ni hta byin ai majan tsin-yan gaw mungkan ting hpe tsin-yan zindam kaba hkrum shangun nga ai, nga nna Wa Sarabyin Francis, dai ni na nhtoi ni hta hkam sha ra nga ai a mabyin ninghpang ni hpe sawk shagawn dan da ai.

Ga sadi hkam da ai magam bungli shagu gaw simsa lam lu na matu rai nna, tengman simsa lam lu na matu gaw tara rapra lam a matu ga sadi hkam galaw shatup sa wa ra ai; yawng hte seng ai prat gaw masha hkum shagu a simsa ai prat hpe gaw de sa wa ra ai; ru pawt sari manu ni rai nga ai htauli htaula myit mang ai, hkam sharang ai, myit galu kaba ai lam ni nga ra ai; dai gaw tinang hkum hpe galai shai sa wa ai lam rai nga ai, nga nna mung tsun shadum da ai.

Wa Sarabyin gaw Vatican Mare Kaba a Tara Sara Wuhpung ni (Tribunals of the Vitican City State) a lam mung tsun shapraw da ai. Dai gaw Sarabyin Rung (the Holy See) akyu ara matu ahkyak ai lit magam ni hpe galaw gunhpai ai rai nga ai, nga nna tsun dan ai.Tara hparan ai hta sawng dik, ja dik ai hku san jep sagawn ai lam hpe shayawm ra ai; htauli htaula myit mang let san jep sawk sagawn ra ai; dai rai yang she, rap ra ai, maren mara re ai hpe shabyin ya lu ai, nga nna Wa Sarabyin Francis, tara sara ni hpe shadum da ai.Tara rapra lam gaw hpu nau myit majing shabying ai, shada makawp maga ai, grau nna n kung n kang ai ni, kaji htum ai ni hpe makawp maga lu ai hte awn la lu ai.

 

By Fr. Patrick Gawmaw Hkawng Yae

#vaticannews

#rvakachinservic

https://www.vaticannews.va/en/pope/news/2023-02/pope-opens-vatican-judicial-year-no-peace-without-justice.html

 

Add new comment

2 + 0 =