Wa Sarabyin: Synod Zuphpawng Kaba Hpawng Ai Gaw Lam Langai Hta Sha Rau Hkawm Sa Na Matu Rai Nga Ai

October 10, laban shani, San Peter Nawku Htingnu Kaba hta, Saradaw ni a Synod Zuphpawng Kaba hpaw hpang ai Misa Hkungga hpe Wa Sarabyin Francis hkum nan nawng jau woi ai lam chye lu ai.

 

Mungkan shara shagu na hpung shawa masha ni, Jau ni, Jau Tai Jawng Ma Ni, Sasana wuhpawng ni, Cardinal ni hte Saradaw ni shang lawm ma ai lam chye lu ai.

Du na lahkawng ning laman hta galaw sa wa na ndai Saradaw ni a synod zuphpawng kaba hpe hpaw hpang ai Misa Hkungga mung rai nga ai.

Dai shani na Chyum Laika hpe lakap nna Wa Sarabyin Francis, shi a mungga hpe htawn tsun da ai. Sut su ai sak ram masha langai mi Yesu kaw sa nna sumsing mungdan madu lu na lam hpe madun dan na matu hpyi shawn ai lam rai nga ai.

Saradaw ni a Synod Zuphpawng Kaba hte seng nna, “ndai synod zuphpawng kaba hpe galaw ai a yaw shada ai gaw anthe ni yawng lam langai hta sha rau hkawm sa wa na matu rai nga ai,” ngu Wa Sarabyin lachyum shalen da nga ai.

Yesu Madu a kasi kamang hta hkawm sa na matu, hkrum kadup ai (encounter), madat nna na la ai (Listen), sumru nna ginhka chye la ai (discern), ndai ladat masum gaw Synod zuphpawng kaba hta ra ahkyak ai lam ni rai nga ai, ngu Wa Sarabyin ningmu jahpaw da ya ai.

Hkrum Kadup Ai (encounter)

Kabu Gara Shiga hta, Yesu Madu hkrunlam ntsa hta rai nga yang, Shi mu hkrum ai ni, Shi hpe Mu chye la na matu, Shi a hkum hpe shanhte kaw shadan dan ai hpe mu lu ga ai. Anhte hkum nan mung dai Yesu Madu zawn rai nna tinang hpe mu chye la mu ga matu shadan dan ra ga ai.

Dai gaw Karai kasang hta tinang a masin salum hpe hpaw da ra ai, tinang hkum hpe shadan dan ra ai, aten la nna nawku daw jau akyu hpyi nga ra ga ai, Chyoi Pra ai Wenyi a shadum shadut, shadum jahprang ai hpe madat hkam la ra ga ai.

Hpu nau ni hpe rai tim, tinang a masin salum hpaw da let tinang hkum hpe shadan dan ra ga ai. Myit sharawng ai hte nan shadan dan ra ga ai.

 

Madat Nna Na La Ai (Listen)

Teng man jaw ang ai hkrum kadup ai lam gaw hpu nau ni hpe madat nna na la ai kaw nna she lu la ai. Yesu Madu gaw “na” hte sha madat la ai n re ai, masin salum kaw nna nan madat hkam sha lawm ya ai wa rai nga ai. Yesu Madu a hpang ai anhte ni mung masin salum kaw nna nan madat hkam sha lawm chye ra ga ai. Anhte a masin salum kaw nna madat hkam shalawm ai hta jeyang daw dan ai lam n lawm ai. Hkam sha lam hpe tsun dan ai ni myit tsang ai lam n nga ai sha, asan sha tsun lu na hpe madung da ya ra ai. Shanhte a wenyi lam matsun ni tai lu hkra madat hkam sha lawm chye ra ai. Shada da madat hkam sham chye nga ra ga ai.

 

Sumru Nna Ginhka Chye La Ai (discern)

Hkrum kadup nna madat hkam sha lawm ai hte sha n ngut shi ga ai. sumru nna kaja ai, n kaja ai hpe ginhka lata hkawm sa chye na matu mung naw ra ga ai.

Anhte ni hkrum shaga hkat shagu, mayak manghkang lam ni gaw anhte hta nga wa na teng ai. Rai ti mung, dai lam ni gaw anhte a hkrun lam galu hta rau hkawm sa lu na matu she rai nga ai.

 

anhte myit masin kata shinggan ni hpe sawn sumru ginhka chye na matu, Karai Kasang anhte hpe madun mat sai lam ni, anhte a jet ai tsaw ra myit ni hte dai nhtoi ni hpe chye ginhka lu na matu Chyum laika hta na, sut su ai ramma hpe zawn sha  Karai Kasang anhte hpe garum ya ai. Ndai gaw anhte yawng a manu dan ai  kasi la shara langai rai ai ngu mung Wa Sharabyin Francis matut nna kahtap tsun da ai. Nawku hpung hta rau sha hpawng de ai gaw akyu hpyi nawku ai lam ni, Karai Kasang a mungga ni hte hkrum zup lu ai lam ni rai nga ai.

 

 

 

Madu Karai Kasang Anhte Hpe Lam Woi Madun Taw Nga Ai Lam

Ndai kyu hpyi hpawng hta Wa Sharabyin tsun ai chyum laika kaw na sahti ai ramma wa hpe dinghta ga hte seng ai, myit marin lam ni hpe tawn kau na tsun ai zawn anhte hpe mung shaga nga taw nga ai. Ya ten hta Karai Kasang anhte hpe hpa ni tsun mayu ai, shi anhte hpe lam woi matsun madun mayu ai lam ni hpe tingnang hkum ting sawn sum dinglik yu ra nga ai

 

Wa Sharabyin shi a ga hpungdim dat hku nna , “anhte kaja ai hkrun lam hta rau sha hkawm sa wa ga, Mauhpa chyoipra wenyi atsam hte Karai Kasang a jachyum mungga ni tsaw ra hkungga ai nawku bu hkawm masha ni rai wa na re ngu myit mada ai, madat mara ai lam ni hte sawn sumru dinglik yu ai lam ni hte hpringzup ai ahkaw ahkang ni hpe nmai tat kau nga ai ngu tsun shadut n-gun jaw lai wa sai lam Vatican shiga dap kaw nna shana dat ma ai.

 

https://www.vaticannews.va/en/pope/news/2021-10/pope-celebrating-synod-means-walking-together-on-the-same-road.html

Add new comment

6 + 7 =