Wa Sarabyin: Sut Masa Council Malawm Ningnan Marai 13 Hpe Lata San Da Ai

Wa Sarabyin Francis gaw, Vatican sut masa council a matu malawm ningnan 13 hpe 2020, August 6, bat 4 ya shani lata jat bang da sai. Dai sut masa council malawm ni kaw sut masa lam hta ningtawng ai num marai 6 mung lawm ai lam chye lu ai.

“The Council for the Economy” ngu ai “Sut masa Council” hpe lai wa sai 2014, February 24 ya shani na Apostolic laika “Fidelis dispensator et prudens” ngu ai ginlam ga baw kata hpaw hpang da ai rai nga ai.

Dai Sut Masa Council a lit magam gaw Roma Curia kata na “Dicasteries” ngu ai Rung ni, Sarabyin Rung hte matut mahkai ai “Institutions” ngu ai “hpung kaba” ni hte Vatican Mare kaba na “Financial” Sut masa lam ni hpe hparan ya na matu rai nga ai.

Sut Masa Council malawm ni hpe Cardinals ni hte Saradaw ni lata san da ai rai nna, shanhte gaw Kahtawlik Mungkan Nawku Hpung a matu myit yaw shada ra ma ai. Kaga marai 7 hte gaw mungdan sagu na sut masa lam hta ningtawng ai ninghkring ni rai ma ai.

Munich hte Freising Saradaw Ginwang na Saradaw kaba rai nga ai Cardinal Reinhard Marx gaw sut masa council a bawngban jahkrup ya ai “Coordinator” rai nna, Durban Saradaw Ginwang na Saradaw kaba Cardinal Wilfrid Fox Napier gaw shi a asak 80 shaning du hkra sut masa malawm hku naw gring nga na rai nga ai.

August 6 ya shani hta sha, Cardinals ni rai nga ai Esztergon- bugapest Saradaw Ginwang na Peter Erdo, Sao Paulo Saradaw Ginwang na Odilo Pedro Scherer, Quebec Saradaw Ginwang na Gerald Cyprien Lacroix, Newark Saradaw Ginwang na Joseph William Tobin, Stockholm Saradaw Ginwang na Anders Arborelius, hte L’Aquila Saradaw Ginwang na Giuseppe Petrocchi ni hpe Wa Sarabyin hku nna lata san da sai lam chye lu ai.

Sut Masa Council malawm ni hpe Nawku Hpung masha ni hta na mung laksan lata san da ai. Dai ni gaw, Prof. Dr. Charlotte Kreuter-Kirchhof (Germany), Dr. Marija Kolak (Germany), Maria Concepcion Osacar Garaicoechea (Spain), Eva Castillo Sanz (Spain), Leslie Jane Ferrar (Great Britain), Alberto Minali (Italy), Maria Concepcion Osacar Garaicoechea (Spain), hte Ruth Mary Kelly (Great Britain) ni rai ma ai lam Vatican Shiga Dap kaw nna ndau da ma ai.

Shiga Source : Vatican News