Wa Sarabyin: Shada Garan Gachyan Ai Gaw Lawt Lu Ai, Ningnan Tai Ai Hte Shinggyim Sari Manu Ni Hpe Shatsaw Ya Ai

September 2, bat 4 ya shani, Kanu Hte Ma Ni a mayak manghkang ni hpe yu lakawn ai ap nawng wuhpung ni hte hkrum shaga ai hta garan gachyan ai gaw shang lawt ai, ningnan tai ai, hte sari manu lam hpe hpaw ya ai, ngu tsun sharin shaga ai.

September 2 ya shani gaw Arche wuhpung hpe gaw de hpang ai (30) ning ladu hkrum ai shani rai nga ai. Dai shani Wa Sarabyin Francis, Arche wuhpung hpe hpaw hpang ai wa hte rau dai hta magam gun ap nawng nga ai ni yawng hpe mung chyeju dum mungga tsun da nga ai. Shanhte gaw myu shayi kanu ni hte sasana ma ni hpe n tara, n jaw n ang ai hku, gumshen ai myit hte kanawn mazum ai kaw nna lawt lu na matu ap nawng garum ya nga ma ai ni rai ma ai.

Arche wuhpung hpe 1991 shaning Milan kaw wa Italy Jau, Wa Jau Giuseppe Bettoni kawn HIV ana kap ai ma ni hte shanhte a kun dinghku masha ni hpe yu lakawn hpang ai kaw nna hpang wa ai re lam chye lu ai.

Arche wuhpung ni gaw yawng a matu myit mada shara jaw ai kumla rai nga ai, grau nna gaw myu shayi ni hte shanhte a kashu kasha ni a matu rai nga ai. Dai wuhpung hta ap nawng magam gun nga ai ni gaw matsan mayan re ai ni a matu, matsan mayan re ai ni hte rau ap nawng magam gun nga ma ai rai nga ai, ngu Wa Sarabyin francis tsun sang lang da ai.

Hpang jahtum hta Wa Sarabyin Francis shanhte a matu akyu hpyi ya let shaman ya let mungga hpe ginchyum dat shangut da nga ai.

By Fr. Patrick Gawmaw Hkawng Yae

#vaticannews

#rvakachinservice 

https://www.vaticannews.va/en/pope/news/2021-09/pope-audience-arche-foundation.html