Wa Sarabyin: Sasana Ma Ni Gaw Du Wa Na Prat Ladaw A Matu N Nga N Mai Ai Apu Asi Ni Rai Ma Ai

June 10, bat manga ya shani, Wa Sarabyin Francis, Uurope dan na “The Federation of Catholic Family Associations, bai Ukraine mundan majan a majaw hprawng htawt shang wa ai ni hpe “daini na nampan rai nga ai Sasana Ma ni gaw hpawt ni na apu asi tai na matu ahkyak kaba ni rai ma ai; shanhte n nga n mai, n lawm n mai rai nga ai, ngu tsun sang lang da ai.

Shanhte gaw makau grupyin hpe jahte tam jahten sharun ai lam n nga ai; shanhte hpe malu masha sadi shahka rai jai lang chye na matu sharin ya ra ai, ngu Nawku hpung masha ni hpe shadum da ai.

Shinggyim wuhpung wuhpawng ni gaw kun dinghku kaw nna hpang ai hpe anhte ni dum chye da ra ga ai. Wuhpung wuhpawng gaw kun dinghku law law hpe hpawng da ai rai nga ai hpe dum ga ngu mung shadum da ai.

Nawku Hpung Sasana gaw 2021 October -2023 October lapran galaw nga ai Sasana Rapdaw zuphpawng hkrun lam hta anhte hkawm nga ga ai. Dai gaw Nawku Hpung gaw kun dinghku ni rau hpawng de ai kun dinghku langai rai nga ai hpe hkrang shapraw ai hkrunlam rai nga ai, ngu Wa Sarabyin sang lang da ai.

Wa Sarabyin gaw, ya ten, Ukraine Mungdan kata majan a majaw Europe Dan ting hta jam jau nga ai sha n-ga, mungkan ting hkra machyi nga ai hpe myit n pyaw rai nga ai.

“Kun dinghku shagu gaw majan hpe n ra sharawng ma ai re” ngu mung tsun dan da nga ai.

Ndai zawn re ai aten hta, The Federation of Catholic Family Associations kawn kun dinghku hte seng nna mungkan shara shagu kun dinghku wuhpung wuhpawng ni hte hkrum zup zuphpawng hpawng let daw jau magam, ap nawng magam, garum shingtau magam ni hta shang lawm na matu ladat shaw hpaji jaw, n-gun jaw garum ya nga ma ai, hpe mung Wa Sarabyin Francis shakawn da nga ai.

Dai gaw kadai mung shingtai n re ai hpe myit shadum ya ai rai nga ai, ngu matut tsun sang lang da ai.

“Matut manoi rai nna ap nawng daw jau nga mu! Kabu Gara Shiga hta rawng ai hte maren, Kabu Gara Shiga hpyi shawn nga ai hte maren, jin jin rai nga nna aten shagu ap nawng daw jau nga mu” nga nna hpang jahtum n-gun jaw ga tsun ngut ai hpang  shaman ga tsun let shi a matu akyu hpyi ya nga na hpe mung hpyi shawn da nga ai.

By Fr. Patrick Gawmaw Hkawng Yae