Wa Sarabyin: Philippines Mungdan De Kahtawlik Sasana Shang Ai (500) Ning Hpring Ladu Hkrum Misa Hkungga Nawng Jau Ya

March 14, laban shani, Philippines Mungdan de Hkristan ni du shang wa ai (500) ning hpring Misa Hkungga nawng jau ya let Hkristu a Sasana Magam gun Sape ningnan ni tai na matu n-gun jaw da ai lam chye lu ai.

Misa Hkungga hpe San Peter Nawku Htingnu Kaba hta nawng jau ai rai nna, Philippines  Cardinal Luis Antonio Tagle hte rau Filipina masha ni mung Wa Sarabyin woi awn ai Misa Hkungga hta nawng jau lawm ma ai lam chye lu ai.

Shi a mungga hta Filipino masha ni lai sai 500 ning aten kaw nna Kabu Gara Shiga hpe hkam la lu sai lam, dai Kabu Gara Shiga gaw Philippine mung shawa masha ni hta dan dawng nga sai lam madi madun ya ai.

“Nanhte a myi hte myi man, nanhte a mahkawn mangoi hte akyu hpyi ga ni hta dai Kabu Gara Shiga ni hpe mu lu ai. Mungkan shara shagu hte anhte Hkristan wuhpung wuhpawng ni hta nanhte gun sa ya ai kabu gara lam a matu nanhte hpe chyeju dum dik nngai,” ngu Wa Sarabyin Francis Philippine masha ni hpe shakawn shagrau da ai.

“Kabu Gara Shiga hpe ndau shabra na matu galoi mung hkum hkrit ga; daw jau na matu galoi mung hkum hkrit ga; tsawra na matu mung galoi mung hkum hkrit ga; nanhte a kabu pyaw ai lam hte Nawku Hpung hte masha ni hpe garum ya nga ai. Nawku Hpung gaw mungkan ting hpe tsawra ai,” nga nna mung matut n-gun jaw da ai.

Yesu Madu gaw anhte a kabu pyaw lam a ningpawt daju re. Kabu Gara Shiga a salum rai nga ai, Yh 3:16 hta na “Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsaw ra wu ai,” ngu ka da ai hpe madi madun let n-gun jaw da ai.

Kabu Gara Shiga gaw myit shingran (idea) mung n re ai, doctrine mung n re ai. Raitim Yesu Madu hkum nan rai nga ai, ngu nna mung shang lang da ai. Karai Kasang mungkan ga hpe grai tsaw ra ai majaw Shi a Kasha anhte hpe jaw ai re.

Kabu pyaw ai lam gaw tinang hkum hpe ap nawng ai hta sha nga ai. Anhte tsaw ra magang jaw lu magang rai nga ai. Dai majaw hpring tsup ai kabu pyaw lam gaw, Karai Kasang Shi a Kasha shingtai anhte hpe jaw ya ai zawn, anhte ni tinang hkum hpe ap nawng let daw jau ai lam rai nga ai ngu Wa Sarabyin Shi a mungga hpe Pilippine mungdan hta Catholik Sasana shang ai (500) ning hpring Misa Hkungga hta htawn tsun da ai.

Philippine mungdan na Cardinal Tagle mung Wa Sarabyin Francis, ya na zawn shanhte mungdan a matu Misa Hkungga nawng jau ya ai majaw mung shawa masha yawng a malai chyeju dum ai lam tsun da ai hpe Vatican Shiga Dap kaw nna matut manoi ndau da ya ma ai.

Misa Hkungga nawng jau ngut ai hpang, Philippine Mungdan na Filipino ni hte ni htep nga ai lam madun ai Wa Sarabyin hpe yawng a malai chyeju dum mungga hpe Manila na Saradaw Kaba Archbishop, Cardinal Tagle kawn tsun ya ai.

1521-2021 shaning laman chyeju hta chyeju kahtap kahtap nna hkam la lu ai hpe mu lu ai lam, Shaning (500) laman hkam la lu ai chyeju kumhpa ni a matu Karai Kasang hpe chyeju dum shakawn ai lam, Sasana shang magam gun Jau, Mama ni, Wenyi kanu kawa ni, Tarahkaw sara/num ni, Jau Ginwang ni, Hpaji jawng hte sara/num ni, tsi rung tsi gawk hte tsi sara/num ni, chyahkrai jawng hte chyahkrai ma ni, yi sun hkauna galaw sha ai ni, kan bau magam galaw ai ni, matsan mayan ni, tsun ga nga yang Philippine masha ni yawng a sut gan gaw Yesu hkum nan rai nga ai lam, Karai Kasang a chyeju hte sha Filipino Hkristan masha ni makam masham hpe hkam la lu ai re lam, myit mada lam kaba langai gaw matsan ai mungdan, sut masa lam hta rapra lam n nga ai mungdan, mung masa lam hta gasu kabrawng ai lam, nbung laru typhoon hkring hkring byin ai lam, volcanic eruptions byin ai lam, nnang nawn nawn ai lam, ya na chyam bra ana zingli tsin-yam hkrum ai lam ni a lapran makam masham hpe hkam la lu nna dai makam hta ngang grin nga na sha rai nga ai ngu Cardinal Tagle chyeju dum mungga hta Philippine mungdan a masa lam hpe tsun hpaw dan ai lam mung chye lu ai.

Hpang jahtum hta Misa Hkungga nawng jau woi awn ya sai Wa Sarabyin Francis hpe chyeju dum dik ai lam tsun ai.

March 14, laban shani, San Peter Nawku Htingnu hta, Philippine de Catholic Sasana shang (500) ning hpring Misa Hkungga hpe Wa Sarabyin Francis kawn nawng woi let Filipino masha ni a matu mungga htawn ya ai shiga hte Misa Hkungga nawng jau ya ai Wa Sarabyin hpe Filipino masha yawng a malai chyeju dum ga hpe Cardinal Tagle kawn tsun lai wa ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-03/pope-francis-mass-500-anniversary-christianity-philippines.html

https://www.vaticannews.va/en/vatican-city/news/2021-03/cardinal-tagle-gratitude-pope-francis-mass-philippines-500.html