Wa Sarabyin: Nawku Hpung Hte Mungkan Hta Kanu Nu Maria Hpe Kaja Wa Sha Ra Kadawn Nga Ai

Wa Sarabyin: Nawku Hpung Hte Mungkan Hta Kanu Nu Maria Hpe Kaja Wa Sha Ra Kadawn Nga Ai

Wa Sarabyin Francis gaw October 24, bat 6 ya shani Roma kaw na Pontifical Theological Faculty “Marianum” kaw na Jawng Ma ni hte Magam gun ni hte hkrum shaga ai shaloi, Kanu Nu Maria a lam sumru woi da ai.

“Maria gaw num sha ni hte kanu ni a katsi kamang re” ngu Wa Sarabyin Francis tsun da ai.

Wa Sarabyin Francis gaw dai jawng kaw na jawng ma 200 hte sarin sara ni a lam hpe comment jaw ai hta “Marianum” Jawng gaw Maria a daw jau ai katsi kamang hpe la nna sak hkrung sa nga ai re lam chye lu ai. Dai jawng hta Kanu Nu Maria hte seng ai makam masham lam ni hte Karai Hpaji ni hpe madung da sharin nga ai lam mung chye lu ai.

Kanu Nu Maria a masin salum hpe shang yu yang, numsha ni hte kanu nu num hpung ni a katsi kaja tai ai nau hpa lam ni shi kaw nga nga ai hpe mu lu ga ai. Elizabeth gaw “Karai a Kanu” re ai hpe hkam sha lu ai, dum chye nga ai; Karai a Kanu hku hkap tau la ai. Yesu Madu hkum nan Nu Maria hpe kanu nu num hpung ni hta na kaja dik htum wa re ngu tsun da ai.

Nu Maria A Kanu Prat Gaw Nau Na Majing, Kahpu Kanau Majing Prat Hpe Gaw De Ya Ai

“Nu Maria gaw Karai Kasang hte anhte hpe kahpu kanau shatai ya ai; Nawku Hpung hte Mungkan hpe kahpu kanau shatai ya ai,” ngu Wa Sarabyin tsun ai.

Nawku Hpung gaw kanu Nu Maria a masin salum hpe tam mu lu ra ai. Dai gaw gahkyin gumding lam hpe jaw ya ai. Shi a kashu kasha ni a dum nta shatai ya na matu ndai mungkan ga hpe shi hta ra nga ai.

Anhte a Kanu Nu Maria gaw mungkan ga ningnan hpe shangai ya na matu ra sharawng nga ai. Dai mungkan hta anhte ni yawng nau na majing, kahpu kanau majing myit masin hte wuhpung wuhpawng hpe gaw de nga na ra sharawng ai ngu Wa Sarabyin a sharin shaga laika “Fratelli tutti” (no. 278) hta sharin shaga da ai.

 “Anhte hpe shangai shaprat asak jaw ya nna  si mani ai hte bau kaba ya ai kanu ngu ai ra ga ai. Dai gaw anhte a matu kumhpa kaba rai nga ai hte shinggyim kun dinghku masha langai hku rau nga pra na matu woi awn zinglum ya ai re”

Wa Sarabyin tsun ai hte maren, kanu ni nnga ai mungkan ga gaw shawng lam myit mada shara ngu mung nnga ai rai nga ai.

“amyat lu ai lam hte amyat langai hte sha anhte a shawng lam myit mada shara pandung hpe jaw lu na n re. Dai amyat ni gaw n bung pre ai lam hte n tara ai lam hpe shabyin ya chye nga ai. Kanu ni gaw kasha shagu hpe tinang a dum nta hta nga ai zawn nga hkam sha shangun ai hte myit mada shara mung jaw ya ai.”

Kanu Langai mi hku nna, Nu Maria gaw arau hkum zup hpawng de ai hte arau nga pra ai ngu ai prat a lachyum hpe sharin ya ai. “Marianum” gaw n bung pre ai karai hpaji ni hte wenyi lam yan hte sharin shaga ai htung lai masa ni hte bung pre ai kun dinghku kaba hpe arau gaw de ya lu ai ngu Wa Sarabyin tsun shadum da ai.

Maria gaw num prat hte anhte hpe manu dan ai shinggyim masha wuhpung shatai ya ai

Kanu gaw Nawku Hpung hpe kun dinghku langai sha shatai ya ai zawn, kanu gaw anhte hpe manu dan ai shinggyim masha ni shatai ya ai. Kanu Nu Maria, shi a prat hta san seng ai hte maren anhte a prat hta mung san seng ai hku woi awn ya ai majaw Maria hte seng ai hpaji hparat ni hpe hka ja na matu Wa Sarabyin anhte hpe n gun jaw da ai.

 “Mungkan ga de Karai Kasang hpe gun sa ya ai kanu gaw shi a kumhpa kaja ni hpe anhte a labau hta gun sa ya lu ai”

Anhte gaw Kanu Nu Maria a kyang lailen hte nga sat nga sa lam hpe ra kadawn ga ai re ngu Wa Sarabyin Francis, Roma kaw na Pontifical Theological Faculty “Marianum” kaw na Jawng Ma ni hte Magam gun ni shadum sharin shaga ai hpe Vatican kaw nna ndau da ma ai.

24 October 2020, 12:36

https://www.vaticannews.va/en/pope/news/2020-10/pope-francis-marianum-audience-mary-mother-woman.html