Wa Sarabyin: Nawku Hpung Gaw Kun Dinghku Ni Hpe Kaja Wa Sha Madat Hkam Sha Let Shanhte Hpe Sasana Magam Hta Shang Lawm Shangun Ra Ai

June 9, bat masum ya shani, hpung shawa masha ni hte hkrum shaga ai ten, Jau ni a sasana magam hta hkungran dinghku de sai ni hte kun dinghku masha ni hpe shang lawm shangun na gaw grai ahkyak na re ngu, “Apostolic Exhortation amoris Laetitia” hpe sumru let tsun shadum da nga ai.

Dai shani gaw “the Dicastery for the Laity, Family and Life” a shawa zup hpawng ‘forum’ hta lawm ai ni  Wa Sarabyin a 2016 shaning hta shapraw da ai, the Apostolic Exhortation “Amoris Laetitia   hte maren manga ning masin mahkyen hpe bawngban ai shani re lam chye lu ai.

Wa Sarabyin Francis kawn 2020, December 27 ya shani, Madu a Lamu Kasa Akyu Hpyi ngut ten, “Amoris Laetitia Family year”, kun dinghku shaning, ngu masat da lai wa sai rai nga ai.

Dai zawn masat ai a yaw shada ai lam gaw Chyoi Pra ai Wenyi e lam madun ya let Nawku Hpung kata hpung woi ni hte sagu hpung masha ni rau shada madat mara let ra kadawn ai lam ni hta shada garum shingtau hkat na matu, grau nna kun dinghku masha ni hpe garum shingtau ya lu na matu, yaw shada let Nawku Hpung a Kabu Gara Shiga hpe shatsawm shachyam shabra sa wa lu na matu rai nga ai.

The webinar rau, June 9-12 lapran galaw nga ai kun dinghku hte seng ai zup hpawng kaba kaw episcopal Conferences kaw na lit shatsam saw shaga hkrum ai masha 60 hte mungdan shagu na kun dinghku hte seng ai dakkasa 30 ni lung nga ma ai lam mung chye lu ai.

Nawku Hpung gaw kun dinghku masha ni ra kadawn ai lam ni hpe madat hkam sha lawm nna shanhte hpe sasana magam hta shalawm la ra ai lam, grau nna yak hkak jam jau lam hkrum sha nga ai kun dinghku masha ni a prat hpe chye na hkam sha lawm let tsawra ai prat hta langai sha jawm pawng wa shangun ra ai, ngu Wa Sarabyin madi madun sang lang da nga ai.

Kashin kamun chyeju kumla hkam la sai ni yawng gaw sasana magam gun lit lu da sai ni rai ma ai majaw sasana magam hta shang lawm ra ai, ngu mung sang lang n-gun jaw da nga ai.

Sasana magam hta gumprawn ai magam lit

Sakramentu chyeju kumla hkam la ai ni yawng gaw, ga shadawn: Hkungran Sakramentu hte Jau shatai Sakramentu hkam la ai lam ni gaw, Karai Kasang a sagu hpung hpe gaw de ai hta daw jau shang lawm na matu rai nga ai.

Hkungran ta matut ai ni gaw Nawku Hpung hpe gaw sharawt na matu Hkungran Sakramentu chyeju kumla hpe hkam la ai rai nga ai. Dai majaw kun dinghku ngu ai gaw Nawku Hpung dum nta rai nga ai. Dai kun dinghku hta Hkristu Madu nga nga ai. Hkungran la hte hkungran num yan a lapran, kanu kawa hte kasha ni a lapran Hkristu Madu shanhte hte rau nga nga ai.

Tsawra mahkrum madup gaw kun dinghku masha ni hta nga nga ai gaw Nawku Hpung hta lawm taw nga ai prat hpe n-gun shatai ai ru pawt rai nga ai. Dai re ai majaw dai Hkungran Sakramentu a atsam marang e kun dinghku gaw Nawku Hpung hpe mai kaja lam hte rawt jat galu kaba wa shangun ai, ngu mung sang lang da nga ai.

Hkungran Sakramentu hkam, Jau shatai a ya hkam la ai gaw dinghku masha ni mung, Sasana magam gun Saradaw, Jau, Deacon, Ma Ma, Brother ni mung, Nawku Hpung hpe yu lakawn ai lit magam hpe gumprawn nna hkam la sai mung rai nga ai.

Jau aya hkam la da ai ni gaw Wenyi e nhtoi jaw ya ai hpe hkam la ra ai. Rai yang she hkungran ta matut da ai ni hpe Kabu Gara Shiga ndau shana let sasana galaw ai hpe shanhte maga hku nna asharawng ashara rai jin jin hkap la na rai nga ai. Dai majaw kun dinghku de ai ni hte Jau aya hkam ai ni gaw Nawku Hpung hpe gaw de ai hta garan ginhka lam n nga ai sha arau jawm gaw de sa wa lu na rai nga ai, ngu mung sang lang da nga ai.

Hpang jahtum mungga hta, zup hpawng hta shang lawm ai ni, myit mang sumru la lu ai lam ni hpe garan gachyan hkat let kun dinghku masha ni hpe sasana galaw ai magam hta aten ladaw hte htap hkuk ai masin masa hku Kabu Gara Shiga hpe shachyam shabra ndau ya lu na re ngu sang lang n-gun jaw da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-francis-amoris-laetitia-family-video-message-evangelization.html