Wa Sarabyin: Myu Shayi Ni Bum Ni Hpe Htawt Sit Ma Ai!

image from Vatican website

December 11, laban shani, Bum N'Nhtoi Masat Dingsat shani, Wa Sarabyin Francis, shinggyim lasha, numsha ni yawng kaja myit masin hte bum ni hpe makawp maga yu gawn shatsawm jahtap na matu, hpyi shawn da nga ai.

Wa Sarabyin Francis gaw, Madu A Lamu Kasa Akyu HPyi Ga tsun ngut ai hpang, "Dai ni gaw International Mountain Day, bum n'htoi rai nga ai," ngu tsun hpang let, "dai masat dingsat n'htoi gaw anhte shinggyim prat hte hpan da hkrum nga yawng nga pra, n-gawn tara ting hte seng ai lam a matut manoi nga ai hpe myit shadum ya nga ai" ngu tsun sang lang da nga ai.

Dai hpang, "Myu shayi ni gaw bum ni hpe htawt sit lu ma ai," ngu tsun let myu shayi ni hpe shakawn da nga ai.

Dai gaw teng ai: myu shayi ni gaw bum ni hpe htawt sit lu ma ai! Myu shayi ni gaw makau grupyin shingra tara hpe jasan jaseng, makawp maga, shatsawm jahtap chye ma ai hpe tsun ai rai nga ai. Shanhte a  lit magam rai nga ai hpe mung myit shadum ya nga ai. Bum masha ni gaw wuhpung wuhpawng hte seng ai hkam sha lam hpe sharin la nna rau hkawm rau sa rau lahkam na ra ga ai, nga nna mung Wa Sarabyin Francis tsun da ai.

Shaning shagu "Bum N'htoi" hpe December 11 ya shani galaw ai rai nga ai. Dai gaw makau grupyin hte bum ni hpe makawp maga na, Num, La yawng gaw maren mara lit nga ai hpe myit shadum ya ai.

Daining na "Bum Nhtoi Masat Dingsat" hta "Women move mountaines", Myu shayi ni bum ni hpe htawt sit ma ai, ngu ai gabaw ginlam hpe masat da ai rai nga ai. Bum hte seng wa yang myu shayi ni gaw madung ahkyak ai kaw shang lawm ma ai majaw ndai zawn masat ai rai nga ai.

"Shanhte ni gaw bum hte seng ai lam ni a managers ni, hparan ai ni, hkum hkrang hte seng ai ni hpe sin makawp maga ai ni, ja wa ni kaw na hkam la lu ai hpaji machye machyang ni hpe zing hkang ai ni, bum tsi hpaji kung kyang ai ni rai chye ma ai" nga nna Wa Sarabyin tsun da ai.

Bum ni hta hkai sun galaw ai hta buga rawt jat lam a matu arang bang ai lam n law ai, lamu marang n htuk ai lam ni grau law jat wa ai majaw, la ni gaw htawt sit hkawm na madung myit wa ma ai hpe maram lu ai lam Wa Sarabyin Francis tsun hpaw da ai.

Dai majaw myu shayi ni gaw shawoi la ni galaw ai bungli ni hpe lit la galaw ra ma ai raitim, atsam n nga ma ai. Daw dan ai lam hta la ni zawn atsam n nga ma ai, gawng kya chye ma ai, jai lang ra ai arung arai ni hpe rapra ai hku jai lang n lu byin chye ma ai.

2022 shaning a "bum n'nhtoi" gaw, num, la maren mara re ai hpe shatsaw na ahkaw ahkang kaba langai rai nga ai. Dai majaw shinggyim tara rapra lam, sak hkrung lam a matu hkai rem lam hta hkam jan lu ai atsam hpe shatsaw na matu madi shadaw tai na ra ai, nga nna Wa Sarabyin Francis shang lang da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-angelus-appeal-international-mountain-day.html

 

Add new comment

6 + 9 =