Wa Sarabyin: Myit Mada Lam Jaw Ai Hpaji Hpe Shatsaw Ga

Wa Sarabyin Francis gaw December 16, bat 3 ya shani, video kaw nna “Hpaji Hparat Lam Gaw Myit Mada Lam” re ngu tsun shana wa ai.

“Education is an act of hope.”

Wa Sarabyin tsun ai; “Hpaji hparat gaw ya ndai shara, ndai aten, bai shawng lam a matu galoi mung myit mada lam kaba rai nga ai.”

Chyam bra ana zingli Covid -19 tsin-yam hkrum ten, hpaji hparat a shingdu hkam sha ra ai lam ni

2020 shaning gaw Covid-19 tsin-yam a majaw, laklai ai shaning, langai hte langai tsan gang shangun ai shaning, wenyi lam hta nchyi nmu byin shangun ai shaning, si hkrung si htan kaba byin shangun ai shaning rai nga ai.

Ndai chyam bra ana tsin-yam hkrum shaning gaw hpaji hparat hka ja ai lam hta hkindang hkrum, mayak manghkang hkrum, ginchyum chyat ai shaning mung rai nga ai ngu Wa Sarabyin a video message mungga hta tsun da ai.

Hpaji hparat sharin hka ja nga ai jawng ma wan hkying jan a matu dingbai dingna byin shangun ai. Shanhte gaw shinggyim lailen ni hte machye machyang lam ni hta sharin hka ja nna rawt jat wa na lam hpe n hkam la lu ma ai; kau da ra ma ai; ahkaw ahkang jasum kau ra ma ai. Shara law law hta nsoi hpaji hte seng ai, myit masin hpaji hte seng ai, sut masa lam hte seng ai mayak manghkang hkrum, ginchyum chyat ai lam ni hpe hkrum sha nga ra ai.

Covid – 19 tsin-yam a majaw, grau nna mung masa lam hte shinggyim hku hkau lam mayak manghkang hte ginchyum chyat ai lam hkrum ai rai nna, dai zawn mayak manghkan kata hpaji hparat hka ja ra ai ma ni ahkaw ahkang hkrat sum ai rai ma ai.

Ndai zawn tsin-yam hkrum aten hta myit mada lam tawn, masin mahkyen lam ni hpe jahkrat, Karai Kasang a garum ya ai hte simsa ai hku hpaji hparat hpe shatsaw lu u ga matu rau jawm hpawng de nga ai majaw chyeju dum ai lam mung Wa Sarabyin Francis matut tsun ai.

Mungkan Rapdaw (UN) a Dawsang hte Lit Magam Ni (role and responsibility of UN)

Mungkan Rapdaw (UN) a dawsang hte lit magam gaw mungdan shagu na Asuya ni hte mung shawa wuhpung wuhpawng ni myit mada lam kaba hte hpaji hparat hka ja ladat ningnan hkrun lam hta rau jawm hkawm sa na lam hpaw ya na matu rai nga ai.

1945 shaning hta Wa Sarabyin San Paul VI UN hpe masat masa galaw ai ga laika hpe Wa Sarabyin Francis mahta nna tsun da ai gaw “Hkungga ai Du Gyi Salang ni e, nanhte ni magam bungli kaba hpe galaw lu manit dai; masha ni hpe simsa lam sharin ya nga myit dai; UN gaw hpaji hparat sharin ya ai jawng kaba nan rai sai,” ngu ai rai nga ai.

(2) lang ngu na mungkan majan ngut ai hpang 1945 shaning, UNESCO htuk shapraw da ai gaw da tara hkrang hpe bai myit dum na matu mung Wa Sarabyin saw shaga da ai. Gaw da tara hkrang ga hpaw gaw majan gaw gaw shinggyim masha ni a myit kraw kaw nna hpang ai re majaw, dai shinggyim masha ni a myit simsa lam hpe gaw de sa wa na matu rai nga ai.

Lai wa sai shaning (75) aten hta UNESCO hpe gaw de da ai ni jahkrat da sai, “tara rapra bung pre ai hpaji ahkaw ahkang” hte seng ai lam hpe matut hkrang shapraw sa wa na matu mung Wa Sarabyin matu shadum n gun jaw da ai. Dai rai yang she langai hte langai shada grau chye na hkam la let teng man ai machye machyang hpe hka ja lu nna hpu nau a prat grau chye na lu na rai nna shada garum shingtau lu na rai nga ai.

Hpaji hparat lam hten run hkrat sum wa magan ai dai ni na anhte a prat hta, mungdan Asuya ni 2030 shaning lapran aten galu ngang grin rawt jat galu kaba lam hpe yaw shada ai hkrang shachyaw gaw sharawt ladat hpaji myit ningmu ni gumhpawn let rau ta tut jawm shakut sa lu na matu UN kaw nna woi awn nga ai hpe mu lu ai majaw myit dik myit pyaw ai lam Wa Sarabyin Francis tsun da ai.

The heart of UN’s Sustainable Development Goals (SDG)” Shaning galu ngang grin ai bawng ring rawt jawt lam a akri madung gaw anhte shinggyim kun dinghku dum nta hpe makawp maga na hte shinggyim nau na tsaw ra garum shingtau lam hpe gaw shachyaw sharawt na matu rai nga ai ngu Wa Sarabyin Francis madi madun ya ai.

Tinang hta sak kung sai dinggai dingla ni hpe mung hkum malap ga, ngu Wa Sarabyin Francis “Hpaji Sasana 4.7 hte Mungkan Ting Hte Seng Ai Myit Hkrum Masin lamang hta video message hku nna shadum n gun jaw da ai shiga hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

16 December 2020, 14:31

#vaticannews

#rvakachinservice

Link

https://www.vaticannews.va/en/pope/news/2020-12/pope-videomessage-global-compact-education-mission-4-point-7.html