Wa Sarabyin: Mungdan Shagu Hte Seng Ai Wuhpung Ni Myanmar Mung Shawa Masha Ni Hpe Hkum Malap Da Ga

June 19, Laban shani, Madu A Lamu Kasa Akyu Hpyi Ga tsun ngut ai hpang, Wa Sarabyin Francis, Mungdan shagu hte seng ai wuhpung ni Myanmar mung shawa masha ni hpe hkum malap da kau ga, ngu shadum da nga ai.

Myanmar mungdan gaw 2021 February 1 ya shani kaw nna Mungdan Daru Magam Ahkang Aya hpe Myanmar Hpyen Dap kawn zing hkang la ai hpang mung shawa masha law law jam jau hkrum nga ma ai hkum yu shalai da kau ga ngu Wa Sarabyin Francis mungdan shagu hte seng ai Wuhpung ni hpe shadum dat ai rai nga ai.

Myanmar mungdan hpe tsaw ra ai dai ginra na Saradaw ni hte rau, Myanmar mung shawa masha ni a shinggyim sari hte shanhte sak hkrung lu ai ahkaw ahkang hpe hkum malap da kau ya ga, shanhte a shinggyim sari hte ahkaw ahkang hpe manu shadan hkungga ya ga, Shanhte a nawku daw jau shara, tsi rung tsi gawk ni, hpaji jawng ni hpe mung manu shadun makawp maga ya ga, ngu Wa Sarabyin, mungdan shagu hte seng ai wuhpung ni hpe matut shadum saw shaga da nga ai.

“Myanmar mungdan kata na mung shawa masha, mare masha law law shanhte a dum nta ni hpe kau da na matu jahkrit shama hkrum ai lam ni, dum nta, mare nawng wan nat kau ya hkrum ai lam ni, amyu myu hkrum sha nga ai shiga na lu ai. Raitim, shanhte hpe shinggyim nau na myit hte garum shingtau yaai ni mahtang grai naw shau nga ai lam mung na lu ai.  Ahkyak dik ai lam ni hpe pyi n lu garum ya nga ai hpe mung na lu ai majaw shanhte a hkrap nsen ni hpe anhte ni matut na taw nga ga ai” nga nna Wa Sarabyin mungkan mungdan wuhpung shagu hpe tsun shana dan da nga ai.

Lai wa sai laban hta Myanmar Mungdan, Kathawlik Saradaw ni hkum ra zuphpawng kaba galaw nna, Myanmar mungdan kata majan (civil war) hpe jahkring na matu sumtang laika (Statement) shapraw da masai rai nga ai.

Myanmar Mungdan, Kahtawlik Saradaw ni gaw shinggyim prat hpe manu shadan chye na matu mungdan ningbaw ningla ni, rawt malan hpung ni, mung shawa party ni, hte mung shawa masha ni yawng hpe hpyi shawn da ma ai.

“Shinggyim sari hte sak hkrung lu ai ahkaw ahkang hpe galoi mung, kadai mung tawt lai n mai ai. Chyoi pra ai shara ni rai nga ai Nawku daw jau shara ni, hpunggyi jawng ni, hte tsi rung tsi gawk ni, hpaji jawng ni, hpe manu shadan hkungga lara di nna makawp maga, shatsaw sharawt ra ai,” ngu Myanmar mungdan, Saradaw ni shadum da ma ai.

Mung masa lam n galaw ai, shinggyim wuhpung wuhpawng ni sawk sagawn da ai hte maren nga yang masha 1,900 sat hkrum sai rai nna, lai wa sai 2021 February 1 ya kaw nna ya du hkra rai yang mung shawa masha 11,000 rim hkrum sai lam chye lu ai.

The United Nations High Commissioner for Refugees kawn ndau ai hta mung shawa masha 800,000 a lahta de shara htawt sit nga ra taw ai lam chye lu ai.

Tatmadaw, Myanmar Hpyen Hpung gaw Nawku Jawng shara ni hte hpaji shalat jawng ni hpe ahkyak la dingyang rai nga ma ai lam Vatican Shiga Dap de shana dingyang naw rai nga ai lam mung Vatican Shiga Dap kaw nna ndau da ma ai.

Dai shani, Vatican hta sa hpawng nga ai, Italy du taw ai Myanmar mung masha ni hpe shaman ya let shi a mungga hpe ginchyum dat da ai.

 

By Fr. Patrick Gawmaw Hkawng Yae

#vaticannews

#rvakachinservice

#popefrancis

https://www.vaticannews.va/en/pope/news/2022-06/pope-angelus-appeal-myanmar-violence-international-comunity.html

 

Add new comment

1 + 0 =