Wa Sarabyin: Miwa Mungdan Nawku Hpung Masha Ni A Matu Akyu Hpyi Ya Nga Ga Ngu Saw Shaga Ai

Wa Sarabyin: Miwa Mungdan Nawku Hpung Masha Ni A Matu Akyu Hpyi Ya Let Shahte Hte Rau Rai Nga Ga Ngu Saw Shaga Ai

  May 23, Chyoi Pra Ai Wenyi Yu Hkrat Wa Ai Poi” laban shani, Miwa mungdan nawku hpung masha ni a matu akyu hpyi ya let shanhte hte rau rai nga ga ngu saw shaga da nga ai.

  Hpang shani gaw Miwa mungdan hta Hkristan ni hpe garum shingtau ya ai Nu Maria a poi hpe galaw na rai nna, dai hkinghtawng mying hte Miwa mungdan a kam hpa shara Nu Maria hku hkap la da ai rai nga ai lam, dai nhtoi hta shanhte hte rau akyu hpyi htinglu htinglai ya nga na matu “Regina Coeli” akyu hpyi ga tsun ngut ai hpang saw shaga da ai lam, Vatican Shiga Dap kaw nna ndau da ya ma ai.

  Miwa mung Shanghai na Sheshan hta nga ai Karai a Kanu hte Nawku Hpung a Kanu Nu Maria masat dingsat shara, chyoi pra ai shara hta Miwa Mungdan na Kahtawlik nawku hpung masha ni myit mada lam kaba tawn da let hkri ba, pu ba ai lam hkoi mat u ga matu yaw shada nna, sa du akyu hpyi htinglu htinglai ai lam hpe shaning shagu galaw nga ai lam mung chye lu ai.

  “Miwa Mungdan kata na kun dinghku masha ni hte Hkristan wuhpung wuhpawng ni gaw makam ngang kang ai hte tsawra myit hta galum kahkying gumding nga na lam hta hkawm sa na gaw grai nan kaja ai hte grai nan ra ahkyak ai rai nga ai. Ndai hku nga sa ai rai yang, kanu kawa ni hte kasha ni, kawoi kadwi ni hte kashu kasha ni, hpung woi ni hte kam sham ai ni yawng gaw kasa ni Chyoi Pra a Wenyi yu hkrat wa ai a marang e Nu Maria hte rau akyu hpyi ai hta galung kahkying gumding nga ma ai kasi ningli hpe hkan shatup sa wa ai rai nga ai” ngu Wa Sarabyin Francis mungga htawn da nga ai.

  Matut nna mung Miwa mung na Hkristan Hpung masha ni a matu akyu hpyi ya let shanhte hte rau rai nga ga ngu mung shi a masin salum a sung dik shara hta na akyu hpyi ya let Hkristan hpung masha ni yawng hpe saw shaga da nga ai.

  Chyoi Pra ai Wenyi gaw mungkan ting na nawku hpung a sasana magam hta garum ya nga ai rai nna, mai kaja ai lam galaw ai hta, garum shingtau magam lam hta, simsa rapra ai lam ni hpe gaw de ai lam ni hta Miwa mungdan na Hkristan ni hpe mung garum ya u ga akyu hpyi da ya nga ai. 2007 shaning na May 24 ya shani, Hkristan ni hpe garum ai Maria poi nhtoi hta, Wa Sarabyin Benedict XVI mung Miwa mung na Nawku Hpung masha ni a matu akyu hpyi ya lai wa ai lam chye lu ai.

  “Letter to the Chinese faithful” Miwa Mungdan na kam sham ai hpung masha ni hpang de shagun dat ai laika hta, “Madu Yesu hta langai sha hpawng de wa na matu ningnan bai gram shatsawm ai hku nna Roma na Sarabyin hte matut mahkai ai kam sham ai nawku hpung hku galai shai wa ai gaw sung grau ai hte dan len ai nawku hpung hpe gaw de sa wa ai rai nga ai” ngu tsun n-gun jaw da nga ai.

  Miwa mungdan na kam sham ai hpung masha ni yawng gaw makam masham hta ngang kang let, nau na myit majing hte galung kahkying gumding nga mu ga, kabu pyaw let Yesu Madu hte nawku hpung hpe sakse hkam sa lu mu ga, kamsham, myit mada, tsawra lam ni hpe shatsaw sa wa lu ai dingman dinghpring ai mung shawa masha ni tai nga mu ga matu Wa Sarabyin Francis akyu hpyi da ya nga ai.

  Du na 2022 shaning, October shata hta Wa Sarabyin rung hte Miwa Mungdan Asuya ni lapran mungdan kata Saradaw ni hpe lit shatsam na hte seng nna myit hkrum lam hpe bai gram let shaning jat sa wa na myit hkrum bawngban lam hpe bai galaw sa wa na re lam Vatican mare kaba na L’Osservatore Romano Shi Laika shapoi dap kaw nna shi laika tsun da ma ai.

  Sarabyin Rung rai nga ai “the Holy See” kaw nna htuk shapraw ai ndau laika “statement” hta myit hkrum da ai lam gaw Nawku Hpung a sasana lam hta sari manu kaba na hte Miwa mung shawa masha yawng a kyu ara matu re ai lam, hte ndai zawn matut mahkrai let magam bungli rau galaw lu ai majaw Party shagu hpe mung chyeju dum ai lam lawm nga ai.

  Ndai shiga hpe Vatican Shiga Shapoi Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

Source; Vatican News