Wa Sarabyin: May 16 Ya Shani, Myanmar Mungdan A Matu Misa Hkungga Nawng Jau Ya Na

Wa Sarabyin: May 16 Ya Shani, Myanmar Mungdan A Matu Misa Hkungga Nawng Jau Ya Na

Roma Kaw Nga Ai Myanmar Mung Masha Ni Hte Rau May 16, “Yesu Madu Sumsing Lamu De Lung Wa Ai Poi” laban jahpawt 10:00 a.m, aten tup hta Myanmar Mungdan simsa wa na matu laksan Misa Hkungga nawng jau ya na re Vatican Shiga Dap kaw nna ndau da ma ai.

May shata hta mungdan shara shagu na Maria shrine ni hta hpawng de nna Rosary hti akyu hpyi lanang hte maren Rosary hti akyu hpyi shakut na matu “Marathon of Prayer” ngu ai ga gaw ginlam hte n’gun jaw saw shaga da nga ai.

May 1 ya shani San Peter Nawku Htingnu hta “Marathon of Prayer” Rosary hti akyu hpyi lamang hpe hpaw hpang ai hta Wa Sarabyin Francis hkum nan hpaw hpang woi awn ya sai rai nna, May 31 ya shani hta mung Vatican Garden na Maria shrine a shawng kaw Rosary hti akyu hpyi ai lamang hta Wa Sarabyin Francis hkum nan shang lawm let May shata na Rosary hti akyu hpyi lamang hpe ginchyum dat shangut na re lam chye lu ai.

Maria shrine nga ai mungdan ni hta akyu hpyi na matu masat ai hta anhte Myanmar Mungdan, Nyaunglebin, Lourde Maria shrine hpe mung masat shalawm da ya nga ai.

Nhtoi gaw May 24 ya shani anga ai rai nna, dai shani na yaw shada lam gaw “Ra ahkrak ai daw jau lam ni hpe garum ya nga ai ni yawng a matu” rai nga ai.

Cardinal Charles Bo mung Kahtawlik Hpung Masha ni yawng “Myanmar Mungdan ting simsa, rapra, sari manu nga ai mungdan byin tai wa na matu” ndai May shata tup hta Rosary Hti Akyu Hpyi let Misa Hkungga nawng jau, Chyoi Pra Hkum kawan ai hte kaga nawku daw jau magam ni hta shang lawm nga na matu n-gun jaw saw shaga da nga ai.

Wa Sarabyin Francis gaw Myanmar Mungdan kata na Christan Nawku Hpung masha ni a mungdan simsa rap ra lam a matu akyu hpyi shakut shaja nga ai lahkam ni hpe shakawn let shi a myit masin wenyi hte grai nan ni htep nga ai lam mung re ai ngu lai wa sai laban shani, San Peter pa hta, Madu A Lamu Kasa Akyu Hpyi Ga tsun ngut ai hpang na shi a mungga hta tsun shapraw da nga ai.

“Anhte ra ahkyak ai aten hte yak hkak jam jau hkrum shagu anhte a Kanu kaw nhtang wa chye ga ai; ndai shata hta Myanmar Mungdan hpe woi awn nga ai ningbaw ningla ni a masin salum ni hpe Sumsing kanu Maria shadum sharai ga tsun ya u ga; shaloi shanhte ni a lapran shada manhkrum hkrum shaga let prinem htingram lam hte simsa rapra lam hta hkawm sa lu na n-gun atsam hpe tam mu hkam la lu na ma ai,” ngu mung Wa Sarabyin Francis matut saw shaga da nga ai.

February 1 ya shani kaw nna mungdan daru magam hpe Myanmar hpyendap kawn zingla ai hpang mungdan kata simsa lam n nga byin nga ai hte mung shawa masha ni mara kata rim, tara jeyang, hkyukhtawng sharawng, gap sat, zingri sat hkrum ai lam ni law law byin nga ai majaw ya na zawn Wa Sarabyin hte Mungkan Kahtawlik Nawku Hpung ja ja akyu hpyi ya nga ai rai nga ai.

Myanmar mungdan kata simsa rapra lam bai lu la na matu ASEAN, UN hte Mungkan mungdan law malawng mung lam amyu myu hku garum shingtau ya nga ma ai rai nga ai.

Wa Sarabyin Francis Myanmar Mungdan hte ni ni htep htep nga nga ai lam

2017 shaning hta Myanmar Mungdan de sa du kawan let Mungdan a matu Misa Hkungga nawng, nawku daw jau magam ni hpe woi awn galaw lai wa ai Wa Sarabyin Francis gaw 2021February 1 ya Myanmar Hpyandap kawn Mungdan Daru Magam hpe zingla ai hpang kade nna ai, February 7, laban shani hta “Myanmar Hpyandap ningbaw ningla ni mung shawa akyu ara hte yawng a akyu ara matu ap nawng daw jau na myit ni rawng wa mu ga, simsa rapra ai democracy mungdan hpe gaw de sa ai myit rawng wa mu ga matu shi hkum nan akyu hpyi nna Mungkan Nawku Hpung masha ni hpe mung dai lam a matu akyu hpyi shaket let byin mai ai lam hku shang lawm garum madi shadaw ya na matu hpyi shawn da lai wa ai.

March 3 ya shani mung “Mungdan akyu ara matu yaw shada let mung masa ningbaw ninglaw ni hpe shalawt ya na hte simsa rapra lam lu na matu manhkrum hkrum shaga bawngban sa wa na matu akyu hpyi ya nna seng ang ai ni hpe hpyi shawn da lai wa ai.

March 17 ya hta mung, Myanmar Mung, Myitkyina kaw na Ma Ma Ann Rosa Nu Tawng hte rau Myanmar Mungdan na lam ntsa hta lahput hputdi let ‘gumsheng ai lam jahkring manu, hkum galaw manu!,’ nye a lata ladawn let hpyi shawn nngai, ngu Wa Sarabyin Francis hpyi shawn lai wa ai.

Ma Ma Ann Nu Tawng gaw SFX Ma Ma Hpung kaw nna rai nna, Myitkyina, Kahtawlik Nawku Hpung kawn hpaw da ai Mali Gindai Tsi Gawk hta magam gun nga ai Ma Ma rai nga ai. Februay 28 ya shani Myanmar Hpyandap hte Balik Dap kawn mung shawa n-gun madun ai ni hpe sinat kapaw jahkrit shama let rim la nga ai lapran kaw tinang asak hpe n lahpawt ai sha hpyan lanak kapaw taw nga ai shawng kaw sa nna lahput hputdi let sinat gap jahkrit hkan rim ai lam ni n galaw na matu hpyi shawn tawngban lai wa ai rai nga ai.

Wa Sarabyin Francis gaw April 4 ya shani hta mung Myanmar mungdan simsa rapra democracy mungdan lu la na matu prat dep ai myit masa, prat dep ai hpaji ladat ni hte dawsa ai lam n nga, simsa ai hku nsen shapraw nga ai Myanmar Mung na Ramma ni hte rau ni ni htep htep nga nga ai lam, n ju ndawng manawn masham ai hte gumshen ai lam ni hpe tsawra myit hte tsan tsan de shaden kau lu na re lam tsun n-gun jaw da nga ai.

Simsa rapra democracy lu ai Myanmar mungdan rai wa u ga matu du na laban, May 16 ya shani hta Wa Sarabyin Francis hte rau Misa Hkungga nawng jau ai hta shang lawm akyu hpyi la lu na matu yaw shada let Vatican Shiga Dap kaw nna ndau da ai hpe RVA Jinghpaw Nsen Shapoi Dap kawn shalai ndau dat ga ai.

By Fr. Patrick Gawmaw Hkawng Yae

#vaticannews #rvakachinservices

Source: Vatican News