Wa Sarabyin: Matsan Ai Ni Hte Ni Ni Htep Htep, Hku Hku Hkau Hkau Hkrum Shaga Lu Na Lam Hpaw Ya Mu

"Matsan masha ni hte ni ni htep htep nga mu, shanhte hte hkrum shagu lu hkra lam hpaw ya mu," nga nna, Wa Sarabyin Francis, Saradaw Ningnan ni hpe n-gun jaw saw shaga da ai.

Wa Sarabyin Francis hte Wa Saradaw ningnan ni, September 19, bat langai ya shani Apostolic Palace kaw hkrum shaga ma ai rai nga ai. Saradaw ningnan ni hte laksan hkrum shaga ai hpawng lamang re lam chye lu ai.

Saradaw ningnan ni a lahkawng lang ngu na sharin hpawng hpe, the Dicasteries for Bishops and for Eastern Churches kawn woi awn galaw ai rai nna, Regina Apostolorum Atheneum hta September 12-19 laman galaw ai hpawng rai nga ai.

Shawng lang na sharin hpawng hpe gaw September 1-8 laman hta galaw lai wa ai rai nna, Cardinal Pietro, Secretary of State, Missa Hkungga nawng jau woi nna hpaw hpang lai wa sai rai nga ai.

Hpawng de ai lamang hpe Covid ana zingli ninghkap makawp mahkyen hte maren galaw sa wa ai.

Lai wa sai shaning hte daining na laman hta Saradaw aya hkam sai Saradaw ningnan (200) daram sa du hpawng ma ai lam, Latin America kaw na Saradaw ningnan ni law malawng rai ma ai lam chye lu ai

Ndai hkrum shaga hpawng gaw wanglu wanglang hkrum shaga mai ai lamang rai nga ai. Sarabyin Francis hte Saradaw ningnan ni hkrum shaga hpawng lamang hpe gaw Clemetine Hall hta galaw ai re lam chye lu ai.

"Saradaw ni, Kap bra ana zingri hkoi mat  wa ai hpang, Kabu Gara Shiga hkaw tsun na" ngu ai ga baw hte lang nna Kabu Gara Shiga hkaw tsun na matu Wa Sarabyin Francis ga baw lata da ya ai.

Grau nna gaw matsan mayan re ai ni hte nihtep nga ya matu, shanhte ni a lapran matut mahkai ya na matu, ra ai lam shagu hta garum ya na matu Wa Sarabyin Francis numhtet numra ga tsun da ai.

Synod hpawng hkrunlam hte seng nna mung myit hta bang da, tatut galaw shatup sa wa na matu shadum n-gun jaw da ai.

Yesu Madu a kasi hte maren, nbung ai shara, tinang a makau grupyin ni hta, sasana magam hpe shakut gun hpai nga na matu mung numhtep ga tsun da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-to-new-bishops-be-open-to-dialogue-and-close-to-poor.html